ՀՀ վարչապետի Թբիլիսյան այցը. հայ-«վրացական երազանք» իրականացնողը

01/03/2017 schedule14:22

ՀՀ վարչապետ Կարեն Կարապետյանը Վրաստանի վարչապետ Գեորգի Կվիրիկաշվիլիի հրավերով երկօրյա պաշտոնական այցով Վրաստանում էր: Այցի առաջին օրը վրաց գործընկերոջ հետ հանդիպման ընթացքում կողմերը խոսել են տարբեր ոլորտներում համագործակցության հեռանկարների մասին եւ բարեկամական հարաբերությունների զարգացման պատրաստակամություն հայտնել: ՀՀ պատվիրակությանն ընդունել է նաեւ Վրաստանի նախագահ Գեորգի Մարգվելաշվիլին: Այցի երկրորդ օրը Կարապետյանը եղավ Թբիլիսիի հերոսների հրապարակում, ծաղկեպսակ դրեց անմար կրակի մոտ: ՀՀ վարչապետը նաեւ հանդիպել է համայն վրաց կաթողիկոս-պատրիարք Իլյա երկրորդին: Վրաց ուղղափառ եկեղեցու քահանա Կախաբեր Գոգոտիշվիլիի հայտարարությամբ, Իլյա երկրորդը Կարեն Կարապետյանին խնդրել է Հայաստանում վրաց եկեղեցիներին այնպիսի կարգավիճակ տալ, ինչպիսին ունեն Վրաստանում հայկական եկեղեցիները:

2011 թվականի հուլիսի 11-ին կայացած արտահերթ նիստում Վրաստանի խորհրդարանը փոփոխություններ է մտցրել երկրի Քաղաքացիական օրենսգրքում, որի համաձայն` հինգ կրոնական կազմակերպությունների, այդ թվում` Հայ առաքելական եկեղեցուն, Հռոմի կաթոլիկ եկեղեցուն, մուսուլմանական համայնքին, հրեական համայնքին եւ Բապտիստական եկեղեցուն տրվել է իրավաբանական անձի կարգավիճակ:

Նույն թվականին տեղի է ունեցել Ամենայն հայոց կաթողիկոս Գարեգին Բ-ի միջեկեղեցական եւ հովվապետական այցը Վրաստան, որի շրջանակներում, հունիսի 11-ին, վերջինս հանդիպել է Վրաց ուղղափառ եկեղեցու կաթողիկոս-պատրիարք Իլյա երկրորդին: Հանդիպումից հետո Վրաց պատրիարքարանում հոգեւոր առաջնորդները ամփոփել են իրենց հանդիպումների արդյունքները: Այդ ժամանակ, Գարեգին Բ-ն բարձրացրել է Վիրահայոց թեմի երկու խնդիրներ` Վրաստանում հայկական եկեղեցու իրավաբանական անձի կարգավիճակի եւ Վրաստանի հայկական եկեղեցիների պահպանության ու դրանք Վիրահայոց թեմին վերադարձնելու հարցերը: Մինչ այդ նույն հարցերի շուրջ Գարեգին Բ-ն նաեւ խոսել է Վրաստանի երրորդ նախագահ Միխեիլ Սահակաշվիլիի հետ:

Վրաստանում հայկական եկեղեցիների իրավաբանական անձի կարգավիճակի վերաբերյալ Միխեիլ Սահակաշվիլին հայտարարել է, որ ինչպիսի կարգավիճակ կունենա վրաց ուղղափառ եկեղեցին Հայաստանում, նույն կարգավիճակն էլ կտրվի Վրաստանում հայկական եկեղեցուն: Նույն հայտարարությունն է արել նաեւ վրաց կաթողիկոս-պատրիարքը: Վրաստանի հայկական եկեղեցիների պահպանությանն ու դրանք Վիրահայոց թեմին վերադարձնելու հարցին անդրադառնալով, Ամենայն հայոց կաթողիկոսը հայտարարել էր, որ թե՛ Վրաստանի նախագահի, եւ թե՛ վրաց կաթողիկոս-պատրիարքի հետ հանդիպումները իրեն հուսադրել են, որ շուտափույթ կլուծվեն բարձրացված հարցերը: Իլյա երկրորդը իր հերթին նշել է, որ պահանջներն այս դեպքում երկկողմանի են. «Եկեղեցիների մասին խոսելիս, չպետք է մոռանալ, որ երկու կողմերն էլ պահանջներ ունեն: Երկու կողմերն էլ ունեն փաստեր, փաստաթղթեր. որ Վրաստանում գոյություն ունեն հայկական, իսկ Հայաստանում` վրացական եկեղեցիներ»,-  Իլյա երկրորդի խոսքերն է մեջբերում «Ազատություն» ռադիոկայանը:

Խոսքը վերաբերում է Հայաստանի հյուսիսում, մասնավորապես Լոռու մարզում գտնվող քաղկեդոնական 5 վանքերին ու տաճարներին, որոնց մասին պնդումներ կան, թե վրացական են: Դրանց մեջ են նաեւ Ախթալայի եւ Քոբայրի միջնադարյան պատմական հուշարձանները, որոնք կառուցվել են վրացական թագավորական արքունիքի ներկայացուցիչների կողմից: Հայկական կողմը պնդում է, թե դա չի նշանակում, որ այդ տաճարներն ու վանքերը վրացական են:  Վիրահայոց թեմը, իր հերթին, Վրաստանում 442 եկեղեցու հավակնություն ունի: 2013 թվականին թեմը 442 եկեղեցիների անվանացանկ է ներկայացրել Վրաստանի կառավարությանը, որտեղից պահանջել են այդ եկեղեցիների հայկական լինելու փաստի ապացույցներ: Այնուհետեւ հիմնվել է Վրաստանում հայկական պատմամշակութային ժառանգության ուսումնասիրության կենտրոն, որը պատրաստել է 57 եկեղեցու ամբողջական փաթեթ եւ դրանցից 20-ը ուղարկել կառավարություն:

Վերադառնալով Կարեն Կարապետյանի` Վրաստան այցին, հարկ է նշել, որ ՀՀ վարչապետը երկօրյա պաշտոնական այցի շրջանակներում այցելեց Թբիլիսում գործող երկու հայ եկեղեցիներ` սուրբ Գեւորգ եւ սուրբ Էջմիածին: Կարեն Կարապետյանը այցի ընթացքում լրագրողների հետ խոսեց միայն սուրբ Էջմիածին եկեղեցու բակում, որտեղ պատասխանելով «Ալիք մեդիայի» լրագրողի հարցին` քանի՞ տոկոսով է կատարված համարում իր առջեւ դրված խնդիրները, ասաց. «Ինչ ծրագիր դրել եմ, կատարել եմ. այս առումով 100 տոկոս, բավարարված եմ այցով, թե չէ` այո, անելիք էլի ունե՞մ` լիքը»:

ՀՀ վարչապետին դիմավորեց Վիրահայոց թեմի առաջնորդ Վազգեն եպիսկոպոս Միրզախանյանը: Վերջինս վարչապետի մեջ տեսնում է այն մարդուն, «որի մեջ կա այն ամենը, ինչ մենք երազում ենք». «Ողջունեցինք իր գործունեությունը Հայաստանում եւ նաեւ այցը` Վրաստան: Վարչապետը տիրապետում է ամեն ինչին, եւ ես լիահույս եմ, որ նա այդ ամենին լուծումներ կտա: Մեծապես ուզում եմ փոխանցել` տպավորված եմ վարչապետ պարոն Կարապետյանով: Նրա մեջ կա այն, ինչ մենք ցանկանում եւ երազում ենք: Ինքը այն մարդն է, որը իր տեսիլքների, բայց մեր բոլորիս երազանքների իրականացնողն է»,- հայտարարել է Վիրահայոց թեմի առաջնորդը:

Կարեն Կարապետյանի գլխավորած պատվիրակությունը այցի ավարտին այցելեց նաեւ Թբիլիսիի` Պետրոս Ադամյանի պետական դրամատիկական թատրոն: Այցելությունը պաշտոնական օրակարգում նշված չէր, ինչպես նաեւ նշված չէր համայն վրաց կաթիղիկոս-պատրիարքի հետ հանդիպումը:  Թատրոնի տնօրեն Արմեն Բայանդուրյանը վարչապետի թիմը համեմատեց «Արարատ 73»-ի հետ: «Հայ-«Վրացական երազանք» իրականացնող» Կարապետյանը թատրոնից ուղեւորվեց օդանավակայան, որտեղից նրան ճանապարհել է Գեորգի Կվիրիկաշվիլին:

Նորայր Գասպարյան
Թբիլիսի

Տպել
2480 դիտում

Տեսախցիկով օդապարիկը հեռակառավարվող խաղալիք է, որը կարելի է գնել խանութներում. ԱԱԾ

Էլթոն Ջոնն ու նախագահը մասնակցել են առողջական խնդիրներով երեխաների միջոցառմանը (լուսանկար)

Երեւանում բախվել են միանգամից 5 մեքենաներ, 3 մարդ տեղափոխվել է հիվանդանոց

ՀՀԿ-ի էլիտան այս տարի անտեսել է Սոգյութլուի հերոսամարտի 100-ամյա տարեդարձը

Վերեւի հարկից ջրալցվել է Երևանի Քաջազնունու փողոցի անձնագրային բաժանմունքը

Թուրքիան էլեկտրամագնիսական հրանոթներ արտադրող սակավաթիվ երկրներից է

Հայոց եկեղեցին եւ հոգեւորականը պետք է լինի հայրենյաց պաշտպանների կողքին. Գարեգին Բ

Մշակույթի նախարար Լիլիթ Մակունցը նոր ֆլեշմոբի շրջանակներում օնլայն հեքիաթ է կարդում

Թուրքիայից Հայաստան է անցել տեսախցիկներով սարքավորված օդապարիկ, ընկել Նոր Ամասիա գյուղում

Էլթոն Ջոնը այսօր Երեւանում մասնակցելու է Starkey ընկերության բարեգործական միջոցառմանը

Հույս ունեմ կարմիր լույսի տակ չկանգնող պաշտոնյաների մոտ ընդամենը թյուրըմբռնում է. վարչապետ

Ունեցանք հեղափոխություն՝ հայկական ձեւով. Ա. Սարգսյանը հանդիպել է վիրահայոց համայնքի հետ

Փակ է Գյումրի-Երեւան ճանապարհը. պահանջը՝ վերադարձնել «Շիրակ» ֆուտբոլային թիմի 12 միավորը

Երեւանում կրակոցներ են հնչել, այնուհետ դանակահարված 3 երիտասարդ հայտնվել է հիվանդանոցում

«UWC Դիլիջան» միջազգային դպրոցը կարող է լինել ոգեշնչանքի, լավատեսության կենտրոն. Փաշինյան

Ամենայն Հայոց Կաթողիկոսն ընդունեց Արգենտինայից ժամանած ուխտավորների

Լոռու մարզի դատախազները բացատրական աշխատանք են տանում դպրոցներում, անչափահասների շրջանում

Վթարվել են Տաշիրի ոստիկանության ծառայողները. ջոկի հրամանատարը մահացել է, 3 վիրավոր կա

Զորամասի ննջարանում հայտնաբերվել է կապիտանի դին՝ կրծքավանդակի շրջանում ստացած վիրավորումով

Հայաստանին կմոտենա նոր ակտիվ ցիկլոն, 3 օր շարունակ մարզերում անձրեւ ու կարկուտ է սպասվում