Անառողջ մթնոլորտ. Ռոբերտը նորից դարձավ նախագահ

Տպագրվել է «Հայկական Ժամանակ» օրաթերթի՝ 2004 թվականի հունիսի 9-ի համարում

Կոմպոզիտոր Ռոբերտ Ամիրխանյանի՝ Ռոբերտ Քոչարյանին ջանասիրաբար քսվելու երկարատեւ պրոցեսը տվեց սպասված արդյունքները: Նախօրեին Կոմպոզիտորների եւ երաժշտագետների միության սկանդալային համագումարի ժամանակ պարոն Ամիրխանյանը 48 կողմ եւ 25 դեմ ձայնով կրկին վերընտրվել է Հայաստանի կոմպոզիտորների միության նախագահ (ընդ որում, համագումարն անցել է լրիվ փակ պայմաններում. լրագրողներ չեն հրավիրվել): Անգամ միությունում ստեղծված մեծաթիվ ընդդիմությունը, որում ընդգրկված են շատ հայտնի կոմպոզիտորներ, համառ պայքարից հետո չի կարողացել որեւէ կերպ խոչընդոտել Ամիրխանյանի վերընտրմանը: Երեկ մեզ հաջողվեց պարզել, որ կոմպոզիտորների 15-րդ համագումարն այնքան լարված մթնոլորտում է անցել, որ բանը հասել է փոխադարձ վիրավորանքների ու աղմուկ-աղաղակի:

Բանն այն է, որ 119 անդամ ունեցող այս միության ընդդիմադիր հատվածը հայտարարում է, որ Ռոբերտ Ամիրխանյանն իր պաշտոնավարման օրոք հասցրել է Կոմպոզիտորների միությունը դարձնել մեկ անձի թատրոն: Հայտնի կոմպոզիտոր Տիգրան Մանսուրյանը, որ ուղիղ 10 տարի ոտք չէր դրել միություն, երեկ մեզ հետ ունեցած զրույցի ժամանակ ասաց, որ Կոմպոզիտորների միությունում այնպիսի բարձիթողի, հուսալքված եւ բարոյալքված վիճակ է, որ մարդիկ տարիներով այնտեղ ոտք չեն դնում: «Մեր Պատրիարքը համագումարին չէր եկել, որովհետեւ խնդիրներ ունի, եւ միությունը հանդուրժում է դա»,- ասում էր մաեստրոն՝ նկատի ունենալով հայտնի կոմպոզիտոր Էդվարդ Միրզոյանին, որ տարիներ շարունակ Ռոբերտ Ամիրխանյանի հետ ունեցած վատ հարաբերությունների պատճառով այնտեղ չի մտնում:

«Միությունում կատարելապես անառողջ մթնոլորտ է տիրում: Երբեմն հիստերիա հիշեցնող միջոցառումներ են ի հայտ գալիս, որ թվա, թե ինչ-որ բան է արվում եւ թվա, որ նախագահն ուժեղ է: Էստրադային վարքագիծը գերակշռող է: Դա շոու է, որը զուրկ է լուրջ ծրագրերից»,- ասում էր Տիգրան Մանսուրյանը: Այս ամենից զատ, սակայն, պարզվում է, որ Կոմպոզիտորների միությունում լուրջ դժգոհություն կա նաեւ Ռոբերտ Ամիրխանյանի վարած ֆինանսական քաղաքականության հանդեպ: Երեկ, երբ մենք զրուցում էինք կոմպոզիտոր Արամ Սաթյանի հետ, նա ասաց, որ եթե միությունում ստուգումներ արվեն, մեծ խախտումներ կհայտնաբերվեն: «Դրանք մեծ գումարներ են: Խոսքը միլիոնների մասին է»,- ասաց Արամ Սաթյանը: Իսկ երբ մենք Տիգրան Մանսուրյանից հարցրինք, թե արդյո՞ք համագումարի ժամանակ ֆինանսական հաշվետվություն չներկայացվեց, նա պատասխանեց. 

«Հաշվետվությունն իմիտացիա էր: Շղարշների մեջ ինչ-որ բառեր են հնչում, բայց մարդիկ ի՞նչ իմանան՝ ինչ գումարներ են եկել, ինչ գումարներ են գնացել: Բացարձակ մութ է»: Կոմպոզիտորների եւ երաժշտագետների միությունում տիրող այս անառողջ մթնոլորտից ազատվելու համար նախօրեին միության ընդդիմադիր հատվածը փորձել է որոշ կառուցվածքային փոփոխություններ մտցնել ղեկավարման կառուցվածքում՝ առաջարկելով նախագահական խորհուրդ ստեղծել եւ վերջ տալ միանձնյա իշխանությանը: Այս ծրագիրը, սակայն, տապալվել է Ռոբերտ Ամիրխանյանի կողմնակիցների շնորհիվ: Ու միայն այդ ժամանակ, որպես Ամիրխանյանին այլընտրանք, ներկայացվել է կոմպոզիտոր Լեւոն Չաուշյանի թեկնածությունը: Բայց, թերեւս, չդիմանալով անառողջ մթնոլորտին՝ Լեւոն Չաուշյանը ինքնաբացարկ է հայտնել:

Այնուհետեւ իր թեկնածությունն է առաջադրել Արամ Սաթյանը: Այսպիսով, ընտրությունների ժամանակ եղել է երկու թեկնածու: Արամ Սաթյանը հավաքել է 25 ձայն, իսկ Ռոբերտ Ամիրխանյանը երաժշտագետների շնորհիվ՝ 48 (ի դեպ, հենց նրա նախաձեռնությամբ էր այս միությունը դարձել նաեւ երաժշտագետների): Երեկ, երբ մենք փորձեցինք միությունում տիրող անառողջ մթնոլորտի վերաբերյալ մեկնաբանություն ստանալ Արամ Սաթյանից, նա պատասխանեց. «Այսպիսի միությունը չի կարող աշխատել, փոփոխություններ են պետք: Բայց այսօրվա ղեկավարությունը փոփոխություններ չի ընդունում: Այստեղ ամեն ինչ անձնավորված է: Արժեզրկված է ամեն ինչ: Միությունը ոչ մի դեր չի կարողանում խաղալ: Ռոբերտ Ամիրխանյանը վանում է բոլոր տաղանդավոր մարդկանց: Այս վիճակը չի կարելի հանդուրժել»:

Եւ չնայած այս հայտարարություններին՝ կոմպոզիտորներն, այնուամենայնիվ, արդեն երկար տարիներ հանդուրժում են սույն նվաստացուցիչ վիճակը: «Երաժիշտների մի մասը վախեցած է, մի մասն ինտելիգենտ է»,- այսպես էր բացատրում հանդուրժողականությունը Տիգրան Մանսուրյանը: Փաստը, սակայն, այն է, որ Հայաստանի կոմպոզիտորների եւ երաժշտագետների միությունն, ըստ էության, արդեն մեռյալ եւ պառակտված վիճակում է: Չդիմանալով Ռոբերտ Ամիրխանյանի ներմուծած բարքերին՝ կոմպոզիտորների որոշ խմբեր վաղուց արդեն առանձին-առանձին փոքրիկ կազմակերպություններ են ստեղծել եւ փորձում են աշխատել՝ միության ղեկավարության հետ չառնչվելով: Իսկ Ռոբերտ Ամիրխանյանը փաստորեն կշարունակի քայքայված այս միությունը ղեկավարել եւս հինգ տարի:

Լուսինե Բարսեղյան