Մորս արցունքները սաղիդ քթից եմ բերելու. Արարատ Խանդոյանը բռունցքով հարվածեց սեղանին. ՖՈՏՈ

Արարատ Խանդոյանը

Ռիմա Խանդոյանը

Խանդոյանն ու նրա պաշտպանը

Խանդոյանի հայտարարությունը՝ դատարանում

«Սասնա ծռեր» խմբի անդամ Արայիկ Խանդոյանի (Միայնակ գայլ) եղբորը՝ Արարատ Խանդոյանին, այսօր դատարանի դահլիճում ներկա գտնվողները ծափահարություններով դիմավորեցին:

Նա բարեւեց բոլորին, իսկ մորը հուզված տեսնելուն պես բռունցքով հարվածեց սեղանին եւ նայեց մեղադրող դատախազ Հայկ Պետրոսյանի ուղղությամբ: «Մորս արցունքները սաղիդ քթից եմ բերելու»,- դիմելով դատախազին եւ տուժողներին հայտարարեց Արարատ Խանդոյանը: Իսկ մորը՝ Ռիմա Խանդոյանին, որդին հորդորեց հանգիստ լինել եւ չհուզվել: «Եթե ստրուկ չես ուզում լինել, պետք է պայքարես: Մարդիկ ընտրել են ստրուկի ճանապարհը, ծառայում են քրեաօլիգարխիկ ռեժիմին, մենք էլ ծառայում ենք հայրենիքին»,- ասաց նա:

Արարատ Խանդոյանը եւ իր հետ ամբաստանյալի աթոռին հայտնված Արման Առաքելյանը մեղադրվում են ՊՊԾ գնդի գրավմանը հաջորդած օրերին ոստիկանների եւ քաղաքացիների միջեւ հուլիսի 20-ին Երեւան քաղաքում տեղի ունեցած զանգվածային անկարգություններին մասնակցելու եւ ոստիկանի նկատմամբ բռնություն գործադրելու մեջ:

Այս գործով տուժող է ճանաչվել 46 ոստիկան, սակայն այսօր Կենտրոն եւ Նորք-Մարաշ վարչական շրջանների ընդհանուր իրավասության դատարան էին ներկայացել 4-ը:

Նախագահող դատավոր Մնացական Մարտիրոսյանը դատավարության մասնակիցներին տեղեկացրեց, որ դատարանը դիմում է ստացել տասնյակ տուժողներից՝ նրանց նախաքննական ցուցմունքները հիմք ընդունելու վերաբերյալ: Իսկ տուժողներից 17-ը դիմում էին ներկայացրել, որ քաղաքացիական հայց չունեն: Դատավոր Մնացական Մարտիրոսյանը հետաքրքրվեց, թե տուժողներից ոմանց բացակայությամբ հնարավո՞ր է դատական նիստն անցկացնել, ինչին ի պատասխան Արարատ Խանդոյանը պատասխանեց՝ այո՝ պնդելով, որ իրենք գործով տուժողներ չեն. «Իրենք լինելով քրեաօլիգարխիկ ռեժիմի ներկայացուցիչներ, ընդհակառակը՝ խաղաղ ցուցարարների, մեր վրա ոհմակի նման հարձակվողներն են»:

Դատարանն ընդհատեց Խանդոյանի հայտարարությունը եւ նախազգուշացրեց նրան՝ դատավարության մասնակից անձանց հասցեին որեւէ վիրավորական արտահայտություն չանել, այլապես նրա նկատմամբ սանկցիա կկիրառվի: Այնուամենայնիվ, Արարատ Խանդոյանը շարունակեց. «Իրենք ոչ թե տուժող են, այլ ընդհակառակը՝ խաղաղ ցուցարարների նկատմամբ նռնակներ են կիրառել, լուսաձայնային սնարյադներ: Իրենք կիրառել են մեզ վրա՝ ժողովրդի վրա, ժողովրդի մի մասնիկն էլ ես եմ: Խաղաղ ցույցը ցրելու համար իրենք այդ գործողությունն են կատարել: Նաեւ այդ գործողությունը կատարելիս իրենք իրենց ոստիկանության աշխատակիցներին են վնասել: Սարքված տուժողներ են»:

Նրա պաշտպան Արա Ղարագյոզյանը հայտարարեց, որ տեսակցությունների արգելանքը հանելու երկու նույնաբովանդակ միջնորդություն է ցանկանում ներկայացրել Արարատ Խանդոյանի եւ Արման Առաքելյանի մասով: Պաշտպանը նշեց, որ նախաքննությունը ավարտվել է եւ նախաքննական մարմնի որոշման անհրաժեշտությունն արդեն վերացել է: Մեղադրող դատախազ Հայկ Պետրոսյանը չառարկեց միջնորդության դեմ: Չնայած սրան, դատարանը որոշեց միջնորդությունները թե՛ Խանդոյանի, թե՛ Առաքելյանի մասով ամբողջությամբ մերժել:

Արա Ղարագյոզյանը մեկ այլ միջնորդություն ներկայացրեց Արարատ Խանդոյանի նկատմամբ որպես խափանման միջոց ընտրված կալանքն այլընտրանքային խափանման միջոց գրավով փոխարինելու վերաբերյալ: Նա, մասնավորապես, նշեց, որ Խանդոյանին կալանքի տակ պահելն ապօրինի է. «Իմ պաշտպանյալին կալանքի տակ պահելու որոշումը կայացրել է Բաղրամյան 26-ը»,- նկատեց Խանդոյանի պաշտպանը:

Դատարանը մեկ ժամ անց խորհրդակցական սենյակից վերադառնալով որոշեց մերժել Խանդոյանի կալանքը գրավով փոխարինելու՝ պաշտպանի միջնորդությունը: Արա Ղարագյոզյանը նմանատիպ միջնորդություն ներկայացրեց նաեւ մյուս պաշտպանյալի՝ Արման Առաքելյանի մասով, սակայն այս միջնորդությունը եւս մերժվեց:

Դատավոր Մնացական Մարտիրոսյանի որոշումներից հետո Արա Ղարագյոզյանը հայտարարեց նրան ինքնաբացարկ հայտնելու մասին: Նա մեկ օր ժամանակ խնդրեց ինքնաբացարկի միջնորդությունը ներկայացնելու համար, սակայն դատավորը նրան 1.5 ժամ ժամանակ տվեց: Ղարագյոզյանը, սակայն 1,5 ժամ անց չներկայացավ դատարան. նա դիմում է գրել՝ նշելով, որ դատարանը բավարար ժամկետ չի տվել՝ այդպիսով խախտելով արդար դատաքննության իրավունքը:

Մեր զրույցում Խանդոյանի պաշտպանը դատավորի մերժման որոշումներն ապօրինի որակեց: «Տեսակցությունների արգելքը վերացնելու եւ գրավ կիրառելու միջնորդության մերժումը հիմք է տալիս ասելու, որ նա քաղաքական պատվեր է կատարում: Այդ իսկ պատճառով ինքնաբացարկի միջնորդություն ենք ներկայացնում: Նա հասարակության կողմից հայտնի է որպես Բաղրամյան 26-ի կողմից պատվեր կատարող դատավոր, մասնավորապես՝ Մարտի 1, Շանթ Հարությունյան եւ ընկերներ, Գեւորգ Սաֆարյան, եւ նաեւ այս գործը»,- նկատեց Արա Ղարագյոզյանը:

Մեր ճշտող հարցին, թե ինչպես է 46 ոստիկան տուժել Խանդոյանի գործողություններից, պաշտպանն ասաց, որ իրենց համար էլ դա անհասկանալի է: «Արարատի գործով 2 ոստիկան է տուժող ներգրավել, բայց սույն գործով 46-ն են»: Մեր հարցին՝ ինչ վնասվածքներ են այդ ոստիկանները ստացել, պաշտպանն ասաց՝ թեթեւ քերծվածքներ: Պաշտպանը պահանջելու է, որպեսզի բոլոր «տուժող» ոստիկանները գան դատարան եւ հարցաքննվեն:

Ըստ մեղադրական եզրակացության, Արարատ Խանդոյանը 2016 թվականի հուլիսի 20-ին զանգվածային անկարգությունների ընթացքում բռնություն է գործադրել ոստիկանության աշխատակիցների նկատմամբ` ձեռքերով եւ ոտքերով հարվածներ է հասցրել իրենց ծառայողական պարտականությունները կատարող, իշխանության ներկայացուցիչ հանդիսացող ոստիկանության աշխատակիցներին, քաշքշել եւ փորձել է խլել ոստիկանության ծառայողի վահանը: