«Կներեք` սուտ են ասում»

Մեր խմբագրություն ահազանգած ծնողները դժգոհություն էին հայտնում նշված պարտադրանքի կապակցությամբ` հայտարարելով, որ այդ համազգեստի համար իրենցից պահանջվում է 22 կամ 26 հազարական դրամ` կախված աշակերտի տարիքից: Իսկ այն ծնողները, ովքեր տվյալ դպրոց հաճախող ոչ թե մեկ, այլ ավելի երեխաներ ունեն, ստիպված են լինելու շատ ավելի մեծ գումարներ վճարել: Մեզ դիմած ծնողները նկատում էին նաեւ, որ չնայած դպրոցներում պարտադրված դրամահավաք չի թույլատրվում, այստեղ դա էլ են անում: Իրենք, ըստ նրանց, ստիպված են ամեն ամիս 500 դրամ ֆոնդի գումար վճարել: Եւս 500 դրամ էլ հավաքել են, օրինակ, պայմանագրերի համար, որոնք գալիք ուսումնական տարվանից կնքվելու են դպրոցի ու ծնողի միջեւ: Դաշտենցի անվան դպրոցի տնօրեն Ռուզաննա Կոստանյանը մեզ հետ զրույցում վերջին երկու երեւույթը, ինչպես եւ կարելի էր սպասել, հերքեց: Ասաց, որ ֆոնդի գումար հավաքելը ամենեւին էլ պարտադիր չէ, իսկ ինչ վերաբերում է պայմանագրերին, ապա ծնողներին դեռեւս ընդամենը ծանոթացրել են դրանց ու տեղյակ պահել, որ հաջորդ ուսումնական տարվա համար պայմանագիր են կնքելու: «Ճիշտ չեն ասում, կներեք, ես պիտի ասեմ, որ իրենք սուտ են ասում: Այստեղ պարտադիր որեւէ բան չի արվում: Ամոթ իրենց: Ես դա կասեմ: Այն ծնողը, որն այս ձեւով է մոտենում այն դպրոցին, որտեղ իր երեխային է տանում... Մեր հասարակությունը պարտադրանք չի սիրում: Հասարակության մի անդամն էլ ես եմ: Եթե իմ նկատմամբ լինում է որեւէ պարտադրանք, ես ցասումով եմ վերաբերվում դրան: Եւ հատկապես ծնողին չես կարող պարտադրել ինչ-որ բան: Իրենք ունենում են դասարանի ֆոնդ, որը օգտագործում են իրենց ծախսերի համար: Թող մի ծնող անուն-ազգանունով ասի, որ ինձ պարտադրում են այս բանը»,- ֆոնդի մասին հարցին անդրադառնալով` ասաց Ռուզաննա Կոստանյանը եւ հավելեց, որ պայմանագրի համար էլ չէին կարող 500 դրամ պահանջել, քանզի նրա վրա գրված է, որ արժե 150 դրամ: Ծնողները, սակայն, շարունակում են պնդել, որ 500 դրամ են հավաքել, իսկ պայմանագրի վրա նշված գնին իրենք ուշադրություն չեն դարձրել: Դառնալով համազգեստի` ծնողներին այս պահին, թերեւս, ամենաշատը մտահոգող խնդրին` նշենք, որ տնօրենը նկատում էր, որ ազատ ոճի հագուստով աշակերտների դպրոց ներկայանալը նշանակում է հնարավորություն` ցուցադրելու իրենց զանազան հագուստներն ու մրցակցության մեջ մտնել միմյանց հետ: «Ինչ ցանկանում են, այն հագնում են: Ծնողը ամեն տեսակի զգեստ հագցնում է երեխային, դպրոց ուղարկում: Մեծ դպրոց է, եւ համազգեստին հասնելը բավականին դժվար է, ես հասկանում եմ: Ես հասկանում եմ, որ ծնողները նաեւ շարժվում են երեխաների կապրիզով, որովհետեւ նրանք այլեւս հնարավորություն չեն ունենա ինչ ուզենան, հագնեն եւ ցուցադրեն իրենց զգեստապահարանը դպրոցում: Զգեստի հետ կապված` շերտավորում է առաջանում: Կան շատ երեխաներ, վատ են զգում, իրենց ծնողներին նեղ դրության մեջ են դնում, որ ընկերուհիս սա հագել է` ես էլ եմ ուզում, ընկերս սա հագել է` ես էլ եմ ուզում: Եւ աշխարհով մեկ ընդունված բան է համազգեստը, ես չեմ հասկանում, թե ծնողները ինչո՞ւ են այսպես ծանր տանում այդ հանգամանքը»,- զարմացավ Ռուզաննա Կոստանյանը` հավելելով, որ իրեն ավելի վաղ էր հայտնի ծնողների անհամաձայնության մասին: Միայն թե դժգոհողների թիվն, ըստ նրա, ընդամենը 20-30 է, որոնց առաջարկվում է ցանկության դեպքում սեփական ուժերով կարել նույնանման մի համազգեստ: «Ում որ պատվիրել ենք, նրանք բավականին զեղչեր են անելու, անապահով աշակերտների համար անվճար են կարելու... Սկսվում է համազգեստից, գիտե՞ք, ամեն ինչը: Երեխան համազգեստի մեջ իրեն ավելի զգաստ է պահում, ավելի կարգապահ է լինում, այդ շերտավորումը չի լինում: Ուսուցիչ է մտնում դասարան, նրա զգեստից երեխան է հագած լինում: Մենք անցյալ տարի դեպք ենք ունեցել, որ անգլերենի ուսուցիչը եկավ, ասաց` ես այդ դասարան չեմ մտնի, ծաղրում է երեխան իմ զգեստը»,- վստահեցրեց Ռ. Կոստանյանը` համոզված լինելով, թե ծնողները, որոնք իրենց բողոքներում գույները խտացնում են, պետք է ըմբռնումով մոտենան ու ընդառաջ գնան համազգեստի հետ կապված իրենց այդ նախաձեռնությանը: Տնօրենը հավաստիացրեց, որ ծնողների հետ քննարկվել է խնդիրը, եւ պարտադրանքի տարբերակը չի կիրառվել: Երեկ երեկոյան տեղեկացանք, որ նախորդ օրվանից ծնողներից պահանջում են ստորագրություն տալ, որ համազգեստն իրենց երեխաներին չի պարտադրվել, իսկ երեկ էլ` դասերի ավարտից հետո ցածր դասարանների աշակերտներին չի թույլատրվել դուրս գալ իրենց սպասող ծնողների մոտ, որպեսզի վերջիններս իրենք գնան երեխաների հետեւից ու նաեւ ստորագրեն: Եւ քանի որ թիվ 114 դպրոցի տնօրենը հայտարարում էր, թե շատ կուզենար, որպեսզի համազգեստի վերաբերյալ պետական մոտեցում լիներ եւ խանութներում էլ վաճառվեին դրանք, ԿԳ նախարարությունից հետաքրքրվեցինք, թե ինչ են մտածում այս մասին: Հանրակրթության վարչության պետ Նարինե Հովհաննիսյանն ասաց, որ նման հարց չեն քննարկել, ու համազգեստի խնդիրը թողնված է դպրոցին, մանկավարժական ու ծնողական խորհրդին: Պայմանագրերի վերաբերյալ էլ նշեց, որ դրանք արժեն 150 դրամ, եւ որոնք դպրոցները պետք է ձեռք բերեն համապատասխան խանութներից: