«Հաստատ սպանել են». Շավարշ Գալստյանի քեռին պատրաստ է ապացուցել՝ զարմիկն ինքնասպան չի եղել

Հունվարի 25-ին Տավուշի մարզի մարտական դիրքում ծնոտի շրջանում մահացու հրազենային վնասվածքով հայտնաբերված 19-ամյա զինծառայող Շավարշ Գալստյանի հարազատները շարունակում են չհավատալ ինքնասպանության վարկածին: Այսօր մեզ հետ զրույցում Շավարշի մորեղբայրը՝ Գեւորգ Կագրամանյանն ասաց, որ վաղը պատրաստվում է ՀՀ քննչական կոմիտեի Տավուշի մարզային քննչական վարչություն գնալ, զբաղվել գործով, որովհետեւ համոզված է, որ Շավարշին սպանել են:

- Վաղը պիտի գնամ, զբաղվեմ էդ հարցերով: Պիտի այսօր գնայի, ուղղակի ասացին քննիչը տեղում չի, վաղն եկեք: Եթե ես սպասեմ, թե իրենք կզանգեն, կարող է չզանգեն: Ես փորձելու եմ ապացուցել, որ էդ էրեխեն էդ բանը չէր անի:

- Պարոն Կագրամանյան, այսինքն պնդում եք, որ Շավարշն ինքնասպանություն չի գործել, ինչպես հայտարարում են իրավապահ կառույցները:

- Իսկ դուք չգիտե ՞ք, որ դա ինքնասպանություն չի: Իրեն ճանաչողները գիտեն, որ նա դա չէր անի: Եթե քննչական կոմիտեն չկարողանա մի բան պարզել, ես կպարզեմ: Ես էլ եմ հետաքրքրվում, ինձ էլ են շատ բաներ ասում, ես էլ աղբյուրներ ունեմ:

- Փորձե ՞լ եք Շավարշի ծառայակիցների, հրամանատարների հետ խոսել:

- Ես խոսել եմ, բայց իրենք ոչինչ չեն կարող ասել, ասում են՝ քննչականը զբաղվում է, ոչինչ չենք կարող ասել:

- Դուք դատաբժշկական փորձաքննությանը ներկա եղե ՞լ եք:

- Ներկա եղել եմ, բայց չկարողացա նայել: Սիրտդ չի տանում նայես: Ծնոտի տակից կրակած է, ինչ նայեմ: Ասում են քառասուն օրվա մեջ կլինի դատաբժշկականի պատասխանը, կիմանաք: Իրենք հիմա էլ ամեն ինչ գիտեն, բայց դեռ չեն կարող ասել:

- Բռնության հետքեր կայի ՞ն Շավարշի մարմնի վրա:

- Բռնության հետքեր չկային:

- Հոգեհանգստի օրը մորաքույրն ու տատը մեր թղթակցին ասել էին, որ Շավարշի ձեռքին կապտած տեղեր կային: Տեսե ՞լ եք այդ հետքերը:

- Դրանք բռնության հետքեր չէին, մատնահետք էին վերցրել, թանաքի տեղերն էին: Դեմքն ահավոր վիճակում էր, բայց չեմ կարող ասել, որ ծեծել-ջարդել են: Բայց որ հաստատ իրեն սպանել են, 100 տոկոս: Դա ես մինչեւ վերջ կարող եմ պնդել: Շավարշն էն տղեն ա եղել, որ ինձ էր բացատրում ինչն ինչոց է: Ասում էր՝ քեռի ջան, ես գալու եմ, հասնեմ քեզ: Նա 12-13 տարեկանից  աշխատել է, իր մոր կողքին է եղել հոր մահից հետո: Ինքը չի սպասել, որ քեռին օգնի, մորքուրը օգնի, հորքուրը օգնի: Միշտ աշխատել, մորը օգնել է: Նա չէր կարող  նման բան անել: Էն տղերքից չէր, որ բազար աներ, լավ տղա խաղար: 1.5 տարվա ծառայողը ո ՞նց կարող է նման բան անել: Ինչ-որ մի վիժվածք եկել է դրսից, Ղարաբաղից իրեն փոխանցել են Իջեւան, տղայա դառել, ուզեցել ա էդ էրեխուն նվաստացրած լինի:

- Դուք կոնկրետ մարդու մասի ՞ն եք խոսում: Ինչ-որ մեկի ՞ն եք կասկածում:

- Եկեք ինձ ափերից մի հանեք, խնդրում եմ: Ես շնորհակալ եմ ձեզ, խնդրում եմ ամեն ինչ արեք, ձեզնից ինչ հասնում է արեք, մեր հայ զինվորները մեղք են, մեր ջահել-ջիվան էրեխեքին կորցնում ենք: 

Հիշեցնենք, որ օրերս լրագրողների հետ զրույցում անդրադառնալով Շավարշ Գալստյանի դեպքին՝ ՀՀ պաշտպանության նախարար Վիգեն Սարգսյանն ասել էր, որ իրեն զեկուցված տվյալներով՝ զինծառայողի զորակոչի ընթացքում որեւէ կանոնի խախտում չի եղել: Բայց թե ինչպես է միակողմանի ծնողազուրկ, ընտանիքի միակ զավակ երիտասարդը զորակոչվել բանակ, նա խոստացել էր անձամբ ուսումնասիրել:

«Հետամուտ ենք լինելու գործի ընթացքին: Այս գործում շատ կարեւոր է նաեւ ՄԻՊ-ի եւ մյուս իրավապաշտպան կառույցների հետեւողականությունը: Ցավոք, ինքնասպանություններ տեղի են ունենում ինչպես Զինված ուժերում, այնպես էլ ամենատարբեր ոլորտներում»,- հավելել էր նախարարը:

Դեպքի առթիվ ՀՀ քննչական կոմիտեի զինվորական քննչական գլխավոր վարչության վեցերորդ կայազորային քննչական բաժնում հարուցվել էր քրեական գործ՝ ՀՀ քրեական օրենսգրքի 110-րդ հոդվածի 1-ին մասով (ինքնասպանության հասցնելը): Այսօր տեղեկացանք, որ ՀՀ քննչական կոմիտեում շարունակվում է զինվորին ինքնասպանության հասցնելու գործով նախաքննությունը: Կոմիտեի նախագահի խորհրդական Սոնա Տռուզյանը տեղեկացրեց, որ քրեական գործով ձեռնարկվում են ակտիվ քննչական գործողություններ՝  դեպքի բոլոր հանգամանքները պարզելու ուղղությամբ:

«Քննության շահերից ելնելով այս պահին այլ մանրամասներ հրապարակել չենք կարող, բայց առաջիկա օրերին քննության արդյունքներով կայացվող դատավարական որոշումների մասին կտրամադրենք տեղեկություններ»,- հավելեց Տռուզյանը:

Անդրադառնալով վնասվածքներին՝ ՔԿ նախագահի խորհրդականն ասաց, որ դատաբժշկակակն փորձաքննության եզրակացությունը ստանալուց անմիջապես հետո այն կհրապարակվի եւ կտրվի հարցերի պատասխանը, թե ինչ վնասվածքներ կան եւ դրանք ինչպես են առաջացել:

Մեր տեղեկություններով՝ առաջիկայում հնարավոր է Շավարշի որոշ ծառայակիցների մեղադրանքներ առաջադրվեն ինքնասպանության հասցնելու համար: Ըստ նույն տեղեկությունների՝ վերջին շրջանում եղել են զինվորին ճնշելու, հեգնելու դեպքեր: