Նախընտրական մուտիլովկա. կրկնակի առաջադրում Շենգավիթում

Տպագրվել է «Հայկական Ժամանակ» օրաթերթի՝ 2004 թվականի հունիսի 18-ի համարում

Թիվ 12 ընտրատարածքային ընտրական հանձնաժողովի նախագահ Ռուզաննա Կռունկյանը երեկ մեզ տեղեկացրեց, որ հունիսի 16-ի երեկոյան ժամը 18-ին ավարտվել է Շենգավիթի համայնքի ղեկավարի թեկնածուների առաջադրումը: Եւ հենց այս փուլում արձանագրվել է առաջին անակնկալը. պարզվել է՝ համայնքի ղեկավարի թեկնածու առաջադրված երեք անձանցից երկուսի անուն-ազգանունները համընկնում են: Ավելի հասկանալի լինելու համար ասենք, որ բացի գործող թաղապետ Մարտին Սարգսյանից, թեկնածու է առաջադրվել եւս մեկ Մարտին Սարգսյան: Իհարկե, նրանց հայրանունները տարբեր են. գործող թաղապետի հայրանունը Գրիգոր է, իսկ երկրորդ Մարտին Սարգսյանինը՝ Արիստակես, բայց դա այս դեպքում գրեթե էական չէ, քանի որ մարդիկ թեկնածուներին ճանաչում են անուն-ազգանունով:

Ընդհանրապես նման սեւ ընտրական տեխնոլոգիաները կիրառվում են հակառակորդ թեկնածուների ընտրողներին շփոթության մեջ գցելու համար, որպեսզի Մարտին Սարգսյանի պոտենցիալ ընտրողը չկարողանա ճիշտ կողմնորոշվել, թե հատկապես ո՛ր Մարտին Սարգսյանին է պետք կողմ քվեարկել: Սակայն այս ընտրատարածքում առաջադրված  երրորդ թեկնածուն «Զորավար Անդրանիկ» ջոկատի հրամանատար Ավետիս Գրիգորյանը (առավել հայտնի է որպես «Ղռերի Ավո») երեկ մեզ հետ զրույցում հավաստիացնում էր, որ ինքն ընդհանրապես տեղյակ չէ, թե ովքեր են առաջադրվել թաղապետի թեկնածու, կամ ում անուն-ազգանունը ում հետ է համապատասխանում: «Համոզված եմ, որ պատահականության արդյունք է»,- մեր հեռախոսային զրույցի ժամանակ իր տեսակետն արտահատեց պարոն Գրիգորյանը:

Սակայն մեզ հայտնի է, որ այս առաջադրումից երկու օր առաջ Ավետիս Գրիգորյանը հանդիպում է ունեցել Ռոբերտ Քոչարյանի ազգային անվտանգության հարցերով խորհրդական Գառնիկ Իսագուլյանի հետ, որը հայտնի է նման սեւ տեխնոլոգիաներին տիրապետելու վարպետությամբ: Բավականին ուշագրավ է նաեւ այն փաստը, որ մյուս Մարտին Սարգսյանն աշխատում է ոստիկանության զորքերի թիվ 1011 զորամասում՝ որպես վարձու բանվոր: Որպեսզի ավելի վառ լինի տպավորությունը հիշյալ Սարգսյանից, ավելացնենք, որ թաղապետի սույն թեկնածուի բնակարանի հեռախոսն անջատված է վարձը չմուծելու համար: Նաեւ այս պատճառով՝ նրանից մեկնաբանություններ ստանալ չհաջողվեց:  Իսկ ինչ է մտադիր անել Շենգավիթի թաղապետ Մարտին Սարգսյանը:

 «Իհարկե, ինձ համար անակնկալ էր այս առաջադրումը, սակայն խուճապի պատճառ եւս չեմ տեսնում: Եթե բոլոր երեք թեկնածուներն էլ գրանցվեն, ապա ես կլինեմ քվեաթերթիկում երրորդը եւ իմ ընտրողներին կբացատրեմ, որ պետք է քվեարկեն երրորդ համարի օգտին: Սակայն կարծում եմ, որ հիշյալ Մարտին Սարգսյանը եւ նրա հովանավորները կհասկանան իրենց քայլի անիմաստությունը, եւ նա չի հասնի մինչեւ քվեարկություն»,-ասում է արձակուրդում գտնվող Շենգավիթի թաղապետը: Պետք է նկատի ունենալ, որ նման նախադեպ Հայաստանի ընտրական պրակտիկայում հայտնի է: 2003 թվականի աշնանը տեղի ունեցած Աջափնյակի թաղապետի ընտրություններում առաջադրվել էին երկու Արման Սահակյան, մեկը՝ ՀՀԿ խմբակցության ղեկավար Գալուստ Սահակյանի որդին, մյուսը՝ որեւէ կերպ չառանձնացող անձ:

Այն ժամանակ լուրեր տարածվեցին, թե երկրորդ Արման Սահակյանին թեկնածու առաջադրելու նախաձեռնությունը գործող թաղապետ Արծրուն Խաչատրյանինն էր, իսկ հիշյալ Սահակյանն իր թեկնածությունից հրաժարվեց միայն այն բանից հետո, երբ իրական թեկնածու Արման Սահակյանի կողմնակիցները ինքնաբացարկի համար նրան վճարեցին ավելի մեծ գումար, քան առաջադրման համար վճարել էր Արծրուն Խաչատրյանը: Այս երկու ընտրությունների մեջ առկա մյուս նմանությունն էլ այն է, որ ինչպես Աջափնյակի դեպքում, այս անգամ էլ՝ մի կողմում ՀՀԿ թեկնածու Մարտին Սարգսյանն է, որը համարվում է Հանրապետական կուսակցության վերնախավի անդամ, իսկ մյուս կողմում՝ իշխանության, այսպես ասած, նախագահական թեւի աջակցությունն ունեցող Ավետիս Գրիգորյանը: Դժվար է կանխագուշակել, թե ով կհաղթի հուլիսի 11-ին նշանակված ընտրություններում, բայց հիշեցնենք, որ 2003 թվականի նոյեմբերի 2-ին տեղի ունեցած Աջափնյակի թաղապետի ընտրություններում հաղթեց նախագահական թեւի աջակցությունը վայելող Արծրուն Խաչատրյանը:

Ավետիս Բաբաջանյան