Մահացած ծննդկան Մերի Մարգարյանի գործի անջատված մասով բժիշկներ են հարցաքննվել

Շենգավիթ վարչական շրջանի ընդհանուր իրավասության դատարանում դատավոր Դավիթ Բալայանի նախագահությամբ արդեն մի քանի ամիս է՝ շարունակվում է 2015 թվականի հուլիսի 27-ին մահացած 26-ամյա ծննդկան Մերի Մարգարյանի գործով դատավարությունը:

Հիշեցնենք, որ ծննդկան Մերի Մարգարյանը մահացել է «Էրեբունի» ԲԿ-ում: Նրա հարազատները կատարվածի մեջ մեղադրում են «Շենգավիթ» բժշկական կենտրոնի բժշկուհի Շուշանիկ Բախշյանին, որի մոտ հաշվառված է եղել եւ 35 շաբաթ հետազոտվել է 26-ամյա կինը: Գործով ամբաստանյալի աթոռին են Շուշանիկ Բախշյանն ու նույն ԲԿ-ի բժշկուհի Անի Բաբելյանը: Նրանց մեղադրանք է առաջադրվել ՀՀ ՔՕ 130-րդ հոդվածի 2-րդ մասի հատկանիշներով (Բժշկական օգնություն եւ սպասարկում իրականացնողների կողմից մասնագիտական պարտականությունները չկատարելը, որն անզգուշությամբ առաջացրել է բուժվող հիվանդի մահ՝ պատժվում է ազատազրկմամբ՝ առավելագույնը երեք տարի ժամկետով):

Դատավարության այս փուլում հարցաքննվում են թե՛ «Էրեբունի» ԲԿ-ի եւ թե՛ «Շենգավիթի» բժիշկներն ու մասնագետները: Սույն գործի վերաբերյալ մեր մի քանի հարցերին է պատասխանել տուժողի իրավահաջորդի ներկայացուցիչ Մարինե Թովմասյանը:

- Մարինե, տուժող կողմը դատավարության ընթացքն ինչպե՞ս է գնահատում:

- Տուժող կողմը դեռեւս մեկ կարծիք ունի ընթացքի վերաբերյալ, ամեն դեպքում հետազոտման փուլն է, այն, կարելի է ասել, իրականացվում է նորմալ դատավարական կարգի պահպանմամբ: Լուրջ դատավարական բացթողումներ չկան, զննում ենք, հետեւողական ենք լինում յուրաքանչյուր գործողության, յուրաքանչյուրի հայտարարությանը:

- Այս փուլում հարցաքննվում են թե՛ «Շենգավիթ» ԲԿ-ի եւ թե՛ «Էրեբունի» բժշկական կենտրոնի բժիշկները: Նրանց կողմից կարեւոր հայտարարություն եղե՞լ է, որը կարող է ազդել գործի ելքի վրա:

- Այստեղ արդեն ակնհայտ հայտարարություններ կան երկու բժշկական կենտրոնների կողմից, հակասությունները փաստաթղթային են: Մասնավորապես «Էրեբունի» ԲԿ-ի մասով  որոշ անճշտություններ կան նաեւ ժամային գրառումների վերաբերյալ, բայց դրանից անմասն չի մնացել նաեւ «Շենգավիթ» բժշկական կենտրոնը, որովհետեւ հետազոտված փաստաթղթերից իրենց մոտ էլ կան բազմաթիվ թերություններ, ոչ լիարժեք գրառումներով: Այդ մասով դեռեւս մեր տեսակետը կհայտնենք: Ամեն դեպքում, եթե ընդունենք «Էրեբունի» բժշկական կենտրոնը ժամային առումով կես ժամ այս կողմ, այն կողմ ինչ-որ գրառում է կատարել, արդյո՞ք դա ազդել է մահվան ելքի վրա, պատճառահետեւանքային կապ ունի՞ մահվան հետ, թե՝ ոչ: Բայց կարեւոր փաստ է տուժող կողմը արձանագրել, որ «Շենգավիթ» բժշկական կենտրոնի բժիշկների բժշկական գիտելիքների մասով հիմնավորումները այլ են, «Էրեբունունը»՝ այլ:

- Բայց հարցաքննություններից տպավորություն է, որ երկու բժշկական կենտրոնները այսպես ասած մեղքը մեկը մյուսի վրա են բարդում:

- Առաջին օրից դա ես նկատել եմ «Շենգավիթ» բժշկական կենտրոնի կողմից, որովհետեւ «Էրեբունու» կողմից մենք որեւէ արձագանք չենք ստացել: «Շենգավիթի» բժիշկներն ասում են՝ մի մոռացեք, որ մահը գրանցվել է «Էրեբունի» բժշկական կենտրոնում: Փորձագետները «Էրեբունու» մասով բացթողումներ չեն նկատել, միայն գրել են որոշակի փաստաթղթային թերությունների մասին, որը մահվան հետ որեւէ կապ չունի: Բայց «Շենգավիթ» ԲԿ-ն ի սկզբանե հղիին ջերմությունով չի հոսպիտալացրել, մի քանի անգամ գնացել է, չեն հոսպիտալացրել, մի անգամ էլ գնացել է, մերժում է մատյանում արձանագրվել:

- Երեկվա (նախօրեի) նիստում գործով ամբաստանյալ Շուշանիկ Բախշյանը հայտարարեց, որ Մերի Մարգարյանը գտնվել է դինամիկ հսկողության ներքո: Սա ինչպե՞ս կմեկնաբանեք:

- Ի՞նչ եք կարծում, եթե Մերի Մարգարյանը մնար դինամիկ հսկողության տակ, ծնողները կդժգոհեի՞ն: Դինամիկը այն կլիներ, երբ հղին ասեր՝ ջերմություն ունի, բժիշկը հոսպիտալացներ ու ժամը մեկ հետազոտություն իրականացներ: Ի վերջո «Շենգավիթ» ԲԿ-ին հարց տվեք՝ դուք ջերմության պատճառը պարզե՞լ եք, թե՝ ոչ, ձեր ասած՝ գրիպ չէր, ինչի՞ց էր: Փաստաթղթերը մենք հետազոտել ենք եւ թող ցույց տան՝ իրենց ասած դինամիկ հսկողությունը ի՞նչ ձեւով է արտահայտվել: Դինամիկ հսկողություն երեւի ինքը միայն վերջին օրն է համարում, որը էլի դինամիկ էլ չի եղել:

- Իսկ կա՞ն բժիշկ վկաներ, որոնք հարցաքննվել են, բայց դուք նրանց լրացուցիչ հարցաքննելու անհրաժեշտություն եք տեսնում:

- Գուցե լինի անհրաժեշտություն: Մենք ունենք գործի անջատված մաս, որով նախաքննությունը շարունակվում է, դրա համար միգուցե դատարանում չտանք մեր հարցերը, անջատված մասով այնտեղ  համապատասխան գործողություններ կատարենք: Այս պահին վաղ է:

- Անջատված մասով գործն ի՞նչ փուլում է, մեղադրյալի կարգավիճակ ունեցող բժիշկներ կա՞ն:

- Մեղադրյալ չկա: Ընդամենը ով էլ որ հարցաքննվում է, վկայի կարգավիճակում է, բայց մենք մի քանի անձանց մասով մեղադրանք առաջադրելու միջնորդություն ենք ներկայացրել, ինչի հիման վրա փորձաքննություն է նշանակվել եւ եզրակացությունը այդ մասով եկել է, ծանոթացել ենք դրանց, բայց քանի որ նախաքննություն է ընթանում, հրապարակման իրավասություն չունեմ:

- Հիմա բժիշկ վկաների հարցաքննությունից հետո ապացույցների հետազոտման ի՞նչ կարգ է դատարանը սահմանել:

- Կհարցաքննվեն երեք փորձագետները (լյարդաբան, մանկաբարձ-գինեկոլոգ, հանձնաժողովային փորձաքննության նախագահ): Հետո արդեն ամբաստանյալների հարցաքննությունը կլինի:

Նշենք, որ սույն գործով հաջորդ դատական նիստը տեղի կունենա հունվարի 17-ին: