Ռիո 2016. մաս 2-րդ. 27 մարզիկներ կվերադառնան առանց մեդալների

Ամառային 31-րդ Օլիմպիական խաղեր մեկնած 33 հայ մարզիկներից մեդալներով են վերադառնում 4-ը: Ինչպես հայտնի է, անկախ Հայաստանի վերջին 20 տարվա պատմության 2-րդ ոսկե մեդալն է Հայաստան բերում 98 կգ քաշային հունահռոմեական ոճի ըմբիշ Արթուր Ալեքսանյանը, իսկ 66 կգ քաշային հունահռոմեական ոճի ըմբիշ Միհրան Հարությունյանը, 105 կգ քաշային Սիմոն Մարտիրոսյանը եւ +105 կգ քաշային Գոռ Մինասյանը դարձել են արծաթե մեդալակիրներ:

2 մարզիկներ՝ լողորդ Մոնիկա Վասիլյանը եւ աթլետ Գոռ Ներկարյանը, մրցումներին չեն մասնակցել՝ Վասիլյանը ձեռքի վնասվածքի, իսկ Ներկարյանը՝ դեռեւս անհայտ, բայց ըստ որոշ տեղեկությունների՝ նույնպես վնասվածքի պատճառով:

Մնացած 27 մարզիկները հայրենիք կվերադառնան առանց մեդալների, թեեւ նրանցից մի քանիսից իրական հույսեր կային:

Մարմնամարզություն

Այդ իրական հույսերից մեկը Եվրոպայի չեմպիոն, աշխարհի բրոնզե մեդալակիր Հարություն Մերդինյանն էր: 32-ամյա փորձառու մարզիկը գերազանց հանդես եկավ որակավորման փուլում, 15.583 միավորով 8 մարզիկների թվում դարձավ 4-րդը, անցավ եզրափակիչ եւ պետք է պայքարեր մեդալների համար:

Սակայն եզրափակչի օրն ինչ-որ բան այնպես չընթացավ: Այդ նույն 8 մարզիկների թվում նա 14.933 միավորով զբաղեցրեց նախավերջին՝ 7-րդ, տեղը՝ առաջ անցնելով միայն ուկրաինացի Օլեգ Վերնյաեւից, որը մինչեւ այդ ձախողվել էր. նա վարժության ժամանակ սխալ էր թույլ տվել եւ ստիպված էր եղել նորից սկսել ելույթը:

Մեր մյուս մարմնամարզիկները՝ Արթուր Դավթյանը եւ Հուրի Գեբեշյանը, եզրափակիչ դուրս չեկան: Որակավորման փուլում Դավթյանն առաջին ցատկը գերազանց կատարեց, սակայն երկրորդի ժամանակ սխալվեց ու 14.566 միավորով զբաղեցրեց 11-րդ հորիզոնականը:

Ինչ վերաբերում է Գեբեշյանին, որը դարձավ հայկական մարմնամարզության պատմության առաջին կին մարզիկը, որը երբեւէ մասնակցել է Օլիմպիական խաղերին, ապա նա Ռիո էր մեկնել հիմնականում այլ նպատակով: Ցանկանում էր ցուցադրել իր իսկ հորինած հնարքը, որն անսխալ կատարելու դեպքում կոչվելու էր իր անունով: Հուրիի մոտ դա ստացվեց, եւ նա լիովին գոհ է իր աշխատանքից:

Ազատ ոճի ըմբշամարտ

Մեդալ նվաճելու հնարավորությունը ձեռքից բաց թողեց Հայաստանը ներկայացնող 125 կգ քաշային Լեւան Բերիանիձեն: Նա հասավ մինչեւ կիսաեզրափակիչ, սակայն այդտեղ նրա ճանապարհին կանգնեց աշխարհի գործող չեմպիոն թուրք Թահա Աքգյուլը (1:8): Բրոնզի համար պայքարում էլ Բերինաիձեն զիջեց բելառուս Իբրահիմ Սաիդովին: Գոտեմարտն ավարտվեց 2:2 հաշվով, սակայն հաղթեց բելառուս մարզիկը, քանի որ 2-միավորանոց հնարք էր կատարել, իսկ Բերիանիձեն 2 միավոր վաստակել էր 1-միավորանոց հնարքներով:

97 կգ քաշային Գեորգի Կետոեւից եւս սպասելիքներ կային: Նա Հայաստանի հավաքական էր տեղափոխվել այս տարվա ապրիլին: Մինչեւ այդ մոտ 2 տարի նա մրցումների չէր մասնակցել, սակայն վերադառնալուն պես Ռիո 2016-ի ուղեգիր էր ձեռք բերել՝ հաղթելով Մոնղոլիայի վարկանիշային մրցաշարում:

Ռիոյում նա պարտվեց հենց մեկնարկային գոտեմարտում 1/8 եզրափակչում նա 1:8 հաշվով զիջեց Եվրոպական խաղերի արծաթե մեդալակիր վրացի Էլիզբար Օդիկաձեին: Կետոեւը կկարողանար բրոնզի համար պայքարել, եթե վրացին եզրափակիչ հասներ, սակայն դա տեղի չունեցավ:

Իրենց առաջին գոտեմարտում պարտվել էին նաեւ 65 կգ քաշային Դավիթ Սաֆարյանը (1:3) եւ 57 կգ քաշային Գառնիկ Մնացականյանը (0:13): Հետագայում ոչ Մնացականյանին հաղթած 2013թ. աշխարհի չեմպիոն իրանցի Հասան Սաբզալի Ռահիմին, ոչ էլ Սաֆարյանին հաղթած Իտալիան ներկայացնող ազգությամբ կուբացի աշխարհի եւ Եվրոպայի գործող չեմպիոն Ֆրանկ Չամիզո Մարկեսը եզրափակիչ չհասան, եւ հայ մարզիկները բրոնզի համար պայքարելու հնարավորություն չստացան:

Ձյուդո

Մեդալի ետեւից էր գնացել նաեւ Հայաստանի օլիմպիական հավաքականի ամենափորձառու մարզիկներից մեկը՝ 60 կգ քաշային ձյուդոիստ Հովհաննես Դավթյանը: Ռիո 2016-ը 32-ամյա մարզիկի համար 3-րդ Օլիմպիական խաղերն էին, եւ նա ինքն էլ ասում էր, որ արդեն ժամանակն է մեդալով վերադառնալու: Սակայն չստացվեց: Նա հաղթանակով սկսեց մրցելույթները. 1/16 եզրափակչում հաղթեց 2008թ. Օլիմպիական խաղերի արծաթե մեդալակիր ավստրիացի Լյուդովիկ Պայշներին, բայց հաջորդ փուլում՝ 1/8 եզրափակչում, զիջեց Ռուսաստանի ներկայացուցիչ Բեսլան Մուդրանովին:

Բռնցքամարտ

Ինչպես ըմբշամարտում, այնպես էլ բռնցքամարտում մրցավարները մեծ ազդեցություն են ունենում արդյունքների վրա: Նրանց կամայականություններից հաճախ տուժում են նաեւ հայ մարզիկները:

Հովհաննես Բաչկով

Այս օլիմպիական խաղերում մրցավարների վիճելի որոշումների արդյունքում 1/8 եզրափակչում պայքարը լքեցին 56 կգ քաշային Արամ Ավագյանը եւ 64 կգ քաշային Հովհաննես Բաչկովը: 1/8 եզրափակչում Ավագյանի մրցակիցն աշխարհի ու Եվրոպայի չեմպիոն իռլանդացի Մայքլ Քոնլանն էր, իսկ Բաչկովինը՝ չինացի Հու Ցյան Սյունը: Մինչեւ այդ 1/16 եզրափակչում Ավագյանն առավելության էր հասել ճապոնացի Արաշի Մորիսակայի, իսկ Բաչկովը՝ վենեսուելացի Արկոն Լուիս Մարտինի նկատմամբ:

Արամ Ավագյան

Հետագայում Արամ Ավագյանը հայտարարեց, որ այլեւս չի ցանկանում կրկին զգալ այն ցավը, որն ամեն անգամ զգում է, երբ մրցավարների պատճառով կորցնում է հաղթանակը, եւ այդ պատճառով ավարտում է կարիերան սիրողական բռնցքամարտում:

69 կգ քաշային Վլադիմիր Մարգարյանի համար Օլիմպիական խաղերը 1/8 եզրափակչում ավարտվեցին վնասվածքի պատճառով: 1/16 եզրափակչում՝ Ֆիջին ներկայացնող Ուինստոն Հիլի դեմ մենամարտում, Մարգարյանը վնասել էր հոնքը: Վնասվածքը զգացնել տվեց նաեւ 2012թ. օլիմպիական չեմպիոն, 2008թ. Օլիմպիական խաղերի բրոնզե մեդալակիր, 2009թ. աշխարհի չեմպիոն կուբացի Ռոնիել Իգլեսիասի դեմ պայքարում: Բժիշկներին չհաջողվեց դադարեցնել արյունահոսությունը, նրան չթույլատրեցին շարունակել մենամարտը: Արդյունքում հայ մարզիկի հաշվին տեխնիկական նուքաութ գրանցվեց:

52 կգ քաշային Նարեկ Աբգարյանը 1/16 եզրափակչում հաղթեց Ուգանդան ներկայացնող Ռոնալդ Սերուգոյին, սակայն հաջորդ փուլում չինացի Հու Ջիան Գուանին շրջանցել չհաջողվեց:

Հայ բռնցքամարտիկներից պայքարի մեջ առաջինը մտել էր 49 կգ քաշային Արթուր Հովհաննիսյանը եւ պարտվել էր առաջին իսկ մենամարտում: Մրցումային առաջին օրը՝ օգոստոսի 6-ին, նա 1/16 եզրափակչում զիջել էր իսպանացի Սամուել Կարմոնային:

Աթլետիկա

Աթլետներից ի սկզբանե սպասվում էր հնարավորինս լավ ելույթ եւ անձնական ցուցանիշների բարելավում: Նրանցից ոչ մեկը, սակայն, մարզիչների սպասելիքները չարդարացրեց:  Գոռ Ներկարյանի անունն ընդհանրապես բացակայում էր հայտացուցակից, եւ այդ մասին պաշտոնական պարզաբանում դեռ չի եղել:

Մնացած 5 մարզիկներն էլ չհաղթահարեցին որակավորման փուլը: Լեւոն Աղասյանը (եռացատկ) 15.54 մ արդյունքով զբաղեցրեց 36-րդ, Դիանա Խուբեսերյանը (վազք 200 մ) 25.16 վրկ-ով՝ 67-րդ, Գայանե Չիլոյանը (վազք 200 մ) 25.03 վրկ-ով՝ 66-րդ, Ամալիյա Շարոյանը (հեռացատկ) 5.95 մ արդյունքով՝ 35-րդ, իսկ Լիլիթ Հարությունյանը (արգելավազ ք 400 մ) 1 րոպե 03:13 վայրկյան արդյունքով՝ վերջին՝ 48-րդ, տեղը:

Լող

Մոնիկա Վասիլյան

Լողում Հայաստանը պետք է ներկայացներ 2 հոգի, սակայն, ինչպես նշվեց, Մոնիկա Վասիլյանը վնասվածքի պատճառով չմասնակցեց:

Ինչ վերաբերում է Վահան Մխիթարյանին, ապա նա ցույց տվեց 23.50 վայրկյան արդյունք եւ 85 մարզիկների թվում զբաղեցրեց 47-րդ տեղը:

Այս 2 մարզիկներն Օլիմպիական խաղեր էին գնացել սպիտակ քարտով:

Հրաձգություն

Սպիտակ քարտով էր Ռիո 2016-ին մասնակցում նաեւ Հայաստանի օլիմպիական հավաքականի միակ հրաձիգ Հրաչ Բաբայանը: 10 մ օդամղիչ հրացան մրցաձեւում նա վաստակած 621.5 միավորով 50 մարզիկների պայքարում զբաղեցրեց 24-րդ տեղը եւ եզրափակիչ դուրս չեկավ:

Ամառային 31-րդ օլիմպիական խաղերը մեկնարկել էին օգոստոսի 5-ին եւ ավարտվեցին 21-ին: Փակման արարողությունը տեղի ունեցավ այսօր: