Արսինե Խանջյանը, Նիկոլ Փաշինյանը, Էդմոն Մարուքյանը՝ Հաց բերողի հոգեհանգստին

19:10 Համախմբում կուսակցության նախագահ, «ՕՐՕ» դաշինքի ցուցակով պատգամավորության թեկնածու Վարդան Օսկանյանը նույնպես լրագրողների հետ զրույցում անդրադարձավ Արթուր Սարգսյանին կալանավորելու որոշմանը: «Նման որոշումները նույնիսկ քննիչների մակարդակով չի կայացվում, գնում է դեպի վերեւ, զանգում են, հարցնում են՝ անենք, թե՝ չէ»,- ասաց Վարդան Օսկանյանը՝ նշելով, որ վերջնական որոշում կայացնողն է մեղավոր, սակայն չգիտի, թե նման քաղաքական որոշում ով է կայացրել:

18:40 «Ելք» դաշինքի անդամները՝ Էդմոն Մարուքյանի, Նիկոլ Փաշինյանի, Սասուն Միքայելյանի, Արամ Սարգսյանի գլխավորությամբ, նույնպես մասնակցեցին հոգեհանգստի արարողությանը, որից հետո լրագրողների հետ զրույցում Նիկոլ Փաշինյանն ասաց, որ հանրությունը պետք է Արթուր Սարգսյանի մահվան վերաբերյալ բոլոր հարցերի պատասխանը ստանա: 

Էդմոն Մարուքյանի խոսքով էլ՝ մինչեւ բժիշկներին հասնելը կա կալանավորման միջնորդություն ներկայացրած քննիչ եւ այդ միջնորդությունը բավարարած դատավոր: «Մենք մեր ասուլիսում էլ արդարադատության նախարար չենք ասում, մենք ասում ենք՝ գլխավոր դատախազ, մենք ասում ենք քննիչ, քննչական մարմնի ղեկավար, դատավոր, որը բավարարել է խափանման միջոցը կալանք ընտրելն այդ առողջական պայմաններում»,- նկատեց Մարուքյանը: Նիկոլ Փաշինյանը, սակայն, մեղադրեց արդարադատության նախարարությանն այն բանի մեջ, որ պատգամավորները հնարավորություն չեն ունեցել անարգել հասնել Արթուր Սարգսյանի խուց եւ տեսակցել նրան:

18:27 Սգո սրահի տարածք եկավ նաեւ կանադահայ դերասան Արսինե Խանջյանը: Լրագրողների հետ ճեպազրույցում նա ասաց, որ Արթուր Սարգսյանի հոգեհանգստին մասնակցելու նպատակով է Երեւան եկել: «Երեկ գիշերն եմ հասել Երեւան եւ բնական է, որ այսօր պիտի այստեղ գտնվեի»,- ասաց Արսինե Խանջյանը՝ նշելով, որ Արթուր Սարգսյանի հետ կատարվածը մարդու իրավունքների ակնհայտ խախտման հետեւանք է, որը մահվան հանգեցրեց: Նրա խոսքով՝ հասարակության պայքարը պետք է լինի այնպիսին, որ ամեն մարդ իր կամքով երկրի նկատմամբ իր արդար պահանջը ներկայացնի, որը սովորեցրեց Արթուր Սարգսյանը:

18:20 Կարգը մատուցելուց հետո հոգեւորականն ասաց, որ Արթուրի տեսակն այն տեսակն է, որ ամեն քայլափոխի չի հանդիպում: «Այս տեսակը մեզ շատ է պետք, ոչ թե միայն այն իմաստով, որ այն քայլը կատարեն, որ Արթուրը կատարեց, օգնելու մարդկանց…, կարծում եմ բոլորս միմյանց մասին հոգ տանելու առումով պարտավոր ենք»,- ասաց նա:

18:00 Երեւան քաղաքի Լուկաշին փողոցում տեղակայված սգո սրահներից մեկում այժմ ընթանում է Հաց բերող Արթուր Սարգսյանի հոգեհանգստի կարգի մատուցման արարողությունը: Սրահում Արթուրի աճյունի կողքին կանգնած են նրա հարազատները, «Սասնա ծռեր» քաղաքական շարժման անդամ Ալեք Ենիգոմշյանը: Հոգեւորականի մասնակցությամբ այժմ մատուցվում է հոգեհանգստի կարգը:

Ուղիղ միացումն ԱՅՍՏԵՂ:

Արթուր Սարգսյանը մահացել է մարտի 16-ին՝ «Արմենիա» բժշկական կենտրոնում: Արթուր Սարգսյանը տառապում էր «Բեխտերեւի» հիվանդությամբ (այս հիվանդությունը ներառված է պատժի կրման հետ անհամատեղելի հիվանդությունների ցանկում (Կառավարության 2006թ. 825-Ն որոշմամբ), ուներ որովայնային գծային ճողվածք, ողնաշարի խնդիր: Նա երկրորդ կարգի զինվորական հաշմանդամ էր։ Կալանքի տակ գտնվելու ընթացքում Արթուր Սարգսյանի մոտ ախտորոշվել էր ստամոքսի եւ կերակրափողի էրոզիաներ եւ կերակրափողի ճաք, որը օրեր շարունակ արնահոսել էր: Արթուր Սարգսյանը կալանավորվել էր 2016-ի հուլիսին, ազատ էր արձակվել դեկտեմբերի 31-ին, քանի որ ազատազրկման հետ անհամատեղելի հիվանդություն ուներ: Փետրվարի 9-ին, սակայն նա կրկին կալանավորվել էր եւ որպես բողոքի նշան հացադուլ սկսել: Մարտի 6-ին, մեծ ջանքերի, բանակցությունների արդյունքում մի քանի տասնյակ պատգամավորների երաշխավորությամբ Արթուր Սարգսյանը կրկին ազատ էր արձակվել ու անմիջապես տեղափոխվել հիվանդանոց: Որոշակի չափով կազդուրվելուց հետո Սարգսյանը դուրս էր գրվել: Նրա ինքնազգացողությունը կրկին վատացել էր եւ տեղափոխել էին հիվանդանոց, որտեղ եւ մահացել է: Արթուր Սարգսյանը 49 տարեկան էր, մասնագիտությամբ քանդակագործ, փայտի փորագրող: