Ով՝ ում. էլի դատախազն ընդդեմ վարչապետի

Տպագրվել է «Հայկական Ժամանակ» օրաթերթի՝ 2004 թվականի հուլիսի 3-ի համարում

Այսօր իսկ ակնհայտ է, որ Եղվարդի թիվ 44 ընտրատարածքի պատգամավորի թափուր տեղի համար օգոստոսի 29-ին նշանակված ընտրությունները չի լինելու միայն այդտեղ առաջադրված թեկնածուների անձնական պայքարը: Չնայած առաջադրված թեկնածուները 7-ն են, սակայն դա լինելու է պայքար վարչապետ Անդրանիկ Մարգարյանի եւ հանրապետության գլխավոր դատախազ Աղվան Հովսեփյանի միջեւ, պայքար՝ այդ ընտրատարածքում բնակվող ապարանցիների (այս ընտրատարածքում 30-40% են կազմում) եւ եղվարդցիների միջեւ, պայքար՝ ֆինանսական ռեսուրսների եւ իշխանական լծակների միջեւ: Չնայած այս ընտրատարածքում առաջադրված Արտակ Սարգսյանը ՕԵԿ անդամ է, սակայն նրան ակնհայտորեն հովանավորում է վարչապետը, որը ցանկանում է Սարգսյանի հաղթանակի միջոցով վրեժխնդիր լինել Աղվան Հովսեփյանից՝ 2003-ի նոյեմբերի 2-ին Աջափնյակի թաղապետի ընտրություններում Գալուստ Սահակյանի որդու պարտության համար:

Իսկ Ա.Հովսեփյանը, ի դեմս իր հովանավորյալ «Լավանդա» հոլդինգի սեփականատեր Արայիկ Հայրապետյանի, ուզում է ապացուցել, որ երբ ուզենա՝ կարող է հաղթել վարչապետին էլ, ամբողջ կոալիցիային էլ: Այժմ այս թեկնածուներից յուրաքանչյուրի մասին՝ առանձին-առանձին: Ա.Սարգսյանը համարվում է այս ընտրատարածքի եղվարդցի բնակչության ներկայացուցիչը: Նա ասում է, որ ծնվել է Եղվարդում եւ այժմ էլ իր օրվա մեծ մասն անցկացնում է այնտեղ: «ՍԱՍ» սուպերմարկետի եւ նորաբաց «Սլավյանսկի» ռեստորանի սեփականատերը չնայած ՕԵԿ անդամ է, սակայն չի էլ թաքցնում, որ ինքը լավ հարաբերություններ ունի նաեւ ՀՀԿ վերնախավի հետ: Պատասխանելով մեր այն հարցին, թե ինչու հենց այժմ որոշեց առաջադրել իր թեկնածությունը՝ Սարգսյանն ասում է.

«Իմ տնտեսական գործունեությանը զուգահեռ՝ զբաղվել եմ նաեւ բարեգործությամբ: Մարդկանց հետ շփումը ցույց է տալիս, որ միանգամյա օգնությունները բավարար չեն, կան խնդիրներ, որոնք պետք է օրենսդրական լուծում ստանան: 2003-ին էլ կառաջադրվեի այս ընտրատարածքում, բայց այն ժամանակ այստեղ արդեն առաջադրվել էր իմ մտերիմ Արամ Հարությունյանը, որի հետ չէի ցանկանում մրցել: Այժմ նա նախարար է, եւ այդ պատճառով հանգիստ առաջադրեցի թեկնածությունս»: Սարգսյանը գիտի, որ թեկնածուներից Ա.Հայրապետյանին պաշտպանում է «Նիգ-Ապարան» հայրենակցական միությունը, սակայն բացատրում է, որ այնքան էլ չի հավատում այն խոսակցություններին, թե Հայրապետյանին աջակցում է Ա.Հովսեփյանը:

«Մեր երկրում իշխանությունը միասնական է: Այս ընտրատարածքում կոալիցիան պաշտպանում է իմ թեկնածությունը, եւ չեմ կարծում, որ Աղվան Հովսեփյանը հանդես գա կոալիցիային եւ իշխանությանը ընդդիմադրի դիրքում: Այսօր Հայաստանը դեմոկրատացման ճանապարհին է, եւ չեմ կարծում, որ Ա.Հովսեփյանը կգնա դատախազության, ուժային լծակների գործածմանը մեր ընտրատարածքում»,-ասում է մեր զրուցակիցը եւ վստահեցնում, որ իրեն ավելի լուրջ հակառակորդ է համարում Խաչիկ Սիմոնյանին, որը, ըստ նրա, ունի բնական ձայներ՝ ի դեմս Արցախյան պատերազմի իր զինակիցների: Ապարանյան թեւի ներկայացուցիչ Ա.Հայրապետյանը չի էլ թաքցնում, որ ինքը վայելում է Ա. Հովսեփյանի աջակցությունը. «Այո, «Նիգ-Ապարան» հայրենակցական միությունը որոշել է պաշտպանել իմ թեկնածությունը: Այնպես որ, ինձ աջակցում են միության բոլոր անդամները, այդ թվում՝ Աղվան Հովսեփյանը, որը միության պատվավոր նախագահն է»:

Հայրապետյանը սակայն վստահեցնում է, որ ինքը ընտրապայքարը չի կառուցելու Հովսեփյանի լծակների կամ ապարանցի-եղվարդցի հակամարտության վրա: «Ես ճանաչում եմ Արտակ Սարգսյանին եւ նրան կոչ եմ անում արդար եւ ազնիվ մրցակցության: Եթե ընտրատարածքում կծագեն խնդիրներ, դրանք կողմ եմ հարթել բաց քննարկումների միջոցով: Իսկ դատախազության լծակների գործադրման մասին խոսակցությունները համարում եմ անտեղի»,-ասում է նա: «Ինչ վերաբերում է կոալիցիայի կողմնորոշմանը, ապա ես եւս մասնակից եմ մեր պետության առաջխաղացմանը եւ կարող եմ մեր պետությանը ոչ պակաս ծառայություններ մատուցել, քան մյուս թեկնածուները»,-ասում է «Լավանդա» հոլդինգի տնօրենը:

Որքան էլ Հայրապետյանը վստահեցնի, որ հաշվարկ չի անում ապարանցի-եղվարդցի հակամարտության շուրջ, նրա վրա խիստ բացասաբար կարող է անդրադառնալ այն փաստը, որ այս ընտրատարածքում առաջադրված Խաչիկ Սիմոնյանը եւս ապարանյան թեւի ներկայացուցիչ է: Նա նույնիսկ միջնորդների միջոցով առաջարկել է Սիմոնյանին՝ ինքնաբացարկ ներկայացնել: Սիմոնյանը, պատասխանելով մեր այն հարցին, թե ինքը մտավախություն չունի՞, որ ապարանցիներն իրեն կմեղադրեն, թե՝ խանգարում կամ կիսում է իրենց ձայները, ասաց. «Թող իրենք մտածեն, որովհետեւ ես հաղթանակի ավելի մեծ հնարավորություն ունեմ, քան թեկնածուներից որեւէ մեկը, եւ ճիշտ կլիներ, որ իրենք ինձ զիջեին»: «Իսկ ինչ տարբերություն՝ ընդդիմությունը  մեկ ձայն ավե՞լ ունի խորհրդարանում, թե՞ պակաս»,-հարցին «Հանրապետություն» կուսակցության ակտիվիստ Սիմոնյանն ասում է. «Կարծում եմ, աշնանն իմ այդ մեկ ձայնը լուրջ նշանակություն է ունենալու իշխանափոխության գործում»:

Ավետիս Բաբաջանյան