«Գոնե հիվանդանոցում մահանար, ոչ թե շտապօգնության պատճառով». կես ժամ հետո են տեղ հասել

Երեկ անդրադարձել էինք օգոստոսի 1-ին Վանաձոր-Դիլիջան ավտոճանապարհին՝ Մարգահովիտ գյուղի մոտակայքում տեղի ունեցած ավտովթարին, որի հետեւանքով 3 զոհ է եղել: Այսօր մեզ հետ կապ հաստատեց զոհվածներից մեկի՝ Էմիլ Խուդինյանի մորաքրոջ աղջիկը՝ հայտարարելով, որ իր եղբայրն ու մյուս զոհը՝ Դավիթ Սարգսյանը, ոչ թե տեղում են մահացել, այլ շտապօգնության մեքենայի ուշացման պատճառով.

«Անտառաշեն, Ֆիոլետովո, Լերմոնտոնովո եւ Մարգահովիտ գյուղերին ընդամենը մեկ պոլիկլինիկա է սպասարկում, էն էլ ոչ բարվոք վիճակում է, եթե գյուղերից մեկում կանչ է լինում, շտապօգնության քույրերը գնում են ավտոբուսով, ոչ թե շտապօգնության մեքենայով»,- Armtimes.com-ի հետ զրույցում ասաց Մարիամ Ղումաշյանը: Մեր զրուցակիցը տեղեկացրեց, որ անգամ դրամաշնորհների հետ կապված ծրագրերի է դիմել այս խնդրով, որ գյուղին շտապօգնության մեքենա տրամադրվի.

«Բայց ինձ ասացին, որ պետական հիմնարկ է էդ պոլիկլինիկան, չենք կարող օգնել որեւէ հարցով, մասնավոր չի: Ցանկացած կանչի դեպքում էդպես է, օրինակ երեխան ջերմություն ունի, շտապօգնության քույրն իր միջոցներով ավտոբուս է նստում, գնում գյուղ»,- ասաց Մարիամը, ապա պատմեց վթարի մասին.

«Նորմալ վարելով Վանաձորից մեքենան 30 րոպեում հասնում է գյուղ, 30 րոպե էլ՝ հետ գնալը: 30 րոպե եղբայրս արնահոսել է ասֆալտին մինչ մեքենայի գալը, ականատեսները, որ մեքենայից հանել են, պատմում են, որ լվացել են նրան, արյուն չի եղել, պարզվել է՝ ներքին արնահոսություն է եղել, իրենք, որ տեսել են պուլս կա, գլխին վնասվածք չկա, մտածել են հնարավոր կլինի փրկել: Մահվան վկայականում նշված էր, որ Էմիլի թոքն է ծակված եղել, եւ ձախ ոտքը կոտրված, ու ներքին արնահոսություն է եղել, եթե հասցնեին վիրահատության, գոնե կտեսնեին թոքի պատռվածքը:Մեր մխիթարանքն էն կլիներ, որ գոնե հիվանդանոցում մահանար՝ դանակի տակ, ոչ թե շտապօգնության ուշանալու պատճառով: Չեմ ուզում, որ հետո էլ դեպք լինի, ու իմ ախպոր նման տուժածն ասֆալտի վրա կես ժամ անօգնական պառկած մնա»,- ասաց Մարիամ Ղումաշյանը:

Մարիամի խոսքով՝ դեպքի ականատեսները, որոնք էլ առաջին պահին օգնություն են ցուցաբերել, ասել են, որ Էմիլ Խուդինյանը վթարի հետևանքով տեղում չի մահացել.

«Թաղմանը 6-7 հոգի ասում էին, որ անձամբ եղել են Էմիլի կողքին, լվացել վերքերը, ու ասել, որ արյուն չի եղել, պուլսը եղել է, գլխին վնասվածք չի եղել, ասֆալտին պառկեցրել են, մոտ կես ժամ այդպես մնացել է, հետո տեսել են, որ շտապօգնության մեքենան ուշանում է, իրենց միջոցներով են փորձել հիվանդանոց տեղափոխել, արդեն պուլսը չի եղել: Իսկ Դավիթն անգամ ոտքի է կանգնել, քեռուս հետ խոսել, հարցրել՝ ի՞նչ է եղել, իրենք էլ մտածել են, որ ուրեմն լավ է, իրեն թողել են, սկսել են մնացածով զբաղվել»,- ասաց նա:

Մարիամ Ղումաշյանի խոսքով՝ իրենց դժգոհությունը ոչ թե Վանաձորի շտապօգնության մեքենայով է պայմանավորված, այլ այն, որ գյուղում չկա շտապօգնության ծառայություն, եւ ցանկացած խնդրի դեպքում ստիպված են սպասել Վանաձորից եկող մեքենաներին:

Ինչ վերաբերում է վթարի հետեւանքով տուժած երկու այն տղաներին՝ Միհրան Պողոսյանին եւ Արմեն Գեւորգյանին, որոնք արդեն հիվանդանոցից տուն են տեղափոխվել, Մարիամը նկատեց, որ երկուսն էլ սթրեսի մեջ են, դեպքի հետ կապված անգամ ընտանիքի անդամների հետ չեն խոսում:

Հիշեցնենք, որ երեկ Արմեն Գեւորգյանի մայրիկին խնդրեցինք հեռախոսը փոխանցել տղային, սակայն Արմենը կտրականապես հրաժարվեց խոսել:

«Շտապօգնություն» ՓԲԸ տնօրեն Թագուհի Ստեփանյանը մեզ հետ զրույցում նկատեց, որ ինքն իրավասու չէ «Շտապօգնության»՝ մարզերում աշխատանքի վերաբերյալ որեւէ մեկնաբանությամբ հանդես գալ, այն նախարարության իրավասությունների տիրույթում է: Առողջապահության նախարարության լրատվության եւ հասարակայնության հետ կապերի վարչության պետ Անահիտ Հայթայանն էլ առաջարկեց գրավոր հարցադրմամբ դիմել: Խնդրի հետ կապված նախարարության պաշտոնական պատասխանը ստանալուն պես՝ անմիջապես կհրապարակենք:

Սեդա Ղուկասյան