Զանգողների հարցով ՀՀԿ անդամը կզբաղվի ընտրություններից հետո

Ազգային ժողովի ընտրություններից առաջ հայաստանյան ավելի քան հարյուր դպրոցների ու մանկապարտեզների տնօրենների կողմից ընտրողների ցուցակներ կազմելու մասին հավաստող սկանդալային ձայնագրությունների մեջ, որոնք հրապարակել է «Իրազեկ քաղաքացիների միավորում» հասարակական կազմակերպությունը, առանձնանում է մեկը:

Այն առումով, որ այդ ցուցակների առկայության մասին վկայում է նաեւ Արարատի մարզի Վեդի քաղաքի համայնքապետարանի աշխատակազմի քարտուղար Վահագն Վարդանյանը:

Ըստ այդ ձայնագրությունների, Վեդու համար մեկ դպրոցի տնօրեն Ալվարդ Պապոյանը իբր Հանրապետական կուսակցության շտաբից զանգահարած երիտասարդին տեղեկացնում է, որ 345 հոգուց կազմված ցուցակ է ներկայացրել Վահագն Վարդանյանին: Այնուհետեւ, մեկ այլ ձայնագրության մեջ, նույն այդ «Հանրապետականի շտաբի ներկայացուցչին» զանգահարում է Վահագն Վարդանյանը, ասում, որ ցուցակներն իրեն են տրամադրվել, փորձում է հասկանալ, ինչ խնդիր է ծագել եւ ով է եղել տնօրենին զանգահարողը:

Երեկ մեր զրույցում Վեդու համայնքապետարանի աշխատակազմի քարտուղարը պնդեց, թե իրեն ոչ մի ցուցակ էլ չի տրամադրվել: Նաեւ խոստացավ Հանրապետականի շտաբից ներկայացողների ստեղծած այս խնդրով զբաղվել ընտրություններից հետո:

Նրա հետ մեր զրույցը ներկայացնում ենք ստորեւ.

- Պարոն Վարդանյան, ի՞նչ ցուցակ էր դա:

- Ոչ մի ցուցակ էլ ինձ չեն տվել: Ամբողջ ձայնագրությունը չի հրապարակվել:

- Բայց այդ ձայնագրության մեջ ասում եք, որ ձեզ է տվել:

- Ձայնագրությունը շատ կիսատ է, ամբողջական ձայնագրությունը չեն հրապարակել:

- Իսկ ամբողջական ձայնագրության մեջ ի՞նչ եք ասել:

- Իրենցից պարզեք` ինչ եմ ասել: Որ ինձ ոչ մի ցուցակ էլ չեն տվել:

- Բայց հրապարակված հատվածում լսվում է, որ ասում եք` Ալվարդ Պապոյանը ձեզ է տվել ցուցակը:

- Ինձ ոչ մի ցուցակ էլ չեն տվել ո՛չ Ալվարդ Պապոյանը, ո՛չ մնացած բոլոր տնօրենները:

- Իսկ ինչո՞ւ էիք ասում, որ ձեզ է տվել:

- Ինձ ցուցակ չի տվել, նման բան չկա:

- Ուզում եմ հասկանալ` եթե չի տվել, ինչո՞ւ էիք ասում, որ տվել է:

- Սկզբի խոսակցության մեջ ասացի, որ այդտեղ կա, բայց ամբողջական, որ այդպիսի խոսակցություն չի եղել: Դրա համար եմ ասում:

- Այսինքն` մեկ ասել եք` տվել է, հետո ասել եք` չի՞ տվել:

- Ես փորձեցի իմանալ` ով է (զանգահարողը), դրա համար այդպես ասացի: Հետո ամբողջ զրույցը որ լսեք, կտեսնեք, որ ոչ մի ցուցակ էլ չի տվել:

- Այդ դեպքում տնօրենին հարցրեցի՞ք, թե ինչու է հայտարարել, որ ձեզ է տվել այդ ցուցակը:

- Այո, այո, տնօրենի հետ խոսել եմ: Դուք էլ կարող եք խոսել, եւ նա կասի, որ ինքը ոչ մի ցուցակ չի տվել: Դպրոցի տնօրենը մեզ ենթակա չէ: Դպրոցը մարզպետարանի ենթակայությամբ գործող հիմնարկություն է:

- Իսկ ձայնագրության մեջ ինչո՞ւ էր ասում, որ ցուցակը ձեզ է տվել, ինչո՞ւ է ձեր անունը տալիս, դա պարզե՞լ եք:

- Իմ անունը չի տալիս, խոսակցության մեջ չկա իմ անուն-ազգանունը: Ասում է` տվել եմ աշխատակազմի քարտուղարին, բայց չի ասում` քաղաքապետարանի: Կամ չի ասում Վարդանյան Վահագնին եմ տվել:

- Իսկ այդ դեպքում դո՞ւք ինչու էիք հետ զանգում (Հանրապետականի շտաբից ներկայացած երիտասարդին): 

- Ես զանգել եմ, որ փորձեմ հասկանալ` ո՞վ է, որ շտաբից է ներկայացել: Ալվարդ Պապոյանը թեկնածու է: Մեր Հանրապետական կուսակցության կողմից առաջադրված թեկնածու:

- Դուք ե՞ւս Հանրապետական եք:

- Այո, սկզբնական կազմակերպության ղեկավար եմ: Վեդի քաղաքում հանրապետական կուսակցությունը տրոհված է հինգ սկզբնական կազմակերպության, մեկի ղեկավարն եմ: Հենց կրթական ոլորտի:

- Պարոն Վարդանյան, քանի որ ասում եք` ցուցակների մասին ձեր խոսքերը կիսատ եւ այլ կերպ են ներկայացվել, ինչ-որ քայլեր պատրաստվո՞ւմ եք ձեռնարկել:

- Ընտրություններից հետո՝ այո:

- Ի՞նչ եք անելու:

- Ընտրություններից հետո...

- Դեռ չե՞ք մտածել:

- Չէ, չէ, ժամանակ չկա դրա մասին մտածելու:

- Իսկ ինչո՞ւ ոչ ընտրություններից առաջ, եթե դա ձեր հեղինակությանը վնասել է: Գուցե պետք է ընտրություններից առա՞ջ շտկել իրավիճակը:

- Դա ընտրություններից հետո:

- Մի տեսակ սպառնալիքի նման է հնչում:

- Չէ, չէ, ընտրություններից հետո ձեր հարցերին կպատասխանեմ:

Վահագն Վարդանյանի հետ մեր հեռախոսազրույցից հետո եւս մեկ անգամ լսեցինք Վեդու համար մեկ դպրոցի տնօրեն Ալվարդ Պապոյանի հրապարակված ձայնագրությունը` համոզվելու` հնչեցնո՞ւմ է նրա անունը: Ցուցակի մասին տնօրենն ասում է հետեւյալը. «Ես Վահագին եմ տվել: Վարդանյան Վահագին»: Ինքը` Ալվարդ Պապոյանը հրաժարվեց որեւէ  մեկնաբանություն տալ: Ներողություն խնդրեց, ասաց, որ իրեն լավ չի զգում:

Տպել
4206 դիտում

Վլադիմիր Պուտինը Հայաստան կժամանի պաշտոնական այցով. Բալայան

Չինաստանի կառավարությունը ՀՀ կառավարությանը շտապ օգնության 200 մեքենա է նվիրաբերել

Ինչո՞ւ են Հենրիխ Մխիթարյանին զրկել դիվանագիտական անձնագրից. հարց-ամոթանք՝ Ֆարմանյանից, պարզաբանում՝ ԱԳՆ-ից

Արցախի կարգավիճակը եւ անվտանգությունը լինելու է ՀՀ բացարձակ առաջնահերթությունը. Փաշինյանի ելույթն ամբողջությամբ

Միջպետական կանոնավոր ուղեւորափոխադրումների մրցույթների կարգը կարող է փոխվել. քննարկում նախարարությունում

Լեւոն Երանոսյանը, չունենալով հատուկ որակավորում, ցույցերի ժամանակ գործադրել է լուսաձայնային նռնակ. ՀՔԾ

Հայկական թիմերը 2-րդ անընդմեջ հաղթանակն են տարել շախմատի օլիմպիադայում

Կառավարման ավտոմատացված համակարգերի համակարգիչների 40%-ից ավելին գրոհի է ենթարկվել. Կասպերսկի

Կալանավորներին եւ դատապարտյալներին զրկել են հեռախոսային խոսակցություններից. ՄԻՊ-ը դիմել է ՍԴ

ՀՀ-ում ստեղծված իրավիճակը սոսկ իշխող կուսակցության փոփոխություն չէ. գնում ենք նոր ընտրությունների

Հայ-թուրքական սահմանը հատած 16-ամյա թուրք տղան ազատ է արձակվել կալանքից, գործը կարճվել է

Մշակույթի նախարար Լ. Մակունցը Նյու Յորքի Մետրոպոլիտեն թանգարանում մասնակցել է «Արմենիա» ցուցահանդեսի բացմանը

Նիկոլ Փաշինյանը եւ Միշել Աունը քննարկել են հայ-լիբանանյան հարաբերությունների հետագա զարգացմանը վերաբերող հարցեր

ԱԳ նախարարը ուշադրություն է հրավիրել ՀՀ-ի ու Արցախի հետ սահմանին իրավիճակը լարելու Ադրբեջանի փորձերի վրա

Կառավարության ղեկավարը մասնակցել է ՄԱԿ-ի Զարգացման ծրագրի կազմակերպած քննարկումներին

Նիկոլ Փաշինյանը հանդիպում է ունեցել Աֆրիկյան միության կոմիտեի նախագահ Մուսա Ֆակիի հետ

Հայաստանի եւ Իրանի միջեւ առկա է վստահության բարձր մակարդակ. Հասան Ռոհանին՝ Ն. Փաշինյանին

Ադրբեջանը պետք է փոխի իր անհարգալից վերաբերմունքը բանակցությունների հանդեպ. Նիկոլ Փաշինյանի ելույթը ՄԱԿ-ում

Սյունիքում վագոն-տնակ է հրդեհվել, Երեւանում՝ գազի արտահոսքը վերածվել հրդեհի

Թիվ 3/5 տեղամասի քվեարկության արդյունքները վերահաշվարկվել են, որևէ ցուցանիշի փոփոխություն չի արձանագրվել. ԿԸՀ