Ինչպե՞ս չդառնալ «սենսացիոն» եղանակային ապատեղեկատվության զոհ. Գագիկ Սուրենյանի կոչը

Երեկ համացանցում երկրաշարժի վերաբերյալ սարսափազդու վերնագրերով հրապարակումներ էին տարածվել, որոնց առիթը ՀՀ ԱԻՆ «Հիդրոմետ» ծառայության օդերեւութաբանության կենտրոնի պետի տեղակալ Գագիկ Սուրենյանի ֆեյսբուքյան գրառումն էր:

Սուրենյանն ընդամենը գրել էր. «1988 թվականի դեկտեմբերի 7-ին շատ տաք է եղել, Երեւանում օդի ջերմաստիճանը հասել է +13…+15, Գյումրիում մոտ +8...+10 աստիճանի: Այս հանգամանքով է պայմանավորված այն մտավախությունը, որ երբ ձմռանն օդի ջերմաստիճանը կտրուկ բարձրանում է, մարդիկ մտածում են, որ երկրաշարժ է լինելու: Սակայն գիտական ուսումնասիրությունները ցույց են տվել, որ մթնոլորտային երեւույթները կապ չունեն երկարաբանական երեւույթների հետ, դա պարզապես, համընկել է: 1988թ.-ից հետո դեկտեմբերին շատ ավելի էական տաքացումներ են եղել, սակայն երկրաշարժ չի արձանագրվել»:

Այս առիթով Սուրենյանը մեզ հետ զրույցում ասաց. «Դա միակ դեպքը չէ, որ իմ հրապարակած ինֆորմացիան որոշ կայքեր տարածել են սարսափեցնող վերնագրերով՝ հասկանալի նպատակներով: Հաշվի առնելով վերջին շրջանում «Հիդրոմետ» ծառայության եղանակային կանխատեսումների մեծ արդարացվածության աստիճանը եւ հուսալիությունը՝ որոշ կայքեր վերցնում են իմ էջում կամ լուրջ կայքերում հրապարակված նյութերն ու այնպիսի սարսափազդու վերնագրերով տարածում ինֆորմացիան, որ ուղղակի անհավանական է:

Այդ կայքերը 10-12-ն են եւ ավելին, որոնք անվերջ ապատեղեկատվություն են տարածում համացանցում՝ հասարակությանը գցելով թյուրիմացության մեջ ու վնասելով իմ եւ «Հիդրոմետ» ծառայության հեղինակությանը: Գրում են, օրինակ. «Սպասվում է ջերմաստիճանի կտրուկ նվազում, փոթորիկ, աննախադեպ տեղումներ» եւ այլն: Այսպիսի ապատեղեկատվությունների զոհ չդառնալու համար հասարակությանը կոչ ենք անում իմ նկարով «սենսացիոն» հրապարակումներ կարդալուց եւ ինֆորմացիան տարածելուց առաջ այն ճշտել mes.am կայքից, որտեղ ամեն օր 12:30-ից մինչեւ 13:00-ն ընկած ժամանակահատվածում տեղադրվում է «Հիդրոմետ» ծառայության հինգօրյա կանխատեսումը, եւ ֆեյսբուքյան իմ էջից, որովհետեւ հեղինակավոր կայքերին իմ տված հարցազրույցները միշտ դրվում են իմ էջում»:

ամենացուրտ գիշերը

Անդրադառնալով առաջիկա 5 օրերին սպասվող եղանակային կանխատեսումներին՝ օդերեւութաբանը տեղեկացրեց, որ ներկա պահին հանրապետության տարածքում նկատվում է արկտիկական օդի բուռն ներհոսք: Այդ հոսանքները մեր երկիր են ներթափանցում Ռուսաստանի եվրոպական տարածքից:

«Օդի ջերմաստիճանն այսօր ցերեկը զգալի նվազել է: Հատկապես շատ ցուրտ է լեռնային մարզերում: Առանձին բնակավայրերում այսօր ջերմաստիճանը չբարձրացավ մինուս 10-ից»,- ընդգծեց Գագիկ Սուրենյանը:

Նրա փոխանցմամբ՝ հանրապետությունում ցուրտ օդի ներթափանցմանը զուգահեռ առկա են ուժեղ քամիներ՝ վայրկյանում մինչեւ 25 մ/վ ուժգնությամբ պոռթկումներ: Այդ քամիները, ըստ նրա՝ կպահպանվեն մինչեւ վաղը կեսօր:

«Այսօր գիշեր լինելու է ամենացուրտը: Լեռնային շրջաններում՝ հատկապես Շիրակում, Արագածոտնի, Կոտայքի, Գեղարքունիքի առանձին բնակավայրերում ջերմաստիճանը գիշերը կհասնի մինչեւ -20...-25 աստիճանի, Արարատյան դաշտում, Երեւանում՝ մինչեւ -10...-12 աստիճանի, Սյունիքի եւ Տավուշի հովտային գոտիներում՝ մինչեւ -10 աստիճանի, որը  նորմայից ցածր կլինի մոտ 5-7 աստիճանով»,- տեղեկացրեց «Հիդրոմետ» ծառայության օդերեւութաբանության կենտրոնի տեղակալը:

Չնայած սրան դեկտեմբերի 10-ից օդերեւութաբանական իրադրությունը փոխվում է. սառն օդային հոսանքները նահանջում են՝ իրենց տեղը զիջելով Թուրքիայի տարածքից մոտեցող բավականին տաք օդային հոսանքներին: Դրանով պայմանավորված դեկտեմբերի 10-12-ը ընկած ժամանակահատվածում հատկապես գիշերային ժամերին օդի ջերմաստիճանը հանրապետության ողջ տարածքում 8-10 աստիճանով աստիճանաբար բարձրանալու է: Ամսի 10-ի երեկոյան եւ 11-ին Շիրակում, Կոտայքում, Արագածոտնում, Արարատում, Արմավիրում եւ Վայոց ձորում նաեւ հնարավոր են թույլ տեղումներ՝ ձյան տեսքով:

«Եւ ընդհանրապես, ամսի 10-ից հետո արդեն պարզ երկինք չենք ունենա: Հանրապետության տարածքում անընդհատ կգերակշռի ամպամածությունը, բայց տեղումներ կգրանցվեն դեկտեմբերի 10-ի երեկոյան, 11-ին եւ 13-ին եւ միայն Շիրակում, Կոտայքում, Արագածոտնում, Արարատում, Արմավիրում եւ Վայոց ձորում: Հանրապետության մյուս կեսում՝ Լոռիում, Տավուշում, Սյունիքում եւ Արցախում առաջիկա 5 օրերին կգերակշռի առանց տեղումների եղանակ»,- տեղեկացրեց Գագիկ Սուրենյանը: