Ինչու է ծնվել չորս աչք ու երկու դունչ ունեցող հորթ. հնարավոր պատճառները տարբեր են

Արագածոտնի մարզի Քուչակ գյուղում փետրվարի 28-ին երկգլխանի հորթ է ծնվել: Ավելի ճիշտ, ինչպես նկարագրեց համայնքի ղեկավար Հովիկ Ամիրյանը, կենդանին ունեցել է մեկ գլուխ, երկու դունչ, չորս աչք եւ երկու ականջ:

Ընդամենը մի քանի ժամ ապրելուց հետո հորթը սատկել է: «Մարդկային կյանքում էլ են նման բաներ լինում: Նույն կենդանական աշխարհն է, ինչ տարբերություն: Հանրապետությունում անասնաբուժական ծառայություն ունենք, իրենք պետք է ուսումնասիրություն անեն, պատճառը պարզեն, որ եթե ինչ-որ խնդիր կա, նման դեպքերը չկրկնվեն»,- մեր զրույցում ասաց Հովիկ Ամիրյանը: Չբացառեց, որ անոմալ հորթի ծնունդը կարող է բացասական ազդեցություն ունենալ կովի տիրոջ ընտանիքի սոցիալական վիճակի վրա: «Գյուղացին անասունը պահում է, որ եկամուտ ստանա: Բայց փառք Աստծո, որ այդ դժբախտությունը կենդանական աշխարհում է, ոչ թե մարդու կյանքում»,- նկատեց նա:

Հայաստանի ազգային ագրարային համալսարանի գյուղատնտեսական կենդանիների մորֆոլոգիայի, ֆիզիոլոգիայի եւ ախտաբանական անատոմիայի ամբիոնի վարիչ Նշան Գրիգորյանը, խոսելով այս երեւույթի պատճառների մասին, ասաց. «Նախ, դա կոչվում է անոմալիա: Կարող է լինել կենդանու հղիության ժամանակ հարված ստանալուց եւ կերից: Այսինքն` հնարավոր է հղիության ընթացքում պտուղը կիսվել է, բայց կենդանիները մեկը մյուսին հարվածելու պատճառով այդ կիսումը մինչեւ վերջ տեղի չի ունեցել ու մինչեւ վերջ չի զարգացել երկու առանձին պտուղ: Ողնաշարը որ բացեն, կարող է երկու ողնաշար լինի, բայց մեկ սիրտ: Քանի որ արգանդը շատ արտաքին դիրք է ընկած, թեթեւակի հարվածը կհասնի արգանդին, որի մեջ էլ պտուղն է: Այդ անոմալիան կարող էր լինել նաեւ թերի խնամքի պատճառով: Խնամքը եթե լրիվ նորմալ լիներ, կիսումը լավ կընթանար»,- ասաց ամբիոնի վարիչը:

Ինչ վերաբերում է կովերի կերի պատճառով անոմալ հորթ ծնվելու հավանականությանը, Նշան Գրիգորյանից հետաքրքրվեցինք, դրան որքանո՞վ  կարող է նպաստել շրջակա միջավայրի աղտոտվածությունը: «Կերը որտեղի՞ց է, արտաքին միջավայրից, չէ՞: Երբ ասացի խնամքի մասին` նկատի ունեի, որ հնարավոր է լավ կեր չեն տվել, խոտը այնպիսի տեղերից են քաղել, որ միկրոէլեմենտները կամ շատ են, կամ պակաս: Դա էլ է նպաստում: Անոմալ ծնունդը կարող է լինել նաեւ, եթե կենդանին որոշակի հիվանդություններ է տարել, օրինակ բրուցելոզ, որն արգանդի հետ կապված հիվանդություն է: Դրա միկրոբների սիրած վայրն ընկերքն է»,- պատասխանեց պրոֆեսորը:

Նա կարծիք հայտնեց, որ գյուղատնտեսության ոլորտում անոմալ ծնունդների քանակը շատանում է. «Կասեի, որ արդեն հաճախակի է պատահում: Պատճառը հատկապես արտաքին միջավայրի եւ սննդանյութի հետ է կապված: Արտաքին միջավայրից ամեն ինչն անցնում է հողի մեջ, հողից էլ բույսերին»:

Ի դեպ, ագրարային համալսարանում գործում է գիտաուսումնական թանգարան, որտեղ կա ավելի քան 2 հազար ցուցանմուշ: «Ցուցադրված են կենդանատեսակների ներքին օրգաններ, կմախքներ եւ խրտվիլակներ: Դրանց հետ մեկտեղ ախտահարված օրգաններ կան թանգարանում, ինչպես նաեւ անոմալիաները»,- ասաց ամբիոնի վարիչը:

Քուչակում ծնված անոմալ հորթի խրտվիլակը, սակայն, Ագրարային համալսարանի թանգարանում տեղ չի գնի, թեպետ այստեղ հոժարությամբ կընդունեին չորսաչքանի կենդանու մարմինն ու համապատասխան մշակման կենթարկեին: Նշան Գրիգորյանը տեղեկացրեց, որ եթե նմանատիպ նմուշներ առաջարկվում են, իրենք չեն հրաժարվում, բայց դրանք ձեռք բերելու համար չեն համագործակցում պատկան մարմինների հետ, որովհետեւ այդ դեպքում իրենց առաջարկվում է գնել ապագա ցուցանմուշները, ինչի հնարավորությունը չունեն: Թանգարանը, նրա տեղեկացմամբ, երկար տարիների ընթացքում համալրվել է ուսանողների եւ աշխատակցների նվիրատվությունների ու ձեռբերումների շնորհիվ:

Դառնալով Արագածոտնի մարզի Քուչակ գյուղում ծնված անոմալ հորթին, նշենք, որ ինչպես տեղեկացրեց ՀՀ գյուղատնտեսության նախարարության աշխատակազմի անասնաբուծության, անասնաբուժության վարչության պետ Լեւոն Տեր-Իսահակյանը, դա այդ տարածաշրջանում եզակի դեպք է: Իսկ թե առհասարակ Հայաստանում գյուղատնտեսական կենդանիների շրջանում որքան հաճախ են գրանցվում այդպիսի անոմալ երեւույթներ եւ ինչպիսի միտում է արձանագրվում, Տեր-Իսահակյանն ասաց, որ նման հաշվառում չի իրականացվում:

«Դրանք օրինաչափական բնույթ չեն կրոմ, եզակի դեպքեր են, որոնք կարող են պատահել բնության մեջ` պայմանավորված կենսաբանական տարբեր գործոններով: Եթե միջազգային պրակտիկան ուսումնասիրեք, այնտեղ պարզ երեւում է, որ սա հիմնականում լինում է մոտ ազգակցական բուծման արդյունք: Զարգացման դեգեներատիվ պրոցես է տեղի ունենում, ասենք եթե երկվորյակ պետք է ծնվի,սխալ զարգացման պարագայում աննորմալ պրոցես է լինում բջիջների վրա` բջջի կիսման եւ այլն, ու այս դեպքերն են ի հայտ գալիս: Եվ որպես կանոն, ստացվում է ոչ կենսունակ սերունդ: Արտաքին միջավայրը եւս իր ազդեցությունը կարող է թողնել, միանշանակ»,- ասաց գյուղնախարարության պաշտոնյան: