ԱԱԾ-ի տեսանյութը կիսատ է. դատավոր Իշխան Բարսեղյանին բարոյական ճնշման են ենթարկում. ֆոտո

Այսօր Շենգավիթ վարչական շրջանի ընդհանուր իրավասության դատարանում մեկնարկեց նույն դատարանի արդեն նախկին դատավոր Իշխան Բարսեղյանի կողմից կաշառք վերցնելու վերաբերյալ դատական առաջին նիստը:

Իշխան Բարսեղյանը դատարանի դահլիճ բերվեց ոստիկանների ուղեկցությամբ: Նա ողջունեց դատարանի դահլիճում գտնվող իր հարազատներին:

Դատարանում էր նաեւ մեղադրյալի աթոռին հայտնված դատավորի քեռին՝ Ժորա Սարբազյանը, որը լրագրողների հետ զրույցում պնդեց, որ Իշխան Բարսեղյանի «գլխին սարքել» են եւ որ նրա նկատմամբ քաղաքական հետապնդում է իրականացվում: «Շուտվանից ընկել են հետեւից»,- ասաց նա: Մեր ճշտող հարցին, թե ովքե՞ր են ընկել նրա ետեւից, դատավորի քեռին պատասխանեց. «Հատկապես վերեւից սկսած: Հա՛մ նախագահի մակարդակով, հա՛մ էլ Մկրտումյանի, (նկատի ունի Վճռաբեկ դատարանի նախագահ Արման Մկրտումյանին,-հեղ.) ո՞վ ա չեմ էլ ճանաչում, ինքը կերել ա, փոքրերին ծեծկել»:

Հարցին՝ ճի՞շտ է, որ դատավորը ֆինանսական խնդիրներ ունի, նա նշեց. «Եթե ինքը դրանով զբաղված է, կաշառք է վերցնում, ինչի՞ ա վարձով ապրում… Ես հարյուրից հարյուր համոզված եմ՝ սարքել են գլխին»: Ճշտող հարցին՝ այսինքն, գումար չի՞ վերցրել, Ժորա Սարբազյանը պատասխանեց. «Սարքել են գլխին, կա՛մ դեղ են տվել, կա՛մ նկարել են, ես նրա բնավորությունը լավ գիտեմ»: Նա նաեւ ասաց, որ դատավորի հայրն ու մայրը շատ վատ վիճակում են, այդ պատճառով էլ չեն եկել դատարան:

Նշենք, որ այս գործով ամբաստանյալի կարգավիճակում են դատավոր Իշխան Բարսեղյանն ու փաստաբան Էլզա Զաքարյանը: Փաստաբանը մեղադրվում է կաշառքի միջնորդության մեջ:

Դատավորի շահերը կպաշտպանի վեց փաստաբան, որոնցից Վլադիմիր Գրիգորյանը նախկին դատավոր է եւ մինչեւ նախորդ տարի աշխատում էր Էրեբունի եւ Նուբարաշեն վարչական շրջանների ընդհանուր իրավասության դատարանում:

Իշխան Բարսեղյանը ձերբակալվել է հոկտեմբերի 27-ին Գարեգին Նժդեհի փողոցի խաչմերուկի գետնանցումում քաղաքացի Նորիկ Հակոբյանից կաշառք ստանալու պահին՝ ՀՀ ԿԱ ԱԱԾ կողմից իրականացված օպերատիվ-հետախուզական միջոցառման շրջանակներում: Տեղեկացանք, որ Նորիկ Հակոբյանը սույն գործով վկա է:

Այսօրվա դատական նիստը կարճ տեւեց. նախագահող դատավոր Կարեն Մարդանյանը նախ ճշտեց երկու ամբաստանյալի՝ Իշխան Բարսեղյանի եւ Էլզա Զաքարյանի տվյալները։ Դատավոր Իշխան Բարսեղյանի ձայնը մի կերպ էր լսվում. նա ասաց, որ իր խնամքին են վատառողջ ծնողները, երեխաները, բացի դա առողջության հետ կապված խնդիր ունի եւ համապատասխան փաստաթղթերը կներկայացնի դատարանին։ Գործով մյուս ամբաստանյալ Էլզա Զաքարյանը նշեց, որ ունի բարձրագույն կրթություն, աշխատում է որպես փաստաբան, խնամքին են անչափահաս երկու երեխա:

Այս գործով մեղադրանքը պաշտպանելու համար ներգրավվել էր դատախազ Կարեն Բիշարյանը։ Իշխան Բարսեղյանի պաշտպան Վարդուհի Էլբակյանը հայտարարեց, որ գործով որպես մեղադրող ներգրավված Կարեն Բիշարյանը պատշաճ դատախազ չի կարող համարվել, քանի որ, համաձայն օրենքի, գլխավոր դատախազ Արթուր Դավթյանն էր պարտավոր ներկայանալ դատարան եւ ներկայացնել մեղադրանքի պաշտպանությունը: Ըստ նրա՝ գլխավոր դատախազն իր լիազորությունները հանձնել է մեկ այլ դատախազի, ինչի իրավունքը չուներ: Փաստաբանը հայտնեց, որ չի կարող ներկա պահին մեղադրող դատախազին բացարկ հայտնելու վերաբերյալ դիրքորոշում հայտնել, քանի որ Բիշարյանը պատշաճ մեղադրող չէ: Նախագահող դատավորն ասաց, որ որեւէ խնդիր չի տեսնում եւ արձանագրում է, որ պաշտպանները մեղադրողին բացարկի միջնորդություն չունեն։ Քանի որ գործով ամբաստանյալ Էլզա Զաքարյանը հրաժարվեց իր պաշտպանից եւ խնդրեց իրեն հանրային պաշտպան տրամադրել, դատական նիստը հետաձգվեց մինչեւ 2017թ. հունվարի 23-ը։

Դատական նիստի ավարտից հետո դատավորի պաշտպան Վարդուհի Էլբակյանից հետաքրքվեցինք, թե ինչպե՞ս է վերաբերում նրան, որ գործով նախաքննությունը տեւեց մոտ 11 օր: «Ես 17 տարվա փաստաբան եմ, եւ առաջին անգամ եմ հանդիպում դեպք, այն էլ՝ նման մեղադրանքներով (մարդը մեղադրվում է առանձնապես ծանր հանցագործության մեջ), որ 11 օրում նախաքննությունն ավարտվի»։ Նրա խոսքով՝ նախաքննության ընթացքում Իշխան Բարսեղյանը դիրքորոշում չի հայտնել մեղադրանքի վերաբերյալ, բայց մեղադրանքները չի ընդունում։

Հարցին՝ արդյոք խնդիր տեսնո՞ւմ է, որ քրեական գործը քննվում է այն դատարանում, որտեղ Իշխան Բարսեղյանը դատավոր է աշխատել, Վարդուհի Էլբակյանը պատասխանեց. «Շատ մեծ բարոյական խնդիր եմ տեսնում։ Գտնում եմ, որ սա հոգեբանական ճնշում էր Իշխան Բարսեղյանի, Իշխան Բարսեղյանի հարազատների նկատմամբ։ Տարիներ շարունակ նա այստեղ դատավոր է աշխատել»։

Էլբակյանը նկատեց, որ դատական նիստը կարող էր այլ վայրում անցկացվել կամ այլ դատարանից դատավոր գործուղվեր։ Փաստաբանն ասաց նաեւ, որ 1992թ. Իշխան Բարսեղյանն Արցախում ծանր վիրավորում է ստացել, ինչի հետեւանքները մինչ այժմ առկա են։ Անդրադառնալով ԱԱԾ-ի տարածած տեսանյութին՝ դատավորի կաշառք վերցնելու վերաբերյալ, փաստաբանն ասաց, որ անմեղության կանխավարկածի խախտման համար բողոքներն արդեն պատրաստել են, դրա վերաբերյալ պաշտպանական կողմն ավելի ուշ հայտարարություն կանի, բայց մինչեւ Մարդու իրավունքների եվրոպական դատարան բողոքարկելու են: Բացի դա նա ասաց, որ այդ տեսանյութը կիսատ է ներկայացվել. «Հաջորդ դատական նիստերին դուք կլսեք, թե ԱԱԾ-ի տարածած տեսանյութն ինչքանով էր մոնտաժված, կիսատ ու ինչքանով է համապատասխանում իրականությանը: Ոչ մեկ չի վիճարկում, որ մարդը վերցրել է, կիսատ է ու ամբողջապես ներկայացված չէ որպես ինչ է վերցրել»,- եզրափակեց Էլբակյանը:

Իշխան Բարսեղյանին մեղադրանք է առաջադրվել ՀՀ քրեական օրենսգրքի 311-րդ հոդվածի 4-րդ մասի 3-րդ կետով (կաշառք ստանալը, որը կատարվել է դատավորի կողմից՝ պատժվում է ազատազրկմամբ՝ յոթից տասներկու տարի ժամկետով):