«Տպարանը միանշանակ պետք է քանդվեր». տեղում 9 հարկանի հյուրանոց կկառուցվի (տեսանյութ)

Երեւան քաղաքի Հանրապետության եւ Տպագրիչների փողոցների հատման մասում երեկ ապամոնտաժված «Առաջին Տպարան»-ի շենքի տեղում կառուցվելու է 9 հարկանի հյուրանոց: Սեփականատեր Գենիկ Կարապետյանը, որը նախկինում «Ամուր երկաթ» ԲԲԸ-ի տնօրենն էր, գնել է տպարանի շենքի ողջ բաժնետոմսերն ու որոշել է հյուրանոց կառուցել:

Armtimes.com-ը շենքի ապամոնտաժման, կառուցվելիք հյուրանոցի, Երեւանի ճարտարապետական տեսքի վերաբերյալ զրուցեց Գենիկ Կարապետյանի հետ, ով վստահեցրեց, որ քանդված շենքի հարակից երկու շինությունները պատմամշակութային ժառանգություն չեն:

- Պարոն Կարապետյան, իսկ քանդված շենքի մասին ձեզ ի՞նչ են ասել, նկարագրեք շինությունը:

- Այդ շենքը, երեւի, 30 տարի չօգտագործված, քանդված, բաղդադով կառուցած շենք է եղել: Շենքը գործնականում երկհարկանի է եղել, որն օգտագործվել է տպարանի հաստոցների համար: Այսօր այդ շենքն ինչ-որ նպատակի համար անհնար էր օգտագործել: Կարելի էր միայն որպես պահեստ օգտագործել, բայց քաղաքի կենտրոնում այդ ամբողջ տարածքն այդպես անիմաստ թողնելու իմաստը, ես չեմ հասկանում:

- Տպարանը գործո՞ւմ էր:

-Չի աշխատել, այնտեղ ոչ մի բան չկար:

- Իսկ գույքը՞:

- Գույք չկար, դա սեփականաշնորհվել է մոտ 20 տարի առաջ եւ այդպես մնացել էր: Ուղղակի մենք այդ ընկերությունից, որը սեփականատերն էր, բաժնետոմսերը գնել ենք:

- Որպես անհա՞տ եք գնել:

- Այո, մենք «Աստորի ինվեստ» ՍՊԸ-ի բաժնետոմսերն ենք գնել:

- Ձեր ներդրումային ծրագիրն որքա՞ն է կազմում:

- Առանց հողի գնի, մոտավորապես 13 միլիոն ԱՄՆ դոլար:

- Երբվանի՞ց եք սկսելու շինաշխատանքները եւ ե՞րբ է ավարտվելու:

- Արդեն սկսել ենք: Նախատեսել ենք երկու տարում ավարտել, 2018 թվականի ձմռանը, որպեսզի ավարտենք:

- Հյուրանոցն ասեցիք 9 կամ 10 հարկ է ունենալու: Ի՞նչու է վիճելի հարկերի թիվը:

- Հյուրանոցը 9 հարկ է, իսկ 10-րդը կիսանկուղային հարկ է լինելու:

- Ստորգետնյա ավտոկայանատեղի չե՞ք ունենալու:

- Չէ:

- Հյուրանոցի բարձրությունը սիմետրի՞կ է հարակից շինությունների հետ:

- Հարակից բարձրահարկեր կան, մենք ցանկացել ենք, հատկապես, Հանրապետության փողոցի հետ համահունչ շինություն ստանալ: Աջ թեւը թողել ենք 5 հարկանի: Հյուրանոցը, որը լինելու է 9 հարկանի, մյուս շենքերի հետ չի խոսում: Հետնամասում կառավարության շենքերից է իր բակով: Երբ դիմացից նայում ես, սիրուն բան է ստացվում:

- Հասարակությունը քննադատում է, թե ինչո՞ւ հին շենքը քանդվեց առանց քննարկման: Ո՞րն է ձեր արձագանքը՝ որպես կառուցապատող եւ սեփականատեր:

- Մենք այս ամենը քննարկել ենք: Ես չեմ հասկանում՝ հասարակության հետ, ո՞ւմ հետ պետք է քննարկեինք: Մենք ճարտարապետների միությունում, անգամ հոկտեմբերի մեկին լսումներ է եղել: Բոլորի հետ քննարկել ենք, համաձայնեցրել ենք: Նախագծի վրա ամիսներով աշխատում են, տեսքի են բերում: Բոլորը մեզ մեղադրում են, թե այդ տարածքում ինչու եք 9 հարկանի շենք կառուցում, ոչ թե 20 հարկանի: Մենք չենք ուզեցել: Ես էլ որպես քաղաքացի, ինձ համար հաճելի չի, որ աղավաղվում է քաղաքի ընդհանուր տեսքը: Որ պետք է քանդվեր՝ միանշանակ է, իսկ շենքի հետ կապված, եթե ցանկացած լրագրող, հասարակական կազմակերպություն առաջարկ կանի, մենք սիրով պատրաստ ենք լսելու եւ հաշվի առնելու այդ բոլորը: Եթե կասեն այստեղ դուք ոչ թե 9 հարկ պետք է կառուցեք, այլ՝ 7 հարկ, մենք կկառուցենք 7 հարկ:

- Եղե՞լ է առաջարկ, որ չքանդեք շենքը:

- Չէ, չի եղել, դա հնարավոր չէր: Եղել է առաջարկ, որ քանդել կողքի շինություններն էլ, ուղղակի ես որպես մարդ չեմ համաձայնվել քանդելու: Մենք այստեղ բավականին մեծ եւ անիմաստ ծախսեր ենք անելու եւ այսքան տարածք …: Օրինակ՝ Անի հյուրանոցի կողքը դրել, 50 հարկ են կառուցել, այստեղ երբ մենք ունենք 6 հազար քմ տարածք, կարող էինք 40 հարկանի շենք կառուցել, բայց չէր նայվում: Կարող է սխալ է, վաղը կարող է լրագրողներդ ու ՀԿ-ները ասեք, որ այստեղ լինի 40 հարկանի շենք սիրուն կլինի, մենք կդարձնենք 40 հարկանի շենք:

Եղել է թյուրիմացություն, որ փոշի է բարձրացել: Բայց գտեք, ցանկացած բան անելուց ինչ-որ մի բան լինելու է: Գնացեք տեսեք, թե ինչ տեսք  ուներ այդ տարածքը 30 տարի առաջ: Ինչու ոչ մեկ չէր ասում՝ Սեւան հյուրանոցի տեղը ի՞նչ է լինելու: Երբ որ 50 տարի Դվին հյուրանոցն այդ տեսքին է: Հիմա մենք քաղաքի կենտրոնում ընդամենը 2 տարում կառուցապատում ենք եւ այդքան տարածքից ընդամենը օգտագործում ենք 2 հազարը, նման բան չեք կարող գնել: Բոլորը կասեն էդ սեփականատերը բառիս բուն իմաստով հիմար էր: Այստեղ կսարքեր 20 հարկանի շենք, կվաճառեր… ախր չի կարելի:

- Ապամոնտաժումն այլ կազմակերպությա՞ն եք պատվիրել:

- Պատվիրել եմ եւ որոշ դեպքերում, երեւի, իմ մեղքն էլ կա, բայց դա եղել է ընդամենը 15 րոպե: Ինձ ասել են, որ ԱԻՆ-ին զգուշացվել է, մի խումբ այնտեղ է եղել, ասվել է ոստիկանությանը, որպեսզի բնակչությանն ասեն մեքենաները հանեն, ամեն ինչ ազատված է: Ես չլինելով դրա մասնագետ, չեմ պատկերացրել, որ կարող է փոշի բարձրանա: Իսկ ապահովության համար ես, երբ հարցրել եմ, նրանք ասել են, որ լիցենզիա ունեցող կազմակերպություն է: Նրանք ասել են ԱԻՆ-ին, ասվել է ոստիկանությանը, ճանապարհները փակվել են, տեղյակ են պահել հարակից կազմակերպություններին: Դրանից հետո ինձ անելիք չէր մնում: Ես սխալ կլինեմ այն դեպքում, երբ հասարակության կողմից այս շենքի նախագիծը չընդունվի, գտնեն, որ դա տվյալ տեղում ճիշտ չէ: Ես այսօր պատրաստ եմ, եթե կան առաջարկներ, թող ներկայացնեն:

- Այսինքն՝ հնարավոր է ճարտարապետական տեսքը փոփոխման ենթարկվի:

- Միանշանակ: Մենք դեռ ոչ մի բան չենք կառուցել: Քանդվելը միանշանակ պետք է քանդվեր, ով ինչ ուզում է թող ասի: Հիմա խնդրում եմ եկեք, մենք ցույց տանք նախագիծը, դուք ասեք ձեր դիտողությունները, ցանկությունները, եթե դա ճիշտ կլինի, ոչ թե էժանագին բանի համար, մենք հաշվի կառնենք: