ԵՊԲՀ ռեկտոր կդառնա Արմեն Մուրադյանը. Միքայել Նարիմանյանը չի կարծում, թե իր դեմ աշխատել են

Իշխանությունները, կարծես թե, իրենց մեղավոր են զգում առողջապահության նախկին նախարար Արմեն Մուրադյանի առաջ, եւ նա շուտով նոր պաշտոն կունենա` դառնալով Երեւանի Մխիթար Հերացու անվան պետական բժշկական համալսարանի (ԵՊԲՀ) ռեկտոր:

Իհարկե, ռեկտորի պաշտոնում դե յուրե ոչ թե նշանակվում են, այլ ընտրվում մրցութային կարգով, ու հետեւաբար պետք է, որ հաղթողի անունը հայտնի լինի միայն դրանից հետո ու ոչ նախապես: Բայց այդ սկզբունքը գործում է ընդամենը թղթի վրա, իսկ իրականում բուհերի ռեկտորներին ընտրում են իշխանությունները` խորհուրդների փոխարեն: Ասել է թե` Արմեն Մուրադյանը նույնպես ռեկտոր կդառնա, ըստ էության, ոչ մրցակցային պայմաններում:

Բժշկական համալսարանում վաղը կայանալու է հոգաբարձուների խորհրդի նիստ, որտեղ քննարկվելու է Միքայել Նարիմանյանի հրաժարականի եւ նոր ռեկտորի պաշտոնակատարի հարցը: Նախկին նախարար Արմեն Մուրադյանի օգնական Տաթեւիկ Գրիգորյանը ռեկտորի պաշտոնում նրա հնարավոր նշանակման մասին մեր հարցմանն ի պատասխան միայն փոխանցեց, որ Մուրադյանը հրավիրված է ԵՊԲՀ հոգաբարձուների խորհրդի նիստին: Իսկ նույն այդ խորհրդի նախագահ Արմեն Աշոտյանը մեր թղթակցի հետ զրույցում հաստատել է, որ առողջապահության նախկին նախարար Մուրադյանը բժշկական համալսարանի ռեկտորի պաշտոնակատարի թեկնածուն է լինելու:

Ինքը` բժշկական համալսարանի դեռեւս գործող ռեկտոր Միքայել Նարիմանյանը, վստահեցնում է, որ ոչ մեկը իրեն չի պարտադրել զբաղեցրած պաշտոնից ազատվելու դիմում գրել: Պատճառաբանելով վարչական աշխատանքից հրաժարվելու իր մտադրությունը` նա ասաց. «Ինձ համար շատ կարեւոր է իմ բժշկական մասնագիտությունը, իմ գիտական գործունեությունը եւ դասավանդումը: Այս տարիների ընթացքում, ինչ ես հիմնականում զբաղվում եմ ադմինիստրատիվ աշխատանքով, բավականին արտահայտված կարոտ ունեմ այդ երեք ուղղության նկատմամբ: Դրա համար կարծում եմ, որ հնարավոր կլինի այդ կարոտը հագեցնել: Ես ձեզ հետ լրիվ անկեղծ եմ»:

Միքայել Նարիմանյանը Բժշկական համալսարանի ռեկտորի պաշտոնում վերընտրվել է ընդամենը 2015 թվականին, իսկ այսօր` այսպիսի շրջադարձ: Մեկ տարի առաջ, երբ կրկին առաջադրվում էր ռեկտորի պաշտոնում, չէ՞ր զգում բժշկի մասնագիտությամբ զբաղվելու այդ կարոտը, այն ժամանակ չունե՞ր դրան վերադառնալու մտադրություն:

«Ինչո՞ւ չունեի, ես միշտ փորձել եմ զուգորդել, բայց քանի որ գնալով ինձ մոտ ավելի մեծ ցանկություն է առաջանում... Օրինակ դասախոսություն կարդալու ժամանակ չունեմ, չնայած շատ եմ ուզում»,- պատասխանեց նա:

Բժշկական համալսարնի ռեկտորը հերքեց այն տեղեկությունները, թե պաշտոնից հրաժարումը պայմանավորված է բուհի խոշոր վարկերով: «Չէ, չէ, բացարձակ: Մենք վարկային լավ պատմություն ունենք: Եթե ձեզ հետաքրքրում է բուհի վարկային պատմությունը, մենք հրապարակել ենք ինտերնետ կայքում»:

Նկատենք նաեւ, որ վերջին ամիսներին Երեւանի պետական բժշկական համալսարանը հաճախ էր հայտնվում աղմկոտ պատմությունների կիզակետում, ու տպավորություն է, թե դա ուղղորդված բնույթ ուներ` Նարիմանյանի պաշտոնանկության համար ֆոն ստեղծելու նպատակով: Ամռանն այս բուհի ուսանողները բողոքի ձայն էին հնչեցնում, թե ավարտական քննությունների ընթացքում մեծ քանակ են կազմել անբավարար գնահատականները: Հայտարարվում էր, որ 400 շրջանավարտից դրական գնահատականի շեմը չի հաղթահարել 150-ը: Իսկ Նարիմանյանն էլ հակադարձում էր, որ խոսքը ոչ թե 150, այլ 43 ուսանողի մասին է, որն ընդամենը կազմում է 10 տոկոս ու համապատասխանում է նախորդ տարիների ցուցանիշներին:

Դրանից բացի, կալանավորվեց Բժշկական համալսարանի անվտանգությունն ապահովող աշխատակիցներից մեկը: Ազգային անվտագության ծառայությունից ավելի վաղ տեղեկացել էինք, որ նա մեղադրվում է պաշտոնական դրությունն օգտագործելով կաշառքի միջնորդության եւ գումարի դիմաց որոշ ուսանողների համար դրական գնահատական ապահովելու հարցը: Հարուցվել էր քրեական գործ: Այժմ էլ ահա իրականություն է դառնում Բժշկականի ռեկտորի պաշտոնանկությունը:

Նա, սակայն չի համարում, թե ինչ-որ մեկը շատ որոշակի աշխատում է իր դեմ: «Ես, համենայնդեպս, դա ո՛չ գիտեմ, ո՛չ զգում եմ: Անկեղծ եմ ձեզ հետ»,- ասաց նա: