21 պատգամավոր հեռացավ. ներկուսակցական առճակատումներ

Հունվարի 12-ին «Միացյալ ազգային շարժման» (ՄԱՇ) համամասնական ցուցակով Վրաստանի խորհրդարան անցած 27 պատգամավորից 21-ը եւ բազում այլ անդամներ հեռացան կուսակցությունից:

Ներկուսակցական առճակատումը, որը սկսվել է դեռեւս ՄԱՇ-ի իշխանության օրոք, ավելի ակտիվացավ նախորդ տարի Վրաստանում տեղի ունեցած խորհրդարանական ընտրություններին ընդառաջ: Կուսակցության համամասնական ցուցակը դուր չէր եկել Միխեիլ Սահակաշվիլիին, ինչն էլ Վրաստանի երրորդ նախագահի եւ ՄԱՇ-ի առաջնորդներից Գիգա Բոկերիայի միջեւ առճակատման հիմք էր հանդիսացել: Վրաստանյան լրատվամիջոցներում շրջանառվող տեղեկատվության համաձայն՝ Բոկերիան չի ցանկացել ընտրացուցակում ներգրավել նախկին ուժայիններին, ներառյալ ՆԳ նախկին նախարար Վանո Մերաբիշվիլիին եւ նախկին Սահմանադրական անվտանգության վարչության ղեկավար Դաթա Ախալայային, որոնց դեմ մի քանի քրեական գործ է հարուցված:

Վրաստանի խորհրդարանական ընտրությունների առաջին փուլում պարտվելուց հետո, Օդեսայի նախկին նահանգապետ Միխեիլ Սահակաշվիլին հորդորեց ՄԱՇ-ի անդամներին խորհրդարան չմտնել եւ նաեւ չմասնակցել ընտրությունների երկրորդ փուլին, սակայն կուսակցության անդամների մեծամասնությունը չհամաձայնեց Սահակաշվիլիի հետ: Այնուհետեւ Սահակաշվիլին խոսեց նաեւ փողոցային պայքարի մասին, որը նույնպես հավանության չարժանացավ Բոկերիայի եւ իր համախոհների կողմից: Սահակաշվիլին սկսեց արդեն բաց քննադատել Բոկերիայի թիմին: Հարցազրույցներից մեկում նա նույնիսկ քննադատել էր իր ղեկավարած կուսակցության աշխատանքը:

Այս ամենին հաջորդեց Թբիլիսիի նախկին քաղաքապետ Գիգի Ուգուլավայի բաց նամակը բանտից, որտեղ Ուգուլավան ասում է, որ ՄԱՇ-ը չուներ վարչապետի թեկնածու եւ հավելում, որ ընտրություններում հաղթելու դեպքում Սահակաշվիլին չէր կարող զբաղեցնել վերոնշյալ պաշտոնը: Վրաստանի մայրաքաղաքի նախկին քաղաքապետը հրաժարվում է նաեւ ՄԱՇ-ի Թբիլիսիի գրասենյակի ղեկավարի պաշտոնից: Նամակում նա պահանջում է նաեւ կուսակցության կենտրոնական եւ տարածաշրջանային խորհրդի եւ ղեկավարի ընտրություններ անցկացնել: Նշենք, որ մինչ օրս ՄԱՇ-ի ղեկավար է հանդիսանում Միխեիլ Սահակաշվիլին, որին մեղադրանք է առաջադրված Վրաստանի քրեական օրենսգրքի մի քանի կետերի հատկանիշներով (333-րդ հոդվածի 3-րդ մասի «Բ» կետ (աշխատանքային լիազորությունների չարաշահում) եւ 117-րդ հոդվածի 5-րդ մասի «է» կետ (առողջությանը մտածված վնաս հասցնել):

Կուսակցության պառակտման մասին սկսեցին բաց խոսել Ուգուլավայի ազատության մեջ հայտնվելուց հետո: Հունվարի 9-ին ՄԱՇ-ի գործադիր քարտուղար Սերգո Ռատիանին հայտարարեց, որ կուսակցության տարանջատման մասին որոշում է կայացված: Նույն օրը խորհրդարանում նա վեճի է բռնկվել Նիկա Մելիայի հետ, որը ամեն կերպ պաշտպանում է Միխեիլ Սահակաշվիլիին: Վերջինս կուսակիցներին մեղադրել է Վրաստանի նախկին վարչապետ Բիձինա Իվանիշվիլիի հետ համաձայնություն ունենալու մեջ:

Գիգի Ուգուլավան բանտից ազատ է արձակվել սույն թվականի հունվարի 6-ին: Այժմ նրա դեմ 4 քրեական գործ է հարուցված: Նա մեղադրվում է դեռ 2007-ին «Իմեդի» հեռուստաընկերության վրա հարձակման, ինչպես նաեւ քաղաքացիների խաղաղ ցույցը ցրելու մեջ: Քրեական մյուս գործերով Թբիլիսիի նախկին քաղաքապետը մեղադրվում է «Մթածմինդա» այգին ապօրինի կերպով սեփականացնելու ու «Սիթի պարկ» ընկերության օգտին որոշումներ կայացնելու մեջ, ինչի արդյունքում պետբյուջեն կորցրել է ավելի քան 1 մլն լարի: Ուգուլավան մեղադրվում է նաեւ Թբիլիսիի զարգացման հիմնադրամի բյուջեից 48 մլն լարի վատնելու մեջ:

ՄԱՇ-ի որոշ անդամներ կուսակցության պառակտման համար մեղադրում են հենց Ուգուլավային.

«Բացվեցին բանտի դռները, իսկ մինչ այդ Ուգուլավան ապակառուցողական նամակ էր հրապարակել, ինչով գլխավորեց Միացյալ ազգային շարժման պառակտումը: Կարծում եմ, որ Գիգի Ուգուլավայի նամակը սկիզբ դրեց այս ամենին»,- հայտարարել է Նուգզար Ծիկլաուրին: Իր հերթին ՄԱՇ-ի առաջնորդներից Նիկա Մելիան հայտարարել է. «Հարգում ենք նրանց կարծիքը: Գնացողը գնաց, ուղղակի անսպասելի էր եւ անհանգստացած եմ, որ առաջին իսկ ասուլիսը անցկացրին Իվանիշվիլիի (Վրաստանի նախկին վարչապետ) ոճով:

Գիգի Ուգուլավան նախ հայտարարել է, որ ամեն կերպ կփորձի պահպանել միասնությունը: Նա նույնիսկ «պատրաստ էր մեկնել Ուկրաինա եւ խոսել Սահակաշվիլիի հետ», իսկ ավելի ուշ հայտարարեց, որ ՄԱՇ-ը միայն Սահակաշվիին չի ստեղծել: Նրա խոսքերով՝ Սահակաշվիլին ինքն իր համար գլխացավանք է դարձել:

«Միխեիլ Սահակաշվիլին յուրաքանչյուրիս համար ցավալի դեպք է դարձել: Այս մարդը այլեւս չի փայլում առաջնորդի որակներով: Մենք՝ քաղաքական գործիչներս, նման ենք մեքենաների, որոնք ծառայում են ձեզ: Երբ մեքենան կորցնում է իր գործառույթը, դեռ սիրում ես այն որպես հնություն: Այդ մեքենան կարող ես դեն նետել որպես մետաղի ջարդոն»:

Այժմ Միացյալ ազգային շարժում խմբակցությունը նոր ղեկավար ունի՝ Սերգո Ռատիանին, իսկ խմբակցության անունը այժմ «Եվրոպական Վրաստան է: Այս պահին ՄԱՇ-ի անդամները վերոնշյալ խմբակցության անդամ են, նրանք խմբակցության շարքերը կլքեն իրենց դիմումների հիման վրա: «Եվրոպական Վրաստանի» անդամների խոսքերով՝ նրանց հիմնական նպատակը Բիձինա Իվանիշվիլիի ռեժիմին հաղթելն ու ապագա ծրագրեր իրականացնելն է:

Հունվարի 20-ին ՄԱՇ-ի «Սահակաշվիլիական թիմը» պատրաստվում է համագումար անցկացնել, որին կմասնակցի 7000 պատվիրակ, իսկ նրանց առաջնորդ Միխեիլ Սահակաշվիլին կմիանա հեռուստակապով: Կուսակցությունում մնացած անդամները վստահ են, որ նախկին համախոհներից բաժանվելուց «Միացյալ ազգային շարժումը» չի տուժի:

Չնայած բոլոր տարաձայնություններին, երկու կողմերն էլ ընդունում են, որ «Միացյալ ազգային շարժման» պառակտումը բխում է իշխող «Վրացական երազանքի» շահերից:

Նորայր Գասպարյան
Թբիլիսի