Ցուցարար «չեմպիոնը» 1 կգ քարը 150 մետրից նետել է ոստիկանների վրա. տուժել է 46 ոստիկան

ՊՊԾ գնդի գրավմանը հաջորդած օրերին ոստիկանների եւ քաղաքացիների միջեւ հուլիսի 20-ին Խորենացի փողոցում տեղի ունեցած բախումների դեպքի առթիվ հարուցված քրեական գործից անջատված մասով դատական նիստն այսօր հերթական անգամ հետաձգվեց:

4 ամբաստանյալների մասով գործի վարույթը Էրեբունի եւ Նուբարաշեն վարչական շրջանների ընդհանուր իրավասության դատարանից մոտ մեկ ամիս առաջ ընդատության կարգով փոխանցվել էր Կենտրոն եւ Նորք-Մարաշ վարչական շրջանների ընդհանուր իրավասության դատարան եւ մակագրվել դատավոր Մեսրոպ Մակյանին:  

Գործով ամբաստանյալներ Հայկ Հովհաննիսյանը, Արման Մխիթարյանը, Նարեկ Սարգսյանը եւ Ալբերտ Ավագյանը մեղադրվում են հուլիսի 20-ին Խորենացի փողոցում տեղի ունեցած բախումների ժամանակ ոստիկանության աշխատակիցների նկատմամբ բռնություն գործադրելու, նրանց վրա քար, շիշ նետելու եւ ոստիկանական վահանին հարվածելու մեջ:  

Այսօր տուժող ոստիկանների մուտքը դատական նիստերի դահլիճ չէր դադարում. նրանց թիվը հասնում էր 46-ի: Դատական նիստերի քարտուղարուհուց 10 րոպե պահանջվեց ներկա-բացակա անելու համար: Իսկ վկաներից մի տարեց տղամարդ էլ կարգադրիչներին դժգոհում էր, թե ինչու են իրեն վկա ներգրավել գործով, ինքը ոչ մի բան ո՛չ տեսել է, ո՛չ լսել:

Դատական նիստին չէին ներկայացել չորս ամբաստանյալների պաշտպանները: Նախագահող դատավոր Մեսրոպ Մակյանը դատավարության միակ մասնակից մեղադրող դատախազին տեղեկացրեց, որ պաշտպաններից դատարանը գրություն է ստացել, որում նշված է, որ մեկ այլ գործով ծանրաբեռնված լինելու պատճառաբանությամբ չեն կարող ներկա գտնվել դատական նսիտին: Մինչ դատավորը կհայտարարեր նիստը հետաձգելու մասին, գործով երկու ամբաստանյալները դատավորից խնդրեցին տեսակցություն տրամադրել իրենց հարազատների հետ: Դատավորն ասաց, որ այդ հարցին կանդրադառնան հաջորդ դատական նիստին, երբ ներկա կլինեն նաեւ պաշտպանները: Հաջորդ նիստը տեղի կունենա նոյեմբերի 18-ին ժամը 15:00-ին:

Ամբաստանյալ Հայկ Հովհաննիսյանի հայրը՝ Հովհաննեսը, մեր զրույցում դժգոհություն հայտնեց նիստերը պարբերաբար ձգձգելու համար: «Էնքան ոստիկան են գործով ներգարվել, որ հանկարծ մեկը չգա, նորից հետաձգելու են, սենց ոնց կլինի»,-ասաց նա: Վերջինս կարծիք հայտնեց, որ իր որդին պետք է վաղուց ազատության մեջ գտնվեր, քանի որ ըստ նրա՝ ոչ թե պետք է մեղադրյալ ներգրավվեր այլ՝ վկա: Հովաննես Հարությունյանը ի պատասխան մեր հարցին ասաց, որ իր որդու դեմ որեւէ ոստիկան ցուցմունք չի տվել: «Հիմա ես չեմ հասկանում՝ անկարգությունները էս տղերքի կողմից է եղել, թե՝ պետության»,- հարց հնչեցրեց ամբաստանյալի հայրը: «Այո, իմ տղան Խորենացի փողոցում եղել է. հիմք են ընդունել լրատվական կայքերից մեկի տեսանյութը, որում Հայկը ոտքով մի հատ ոստիկանական վահանի է հարվածում, մի հատ էլ շիշ է շպրտում, ընդամենը դա: Հայկը Ապրիլյան պատերազմին կամավորական էր գրվել, որ երկիրը պահի, բայց հիմա ինչ ա անում պետությունը, ոչ մի բան»,- ասաց Հայկի հայրը: Նա նշեց, որ Հայկը սովորում է Հայաստանի պետական Ճարտարագիտական համալսարանի վերջին կուրսում: «Դատ չի լինում, որ գոնե միջնորդություն ներկայացնենք իրեն ազատ արձակելու վերաբերյալ»,- դժգոհեց Հովհաննես Հովհաննիսյանը: Նա նկատեց նաեւ, որ անցած դատական նիստին ուրիշ տուժող ոստիկաններ էին ներկայացել, իսկ երկվա նիստին՝ ուրիշ:

Ամբաստանյալ Արման Մխիթարյանի հայրը՝ Գարեգինն էլ զարմացել է որդու «ուժերի վրա»: «Տեսանյութ կա, որ որդիս ոստիկանների ուղղությամբ քար է շպրտում: Բայց ամենահետաքրքիրն այն է, որ այդ 1 կիլոգրամանոց քարը չէր կարող 150 մետր հեռավորությունից դիպել ոստիկաններին, հետեւաբար չէր կարող որեւէ ոստիկան տուժել: Եթե կարող է նման բան լինել, ապա որդուս պետք է աշխարհի չեմպիոնի կոչում տան, ոչ թե դատեն»,- նկատեց ամբաստանյալի հայրը: Նա ասաց, որ որդին երբեք որեւէ ցույցերի չի մասնկացել: Իսկ այդ օրն էլ Խորենացի փողոցում եղել է այն ժամանակ, երբ անցնելիս տեսել է ոստիկանների ու ցուցարարների միջադեպը: Ըստ հոր խոսքերի՝ Արմանի ոտքին լուսաձայնային նռնակներից մեկն է դիպել, նա էլ վերցրել է քարն ու նետել ոստիկանների ուղղությամբ: «Բայց էլի եմ ասում, դա չէր կարող ոստիկաններին կպնել, որովհետեւ նրա եւ ոստիկանների հեռավորությունը եղել է 150 մետր: Էդ նռնակներից որդիս մի քանի այրվածքներ է ստացել՝ ականջի, ոտքի հատվածում, բայց բուժօգնությունից հրաժարվել է: Հիմա թող դատարանում փորձագետներ գան ու տեսանյութը հետազոտեն, տեսնեք՝ ոնց կարող էր նրա էդքան հեռավորության վրա շպրտած քարը կպնել ոստիկաններին, էդ ի՞նչ ուժ պետք է որդիս ունենա: Պարզապես նպատակ են դրել ջահել տղաներին լցնել բանտ», - ասաց Արմանի հայրը:

Ակնկալիքներ չունենալով դատարանից, Գարեգին Մխիթարյանը որոշել է դատից հետո ընտանիքով արտագաղթել: «Սա երկիր չէ: Չի բացառվում, որ հրաժարվենք նաեւ քաղաքացիությունից, որովհետեւ էս երկիրը երկիր չի դառնա: Մենակ պիտի Հանրապետական լինենք, որ նորմալ ապրենք, որովհետեւ սովորական մարդկանց հետ սենց են վերաբերվում»,-եզրափակեց Մխիթարյանը:

Մեղադրանքը հաստատվելու դեպքում 4 ամբաստանյալների սպառնում է երեքից ութ տարվա ազատազրկում: