Քաղաքացիներին Շենգենյան գոտու երկրներ մեկնելու համար մուտքի կեղծ արտոնագրեր են տրվել

Գլխավոր դատախազությունը «Շենգենյան համաձայնության երկրների» մուտքի արտոնագրերի կեղծման գործն ուղարկել է Կենտրոն եւ Նորք Մարաշ վարչական շրջանների ընդհանուր իրավասության դատարան: Այն մակագրվել է դատավոր Մնացական Մարտիրոսյանին: Դատական տեղեկատվական համակարգի պաշտոնական կայքէջի համաձայն՝ գործով մեղադրանք է առաջադրվել 8 անձի՝ «Արմենիա միջազգային օդանավակայաններ» ընկերության անվտանգության հերթափոխի պետ Միքայել Ղասաբօղլյանին, Ազգային անվտանգության ծառայության սահմանային վերահսկողության «Զվարթնոց» սահմանային վերահսկողության բաժնի 1-ին հերթափոխի պետ Արամ Գրիգորյանին, ԱԱԾ սահմանապահ զորքերի «Զվարթնոց» սահմանային վերահսկողության բաժնի պետ Սամվել Աղաջանյանին։ Մեղադրանքներ են առաջադրվել նաեւ տուրիստական գործակալությունների ներկայացուցիչների:

Գործով մեղադրյալներն աջակցել են որոշ քաղաքացիների, որպեսզի նրանք Շենգենյան գոտու երկրներ մեկնելու համար մուտքի կեղծ արտոնագիր ստանան:

Արուսյակ Մանասյանին մեղադրանք է առաջադրվել այն բանի համար, որ նա, հանդիսանալով տուրիստական գործունեությամբ զբաղվող «Վիգուել» ՍՊԸ ընկերության տնօրեն, նախապես տեղեկանալով, որ ՀՀ քաղաքացիներ Արմինե Պետրոսյանը եւ Ծաղիկ Փիլոյանը մտադրություն ունեն մշտական բնակության մեկնել Գերմանիա, շահադիտական նպատակով պատրաստակամություն է հայտնել օժանդակել նշված անձանց ուղեւորության կազմակերպմանը:

Միքայել Ղասաբօղլյանին մեղադրանք է առաջադրվել այն բանի համար, որ նա Արուսյակ Մանասյանից տեղեկանալով, որ նրա տուրիստական ընկերություն դիմած հինգ քաղաքացիներ ՂՀ Լատվիայի Հանրապետության դեսպանատնից ստացել են «Շենգենյան համաձայնության երկրների» մուտքի արտոնագրեր, սակայն ՂՀ տարածք մուտք չեն գործել եւ անձնագրերում սահմանահատման վերաբերյալ դրոշմակնիքներ չկան, նշված անձանց սահմանահատման ժամանակ ՀՀ ԱԱԾ սահմանապահ վերահսկողության աշխատակիցների կողմից խոչընդոտներ չառաջացնելու համար համաձայնել է երեք դրվագով կատարել կաշառքի միջամտություն:

Արամ Գրիգորյանին մեղադրանք է առաջադրվել այն բանի համար, որ նա, հանդիսանալով ՀՀ ԱԱԾ սահմանային վերահսկողության «Զվարթնոց» սահմանային վերահսկողության բաժնի 1-ին հերթափոխի պետ` պաշտոնատար անձ, Արուսյակ Մանասյանից, նրա տուրիստական ընկերության ծառայություններին դիմած հինգ քաղաքացիների անարգել ելքը ՀՀ-ից ապահովելու համար, «Արմենիա միջազգային օդանավակայաններ» ՓԲԸ անվտանգության հերթափոխի պետ Միքայել Ղասաբօղլյանի միջնորդությամբ, ստացել է կաշառք:

Սամվել Աղաջանյանին մեղադրանք է առաջադրվել այն բանի համար, որ նա, հանդիսանալով ՀՀ ԿԱ ԱԱԾ սահմանապահ զորքերի «Զվարթնոց» սահմանային վերահսկողության բաժնի պետ` պաշտոնատար անձ, իր անմիջական ենթակայության տակ ծառայող Արամ Գրիգորյանից, նրա ներկայացրած անձանց օգտին իր լիազորությունների շրջանակում գործողություն կատարելու համար վերցրել է կաշառք:

Էդգար Նազարյանին մեղադրանք է առաջադրվել այն բանի համար, որ նա, հանդիսանալով տուրիստական բնագավառում գործունեություն իրականացնող անձ, շահադիտական նպատակով Հայաստանում գտնվող եւ մշտական բնակության մեկնելու ցանկություն ունեցող, Մերի Նավոյանի եւ եւս 31 քաղաքացիների անօրինական միգրացիան՝ ՀՀ-ից ԳԴՀ մուտքը, կազմակերպելու դիտավորությամբ, ՌԴ Մոսկվա քաղաքում բնակվող Ալեքսեյ Կրյուկովի միջոցով, պատրաստակամություն է հայտնել կազմակերպել նշված քաղաքացիների ուղեւորությունը Եվրոպա: 

Ալեքսան Մովսիսյանին մեղադրանք է առաջադրվել այն բանի համար, որ նա, հանդիսանալով տուրիստական գործունեությամբ զբաղվող «Կոսմոս տուր» ՍՊԸ տնօրեն, շահադիտական նպատակով կազմակերպել է Հայաստանում գտնվող եւ մշտական բնակության մեկնելու ցանկություն ունեցող Հայկ Կարապետյանի, Սուրեն Ստեփանյանի եւ Հովհաննես Իգիթյանի անօրինական միգրացիան` ՀՀ-ից Նիդերլանդների Թագավորություն մուտքը։

Արմեն Ոսկանյանին մեղադրանք է առաջադրվել այն բանի համար, որ նա, տեղեկացված լինելով իր ծանոթներ` Հովհաննես Իգիթյանի, Սուրեն Ստեփանյանի եւ Հայկ Կարապետյանի անարգել ելքը ՀՀ-ից ապահովելու համար վերջիններիս անձնագրերում ՂՀ մուտքի կնիքի բացակայության մասին, ՂՀ տարածքում «Շենգենյան համաձայնության երկրների» մուտքի արտոնագիր ստանալու կապակցությամբ նախնական համաձայնություն է ձեռք բերել ՀՀ ԱԱԾ սահմանային վերահսկողության «Զվարթնոց» սահմանային վերահսկողության բաժնի 2-րդ հերթափոխի ավագ հսկիչ` պաշտոնատար անձ հանդիսացող՝ Արսեն Տավարածյանի հետ` վերը նշված երեք անձանց յուրաքանչյուրի համար վերցրել է կաշառք:

Արսեն Տավարածյանին մեղադրանք է առաջադրվել այն բանի համար, որ նա, հանդիսանալով ՀՀ ԱԱԾ սահմանային վերահսկողության «Զվարթնոց» սահմանային վերահսկողության բաժնի 2-րդ հերթափոխի ավագ հսկիչ` պաշտոնատար անձ, ՀՀ քաղաքացի Արմեն Ոսկանյանի ծանոթներ Հովհաննես Իգիթյանի, Սուրեն Ստեփանյանի, Հայկ Կարապետյանի անարգել ելքը ՀՀ-ից ապահովելու համար վերջիններից վերցրել է կաշառք: