Արա Պողոսյանը՝ բասկետբոլի հավաքականի նոր մարզչի եւ «Ուրարտուի» ապագայի մասին

Հայաստանի բասկետբոլի ազգային հավաքականի նորանշանակ գլխավոր մարզիչ Նիկշա Բավցեւիչն արդեն աշխատում է հավաքականի կազմն ընտրելու ուղղությամբ: Այս մասին armtimes.com-ի հետ զրույցում հայտնեց Հայաստանի բասկետբոլի ֆեդերացիայի փոխնախագահ Արա Պողոսյանը: Խորվաթ մասնագետն ուսումնասիրում է հայազգի այն բասկետբոլիստների ելույթները, որոնք շուտով կարող են համալրել թիմը:

«Ազգային հավաքականն ուժեղանալու է: Նոր խաղացողներ են լինելու, կազմը, երեւի, կիսով չափ կփոխվի: Ունենք հայազգի խաղացողների ցուցակ, որը տրամադրել ենք, մարզչին: Որոշ ժամանակ անց նա կընտրի նրանց, ովքեր կընդգրկվեն հավաքականում, եւ մենք կհրապարակենք անունները»,- ասաց Պողոսյանը:

Բավցեւիչը բավական փորձառու մասնագետ է: Աշխատել է եվրոպական մի շարք ակումբներում: 2015 թվականից մարզում է շվեյցարական առաջատար թիմերից մեկը՝ «Մոնտեյը», որի հետ վերջերս դարձել է երկրի գավաթակիր: Արա Պողոսյանը վստահ է, որ նա կարող է օգնել թիմին բարձր արդյունքներ գրանցել:

«Նա ունի ոչ աստղային թիմերին մարտունակ թիմ դարձնելու ունակություն: Դա մեզ համար շատ կարեւոր է, որովհետեւ մենք մրցելու ենք այնպիսի թիմերի դեմ, որոնց կազմերում մեծ թվով աստղեր կան: Բացի այդ՝ նա ունի հայազգի խաղացողներին համապատասխան մենթալիտետ, բալկանյան դպրոցի մարզիչ է եւ հասկանում է մեր մեթալիտետը: Մեզ հենց այսպիսի մարզիչ էր պետք»,- ասաց նա:

Արդեն նախկին գլխավոր մարզիչ Տիգրան Գյոկչյանի հեռանալուց հետո ֆեդերացիան 5 թեկնածու է ունեցել եւ մինչեւ Բավցեւիչին հրավիրելը փորձել է համաձայնության գալ NBA-ում հանդես եկող «Տորոնտո Ռեփթըրզի» գլխավոր մարզչի օգնականներից մեկի՝ Ռեքս Կալամյանին հետ: Նա տվել է իր համաձայնությունը, սակայն NBA-ը թույլ չի տվել ընդունել առաջարկը: Ինչպես նշում է Պողոսյանը, Կալամյանն ամեն դեպքում համագործակցելու է ՀՀ հավաքականի հետ եւ հնարավորության սահմաններում օգնելու է կազմակերպչական ու մարզչական հարցերով: Մյուս 4 թեկնածուներից ֆեդերացիան ընտրել է ամենափորձառուին:

Ամռանը Բավցեւիչի գլխավորությամբ ՀՀ հավաքականն իր ելույթներն է սկսելու աշխարհի 2019 թվականի առաջնության ընտրական փուլում: Մինչեւ այդ՝ հուլիսին, ուսումնամարզական հավաք է տեղի ունենալու Երեւանում: Դրա շրջանակներում նախկին «Միկա» մարզահամալիրում ընկերական մրցաշար է անցկացվելու, որին, բացի Հայաստանից, մասնակցելու են եվրոպական 3 ընտրանիներ:

«Գալու են Շվեյցարիայի եւ Ալբանիայի հավաքականները: 3-րդ թիմը կորոշվի մոտակա ժամանակներս: Հնարավոր է՝ Բուլղարիան գա, հնարավոր է՝ Իրանը, դեռ որոշված չէ: Կաշխատենք, որ հեռուստատեսությամբ էլ ցուցադրվի»,- ասաց նա՝ ավելացնելով, որ բանակցություններ կան նաեւ Վրաստանի հետ, եւ հնարավոր է՝ այդ թիմի հետ խաղան ոչ թե մրցաշարի շրջանակներում, այլ հետագայում պարզապես ընկերական խաղ լինի:

Ինչ վերաբերում է հավաքականի նախկին գլխավոր մարզիչ Տիգրան Գյոկչյանին, ապա նա հեռացել է երկկողմանի համաձայնության արդյունքում: Արա Պողոսյանը նշում է, որ նա պետք է թիմ գտներ աշխատելու համար. չէր կարող զբաղվել հավաքականի մարզումներով եւ միաժամանակ թիմ որոնել:

Գյոկչյանը մարզում էր նաեւ հայկական «Ուրարտու» բասկետբոլային ակումբը: Այստեղ էլ դեռ հայտնի չէ՝ շարունակելու է աշխատել, թե՝ ոչ, քանի որ դեռ հայտնի չէ նաեւ թիմի ճակատագիրը: «Ուրարտուն» ռուսական ВТБ լիգայում հանդես գալու հայտ է ներկայացրել, սակայն դեռ պարզ չէ, արդյոք կկարողանա մասնակցել:

««Ուրարտուն» դեռ պարզ չէ՝ լինելու է, թե՝ չի լինելու: Քայլեր անում ենք, որ շարունակենք խաղալ: Հայտ ենք ներկայացրել ВТБ լիգայում խաղալու համար, հայտն ընդունվել է, հիմա մեզնից է կախված. պետք է համապատասխան ֆինանսական միջոցներ ունենանք, որ մասնակցենք: Այսպես ասեմ՝ 50/50 է: Հայտը կհաստատենք միայն այն դեպքում, երբ 100% վստահ լինենք, որ կարող ենք մարտունակ թիմ ստեղծել: Դրանից հետո էլ կարող ենք քննարկել՝ մարզիչը Գյոկչյանն է լինելու, թե՝ ոչ»,- ասաց Պողոսյանը:

Այն, թե արդյոք ակումբը հանդես կգա ВТБ-ում, թե՝ ոչ, հայտնի կդառնա մայիսի սկզբին: Այդտեղ խաղալու համար թիմը պետք է համապատասխան մարզադահլիճ եւ ֆինանսական միջոցներ ունենա: Այս շրջանում ակումբի ղեկավարությունը փորձում է կապեր հաստատել Հայաստանում եւ արտասահմանում գործող հայկական կազմակերպությունների հետ, որոնք կարող են հովանավորել «Ուրարտուն»: Բացասական պատասխան չի եղել, բայց դրական էլ դեռ չկա:

Ապրիլին «Ուրարտուն» պատրաստվում էր ընկերական մրցաշար անցկացնել: Ղեկավարությունն արդեն մի քանի ակումբներ Ղազախստանից, Բելառուսից եւ Ռուսաստանից հրավիրել էր եւ սպասում էր պատասխանի, սակայն մրցաշարը, ըստ Արա Պողոսյանը, ամենայն հավանականությամբ չի կայանա: