Տեղյակ եղել է

Ըստ նախնական եզրակացության, 57-ամյա Համլետ Ստեփանյանի մահվան պատճառ է հանդիսացել սրտի կաթվածը: Մինչդեռ Ստեփանյանի նախկին պաշտպանը մեզ հայտնեց, որ վերջինս սրտի հետ կապված նախկինում որեւէ խնդիր չի ունեցել: Ըստ ԱՆ քրեակատարողական վարչության պետի մամլո խոսնակ Արսեն Բաբայանի, դիակի նախնական զննությամբ բռնության հետքեր չեն հայտնաբերվել, նշանակվել է դատաբժշկական փորձաքննություն, մահվան հանգամանքները պարզելու ուղղությամբ տարվում է քննություն: «Նուբարաշեն» ՔԿՀ-ում հասարակական վերահսկողություն իրականացնող դիտորդական խմբի անդամներին մահացածի խցակիցները հայտնել են, որ ճաշից մոտ կես ժամ անց Ստեփանյանն իրեն վատ է զգացել, պառկել է, ինչից հետո խցակիցները խռխռոցի տիպի ձայներ են լսել: Դատարանում Համլետ Ստեփանյանի շահերի պաշտպան Աղասի Աթաբեկյանը երեկ մեզ հայտնեց, որ Ստեփանյանի մոտ առողջական խնդիրներ առաջացրել են միայն երիկամները, իսկ սրտային հիվանդություն նա երբեւէ չի ունեցել: «Նա հարազատներից երիկամների հիվանդության հետ կապված դեղորայք է միշտ ուզել, քանի որ քրեակատարողական հիմնարկում դեղորայքի հարց չէր լուծվել»,- երեկ մեզ հայտնեց մահացածի նախկին պաշտպանը եւ ավելացրեց, որ երիկամների պրոբլեմը Ստեփանյանի մոտ առաջացել է Հոկտեմբերի 27-ի գործով նախաքննության ընթացքում իրականացված բռնությունների հետեւանքով: «Ստեփանյանը նույնիսկ հայտարարություն էր գրել, եւ նշել, որ եթե այդ բռնությունների ընթացքում իրենից պահանջեին ընդունել, որ ԱԺ-ում ութ հոգուն էլ ինքն է սպանել, ապա նա կաներ դա»,- մեզ ասաց Աթաբեկյանը, ով մեզ հայտնեց նաեւ, որ Ստեփանյանը կարիք է ունեցել «Դատապարտյալների հիվանդանոց» ՔԿՀ տեղափոխվելու եւ այնտեղ լուրջ բուժում ստանալու, սակայն «նրան ոչ ոք թույլ չի տվել տեղափոխվել»: Նախկին պաշտպանը երեկ մեզ պատմեց նաեւ, որ պատժաչափի 2/ 3-րդը կրելուց հետո Ստեփանյանը բազմաթիվ դիմումներ էր ներկայացրել` պայմանական վաղաժամկետ ազատ արձակվելու համար, սակայն համապատասխան հանձնաժողովը բոլոր դիմումները մերժել էր: Իսկ ինչ վերաբերում է նշանակված դատաբժշկական փորձաքննությանը, ապա Աթաբեկյանը կասկածում է, որ դրա արդյունքները կարող են օբյեկտիվ չլինել: Դեմիրճյանների շահերի ներկայացուցիչ Աշոտ Սարգսյանը եւս չի հավատում, որ փորձաքննության արդյունքները կբացահայտեն իրականությունը: Մեզ հետ զրույցում Սարգսյանը նշեց, որ թեեւ Ստեփանյանը Հոկտեմբերի 27-ի հետ կապված «լուրջ ինֆորմացիայի կրող» չի եղել, բայց եւ որոշակի կարեւոր տեղեկություններից տեղյակ եղել է: «Ըստ քրեական գործի նյութերի, Ստեփանյանը չէր կարող իրական կազմակերպիչների մասին որեւէ տեղեկություն ունենալ, որովհետեւ նա հանցակիցներին միացել էր միայն Հոկտեմբերի 27-ի առավոտյան: Սակայն նա կարող էր իմանալ այն ուժերի մասին, որոնք Ազգային ժողով պետք է գային, արդեն դրանից հետո»,- երեկ մեզ հայտնեց Աշոտ Սարգսյանը, ում խոսքով` այսօր վտանգված է Հոկտեմբերի 27-ի գործով բոլոր դատապարտյալների կյանքը, եւ այդ սպառնալիքը գնալով կաճի այն ժամանակ, երբ աճի իշխանափոխության հավանականությունը. «Եթե իշխանափոխություն լինի, եւ նոր իշխանությունները ցանկանան բացահայտել Հոկտեմբերի 27-ի իրական կազմակերպիչներին, ումո՞վ պետք է բացահայտեն: Իհարկե, Կարեն Հունանյանով, Նաիրի Հունանյանով, Էդիկ Գրիգորյանով: Ինձ թվում է, որ իշխանափոխությունից առաջ այս երեքը էլ չեն լինի: Որպես իշխանափոխության ցուցանիշ պետք չէ նայել, թե ինչքան մարդ է գալիս հանրահավաքներին, կամ ինչքանով են ակտիվ քաղաքացիները, ուղղակի պետք է նայել, տեսնել, եթե այս երեքը արդեն չլինեն, ուրեմն իշխանափոխությունը մոտ է»: Երեկ մենք տեղեկացանք, որ Հոկտեմբերի 27-ի գործով այժմ անազատության մեջ են գտնվում չորս հոգի. Կարեն եւ Նաիրի Հունանյանները գտնվում են «Երեւան-Կենտրոն» ՔԿՀ-ում, իսկ Էդվարդ Գրիգորյանը եւ Դերենիկ Բեջանյանը` «Նուբարաշեն» ՔԿՀ-ում: