Թատերական բեմադրություն. Վահան Շիրխանյանի մեղադրանքը խստացվեց

2015 թվականի նոյեմբերի 25-ին ԱԱԾ-ի կողմից վնասազերծված «զինված խմբի» գործով կալանավորված, ՀՀ պաշտպանության նախկին փոխնախարար Վահան Շիրխանյանի մեղադրանքը լրացվել է:

Այս մասին մեր զրույցում հայտարարեց Շիրխանյանի պաշտպան Հայկ Ալումյանը: Նա ասաց, որ իր պաշտպանյալին մեղադրանք է առաջադրվել նաեւ ՀՀ քրեական օրենսգրքի 300 հոդվածով (իշխանությունը յուրացնելուն նախապատրաստվելը): «Պարոն Շիրխանյանը մեղադրանքը անվանեց թատերական բեմադրություն եւ հայտարարեց, որ իրական հանցագործները նրանք են ովքեր այս մեղադրանքները սարքում են: Կտրականապես չի ընդունում նման մեղադրանքը»,-ասաց Ալումյանը: Նա ասաց, որ մեղադրանքը փոփոխելու հետ միաժամանակ նախաքննական մարմինը հայտնել է նախաքննության ավարտի մասին. «Նախաքննությունն ավարտվում է եւ մոտ օրերս մեզ կտրամադրեն քրեական գործի բոլոր նյութերը, որը բաղկացած  է առնվազն 30 հատորից : Նյութերին կծանոթանանք եւ ավելի առարկայական  կկարողանաք վիճարկել առաջադրված մեղադրանքը»,-մանրամասնեց պաշտպանը:

Մինչ այս Վահան Շիրխանյանը մեղադրվում էր նաեւ Արթուր Վարդանյանի կողմից ստեղծված հանցավոր համագործակցությանը մասնակցելու, դրա օգտին գործելու, կոնկրետ հանձնառություն եւ դերակատարություն ունենալու մեջ, նախատեսված` ՀՀ քրեական օռենսգրքի 223-րդ հոդվածի 2-րդ մասով (պատժվում է ազատազրկմամբ՝ վեցից տաս տարի ժամկետով) եւ ՀՀ քրեական օրենգրքի 235 հոդվածով (ապօրինի կերպով զենք պահելը ձեռք բերելը կամ փոխադրելը՝ պատժվում է ազատազրկմամբ՝ առավելագույնը երեք տարի ժամկետով): «Կոնկրետ պարզ չէ, թե Շիրխանյանը ինչի մեջ է մեղադրվում ՝ զենքը պահելո՞ւ, փոխադրելո՞ւ, թե ձեռք բերելու: Ամեն դեպքում նա ոչ մի առնչություն չունի ապօրինի զենքի զինամթերքի հետ»,-նշեց Հայկ Ալումյանը:

Մեր հարցին, թե մեղադրանքը լրացվելուց ի՞նչ ապացույցներ է նախաքննական մարմինը ներկայացրել, պաշտպանն ասաց, որ նոր ապացույցներ չեն ներկայացվել. «Մեզ բացատրվել է հետեւյալը՝ եղած ապացույցները վերագնահատվել են, վերաիմաստավորվել են եւ արդյուքնում որոշվել է, որ պարոն Շիրխանյանի գործողություններում առկա է նաեւ այդ հանցակազմը:  Մեզ նոր ապացույցեր չեն ներկայացվել»,-ասաց նա: Հարցին, թե ինչպե՞ս եք գնահատում նախաքննական մարմնի գործողություններն, Ալումյանն ասաց՝ այստեղ մենք գործ ունենք քաղաքական հետապնդման հետ. «Ես մինչ այդ, շատ վերապահումով էի  մոտենում քաղբանտարկյալ հասկացությանը: Շատ քիչ դեպքեր կային, որ ես կարող էի ենթադրել, որ մարդուն կալանքի տակ են պահում, կամ փորձում են հանցագործության մեջ մեղադրել զուտ քաղաքական շարժառիթներից ելնելով: Բայց այս անգամ ես գնալով ավելի ու ավելի իմ պաշտպանյալի՝ պարոն Շիրխանյանի կարծիքին եմ մոտենում, որ այստեղ մենք գործ ունենք քաղաքական հետապնդման հետ:  Այսօր մենք տոնում են Անկախության 25-ամյակը. պարոն Շիրխանյանը շատ մեծ լումա ունի անկախության հետ կապված եւ այն ,որ հենց Անկախության տոնի նախօրեին մեղադրանքը լրացրեցին, պարոն Շիրխանյանը ասաց, որ դա հաշվեհարդար է իր նկատմամբ: Այսինք ընտրեցին այն օրը, թե երբ մեղադրանքը լրացնեն: Մենք  հիմա կսկեսնք ծանոթանալ քրեական գործի նյութերին եւ ելնելով քրեական գործի նյութերի բովանդակությունից  նոր կսկենք մեր քայլերը կառավարել»,-պատասխանեց Շիրխանյանի պաշտպանը: 

Նա ընդգծեց, որ այս գործով քննիչները շատ-շատ են, բայց այդ բոլոր քննիչներից պարոն Շիրխանյանը ընդամենը մեկ հոգու է տեսել: Մեր հարցին, թե ինչպե՞ս է գնահատվում Վահան Շիրխանյանի առողջական վիճակը, Ալումյանը պատասխանեց. «Առողջական վիճակը շատ վատ է, եւ ես ոնց նայում եմ սա էլ է հաշվեհարդար: Այն աստիճանի էին հասցել, որ թոքի ինֆարկտ էր տարել, հազիվ փրկեցին կյանքը, հիմա գնալով վատանում է ու չգիտենք, որ պահին կհասնի կրիտիկական վիճակի: Մենք միջնորդել ենք բժշկական հետազոտություններ իրականացնել, սակայն նախաքննական մարմինը մեզ մերժել է: Ընդ որում ոչ թե իրենց հաշվին պետք է այդ հետազոտություններն արվեր,  այլ՝ Շիրխանյանի հարազատների: Արդեն մենք ձեռ ենք քաշել, որ իրենք իրենց հաշվին ինչ-որ բան կանեն»:

Նշենք, որ Պաշտպանության նախկին փոխնախարարի առողջական վիճակի հարցով պաշտպանական կողմը պետք է բողոք ուղարկեր Մարդու իրավունքների եվրոպական դատարան: Ալումյանից հետաքրքվեցինք, թե ի՞նչ փուլում է այն, ուղարկվել է, թե՝ ոչ: Ինչին ի պատասխան պաշտպանն ասաց. «Անցած ուրբաթ՝ սեպտեմբերի 16-ին, պարոն Շիրխանյանի փաստաբանների գանգատը մուտք է եղել Մարդու իրավունքների եվրոպական դատարան»:

Հիշեցնենք. Վահան Շիրխանյանը ձերբակալվել է 2015 թվականի դեկտեմբերի 19-ին , ապա 21-ին կալանավորվել: Իրեն առաջադրված մեղադրանքները Պաշտպանության նախկին փոխնախարարը չի ընդունում: Նախաքննության սկզբում նա հրաժարվել է ցուցմունք տալուց, սակայն հետո որոշել է ցուցմունք տալ,բայց առողջական վատ վիճակի պատճառով չի կարողացել:  Նախաքննության ընթացքում նա առերեսվել է Հայ Կաթողիկե եկեղեցիների ծայրագույն վարդապետ Հայր Անտոն Թութունջյանի հետ: Վերջինիս խափանման միջոց կալանքը փոխվել է ստորագրություն երկրից չհեռանալու մասին: Շիրխանյանը ճանաչել է զինված խմբի մի քանի անդամներին՝ մասնավորապես խմբի պարագլուխ համարվող Արթուր Վարդանյանին: