Խուդաբաշյանը պատգամավոր է. սակայն  դեռ մանդատ վերցնելու որոշում չի կայացրել

Տպագրվել է «Հայկական Ժամանակ» օրաթերթի՝ 2003 թվականի հոկտեմբերի 22-ի համարում

Երեկ տեղի ունեցած ԿԸՀ նիստն «Արդարություն» դաշինքի համամասնական ցուցակի 17-րդ հորիզոնականը զբաղեցնող Էմմա Խուդաբաշյանին գրանցել է ԱԺ պատգամավոր։

Մնացածն արդեն, ինչպես ասաց ԿԸՀ նախագահի տեղակալ Համլետ Աբրահամյանը, Էմմա Խուդաբաշյանի գործն է։ Համենայնդեպս, ԿԸՀ-ն մինչեւ երեկվա նիստը տիկին Խուդաբաշյանից որեւէ դիմում չի ստացել ինքնաբացարկի մասին։ Չնայած վերջինս ցանկացած պահի կարող է այդ դիմումը ներկայացնել եւ հրաժարվել պատգամավորական մանդատից։ Իհարկե, Էմմա Խուդաբաշյանի մանդատ վերցնել-չվերցնելու հարցը «հայոց հարց» չէր դառնա, եթե վերջինս մամուլում հանդես չգար ՀԺԿ-ի ու նրա ղեկավարի հասցեին քննադատությամբ ու չհեռացվեր կուսակցությունից:

Բնականաբար, իրենց նախկին կուսակցի նման քայլից հետո եւ հատկապես, որ ողջ այդ պատմությունը համընկավ ԱԺ պատգամավոր Սերգեյ Իսրայելյանի ցավալի մահվան հետ, ՀԺԿ-ում ակնկալում են, որ Էմմա Խուդաբաշյանը պետք է բարոյականություն ունենա եւ հրաժարվի մանդատից: Մինչդեռ, թերթերից մեկին տված հարցազրույցում վերջինս ասել էր, որ եթե ինքը հրաժարվի մանդատից, ապա դա կարելի կլինի գրանցել Գինեսի գրքում: Ու չնայած ԿԸՀ-ն օրենքի սահմաններում իր որոշումը կայացրել է, ՀԺԿ-ում դեռ հույսը չեն կորցրել, որ կուսակցությունից հեռացվածը դուրս կգա նաեւ դաշինքի համամասնական ցուցակից:

Համենայնդեպս, երեկ, մեր զրույցի ընթացքում, ՀԺԿ քարտուղար, ԱԺ պատգամավոր Գրիգոր Հարությունյանն ասաց, որ ինքը չի պատկերացնում, թե Խուդաբաշյանն այսքանից հետո ինչ երեսով պետք է գա եւ նստի «Արդարություն» խմբակցության կողքին: «Մենք նրա հետ աշխատել չենք պատրաստվում»,- ասաց ՀԺԿ քարտուղարը: Ի դեպ, մեր ունեցած տեղեկությամբ, ՀԺԿ շարքերն առաջարկել են ՀԺԿ վարչությանը՝ հատուկ հայտարարություն ընդունել եւ կոչ անել Էմմա Խուդաբաշյանին՝ ՀԺԿ-ին եւ նրա լիդերին մամուլում վարկաբեկելուց հետո բարոյականություն ունենալ եւ չվերցնել պատգամավորական մանդատը, սակայն ՀԺԿ լիդերն ասել է՝ ոչ:

Թերեւս, հասկանալով, որ ցանկացած կոչ, հայտարարություն կամ բարոյական ուղերձ որեւէ իրավական ուժ չունի, եւ մանդատից հրաժարվել-չհրաժարվելու որոշում կարող է կայացնել միայն Էմմա Խուդաբաշյանը։ Այդուհանդերձ, Էմմա Խուդաբաշյանի հարցում «Արդարություն» դաշինքում գնահատականները միանշանակ չեն։ Ու եթե դաշինքի ՀԺԿ-ական հատվածը վճռական է եւ ոչ մի պարագայում չի ցանկանում աշխատել Խուդաբաշյանի հետ, ապա երեկ, մեր զրույցի ընթացքում, «Արդարություն» դաշինքի պատգամավորներ Շավարշ Քոչարյանն ու Արշակ Սադոյանն ասացին, որ Էմմա Խուդաբաշյանը ՀԺԿ-ի համար, հատկապես նախագահական ընտրարշավի փուլում, իսկապես լուրջ գործ է արել, ուստի կարելի է մի կողմ դնել տարաձայնությունները եւ փորձել նորից աշխատել միասին։

Իսկ ըստ «Արդարություն» խմբակցության քարտուղար Վիկտոր Դալլաքյանի՝ խմբակցությունում այդ հարցը չի քննարկվել, ուստի ինքը կարող է արտահայտել միայն իր անձնական տեսակետը: «Տիկին Խուդաբաշյանի պատգամավոր դառնալու հետ կապված աղմուկն ինձ անհասկանալի է։ Էմմա Խուդաբաշյանը երեք ճանապարհ ունի. կա՛մ նա կարող դառնալ «Արդարություն» խմբակցության անդամ, կա՛մ կարող է դուրս գալ խմբակցությունից եւ դառնալ անկախ պատգամավոր, կա՛մ  կարող է անդամակցել որեւէ խմբի։ Անձամբ ես որեւէ խնդիր չեմ տեսնում, որ  օրենքի սահմաններում Խուդաբաշյանն իր որոշումն ընդունի»,- ասաց խմբակցության քարտուղարը:

Իհարկե, տրամաբանական կլիներ լսել նաեւ ՀԺԿ լիդեր Ստեփան Դեմիրճյանի կարծիքը, սակայն վերջինս կտրականապես հրաժարվում է այս թեմայով խոսել: Իսկ ըստ ՀԺԿ վարչության անդամ Ռուզան Խաչատրյանի՝ այս հարցի շուրջ անհարկի մեծ աղմուկ է բարձրացվել, միգուցե՝ նաեւ միտումնավոր: «Հաշվի առնելով այն փաստը, որ այս հարցի հիմքում ողբերգություն է՝ Սերգեյ Իսրայելյանի կորուստը, իսկապես տհաճ իրավիճակ է ստեղծվել, եւ ես կարծում եմ, որ պետք է վերջակետ դրվի այս պատմությանը: Ինչ վերաբերում է ձեր նշած անձի մանդատ ստանալ-չստանալուն, բոլորը հրաշալի գիտեն, որ օրենքն այստեղ հստակ է:

Մնացածը՝ անհատի խղճի կանխորոշման խնդիրն է: Այդուհանդերձ, ուզում եմ ասել, որ ՀԺԿ-ում կան հազարավոր մարդիկ, որոնք մեծ ներդրում են ունեցել կուսակցության մեջ, սակայն այս տարիների ընթացքում երբեք դրա մասին չեն թմբկահարել եւ պահանջներ չեն ներկայացրել: Եւ ահա այդ մարդկանց եմ ես համարում կուսակցության իրական հիմնադիրներ եւ նվիրյալներ»,- ասաց վարչության անդամը: Եւ քանի որ այս հարցում պարզություն կարող է մտցնել եւ կրքերը կարող է հանդարտեցնել միայն Էմմա Խուդաբաշյանը, որն այս օրերին խուսափում է շփվել մամուլի հետ, փորձեցինք ճշտել՝ գալո՞ւ է նա խորհրդարան, թե՞ ինքնաբացարկի դիմում է ներկայացնելու: «Ես դեռ որոշում չեմ կայացրել»,- ասաց այլեւս օրենքով ԱԺ պատգամավորը:   

Նաիրա  Զոհրաբյան