Ինչո՞ւ են թանկացել լիցքավորման քարտերը. տերմինալների խտրականությունը բաժանորդների միջեւ

Արդեն երկու օր է՝ Երեւանի շատ խանութներում «Բիլայն» լիցքավորման քարտերը թանկացել են. 1000 դրամանոց քարտը որոշ խանութներից կարելի է ձեռք բերել 1050 դրամով: Ենթադրվում է, որ թանկացումը պայմանավորված է տերմինալներում լիցքավորման հնարավորության դադարով: Beeline-ը պաշտոնապես հայտարարել է, որ փետրվարի 16-ից դադարեցնում է Թել-Սել, Իդրամ, Իզի Փեյ ընկերությունների տերմինալների միջոցով վճարումների ընդունումը:

Ընկերությունն իր այդ որոշումը բացատրել էր վերոնշյալ ընկերությունների անհավասար միջնորդավճարային քաղաքականության դրսեւորմամբ: Բանն այն է, որ բջջային կապի դիմաց վճարային տերմինալների միջոցով կատարվող վճարումների ժամանակ մյուս օպերատորներից 1001 եւ ավելի դրամ վճարումներն ընդունվում են առանց որեւէ հավելյալ միջնորդավճարի, իսկ Beeline-ի  բջջային կապի դիմաց միջնորդավճարը չի պահվում միայն սկսած 10 000 դրամից:
«Հասկանո՞ւմ եք ինչ մեծ տարբերության մասին է խոսքը: 1001 եւ 10 հազար: Մենք պահանջով ենք հանդես եկել, որ մեր բաժանորդների համար գործեն հավասար պայմաններ, ինչ մյուս օպերատորների համար: Քանի որ չէին համաձայնել՝ մենք որոշում էինք կայացրել դադարեցնել մեր համագործակցությունը: Բայց մենք բաց ենք երկխոսության համար՝ ի շահ մեր բաժանորդների, եթե կան ինչ-որ առաջարկներ, կլսենք»,- մեզ հետ զրույցում ասաց «Բիլայն» ընկերության հասարակայնության հետ կապերի մենեջեր Նառա Նազարյանը:

Վերջինս չցանկացավ բացահայտել, թե Թել-Սել, Իդրամ, Իզի Փեյ ընկերություններն ինչպես են պատճառաբանել անհավասար միջնորդավճարի առկայությունը: Մեր հարցին, թե արդյո՞ք տերմինալներում վճարումների ընդունման դադարեցմամբ է պայմանավորված լիցքավորման քարտերի թանկացումը՝ «Բիլայն» ընկերության հասարակայնության հետ կապերի մենեջերն ասաց. «Մեկը մյուսի հետ կապ չունի»:

Նառա Նազարյանը վստահեցրեց, որ իրենք լիցքավորման քարտերը չեն թանկացրել, վաճառում են նույն գնով, ինչ մինչ այդ: «Իրենք վերահսկվում են, իրավունք չունեն գները բարձրացնել: Այսինքն՝ եթե այսօր տերմինալը չկա, 1000 դրամանոց քարտը վաճառեն 2000 դրամո՞վ: Նման բան չկա: Վերահսկողություն միշտ իրականացվում է, խնդիրը կլուծվի: Եթե թանկացնեինք՝ բաժանորդներին անպայման տեղյակ կպահեինք»,- հավելեց նա:

Նշենք, որ չի բացառվում՝ խանութների տերերը որոշել են օգտվել առիթից ու թանկացնել լիցքավորման քարտերը: Հեռախոսների լիցքավորման այլ տարբերակներ Բիլայնի կողմից առաջարկվում են բաժանորդներին (բանկում, առցանց եւ այլն), սակայն ակնհայտ է, որ լրացուցիչ անհարմարություններ են ստեղծվում: 

Թել-Սել ընկերությունից մեկնաբանություն խնդրեցինք Բիլայնի բաժանորդների նկատմամբ միջնորդավճարի խտրականության կապակցությամբ: «Ներկա պահին ձեզ չենք կարող տեղեկատվություն տրամադրել, մասնագետներն աշխատում են խնդրի ուղղման ուղղությամբ»,- պատասխանեցին մեզ:

Իդրամ ընկերության հասարակայնության հետ կապերի պատասխանատու Տաթեւ Մադաթյանն էլ ասաց. «Բիլայնի հետ կապված մեկնաբանություն այս պահի դրությամբ չունենք, որովհետեւ ընթացքում են բանակցությունները, որից հետո նոր ասելու բան կունենանք հավանաբար»: Հարցին, թե ինչո՞վ է պայմանավորված խտրական քաղաքականությունը՝ Տաթեւ Մադաթյանն այսպես պատասխանեց. «Իհարկե, նման բան չկա, որովհետեւ, եթե 3 կազմակերպության (նկատի ունի 3 տերմինալները,-հեղ.) հետ է խնդիրը, ուրեմն խնդիրը Բիլայնի հետ է: Բայց ավել բան չենք ուզում ասել, որովհետեւ քննարկման փուլում է»:

Հ.Գ.  Իզի Փեյ ընկերության հետ բանակցություններն արդեն բարեհաջող են ավարտվել: Բիլայն ընկերությունից տեղեկացնում են, որ Իզի Փեյ ընկերության տերմինալների միջոցով վճարում կատարելու հնարավորությունը վերականգնվում է:

Beeline բջջային կապի ծառայությունների դիմաց բաժանորդները կարող են վճարում կատարել հետեւյալ պայմաններով՝ 10-ից մինչեւ 50 ՀՀ դրամ վճարման դիմաց գանձվում է 0 ՀՀ դրամ, 51-ից մինչեւ 999 ՀՀ դրամ վճարման դիմաց գանձվում է 30 ՀՀ դրամ, 1.000-ից մինչեւ 70,000 ՀՀ դրամ վճարման դիմաց գանձվում է 0 ՀՀ դրամ: