ՔԿՀ-ում Մեխակ Հարությունյանի սպանության փորձի քրգործով մեղադրյալներ կան

Գեղարքունիքի փոխմարզպետ Անդրանիկ Հակոբյանի որդու՝ 29-ամյա Հայկ Հակոբյանի (Նորատուսցի Հայկո մականվամբ) աղմկոտ սպանության գործով կալանավորված Մեխակ Հարությունյանի դեմ մահափորձի գործով մեղադրյալներ կան:

Այս մասին մեր զրույցում ասաց Հարությունյանի պաշտպան Ռուստամ Խաչատրյանը: Թե քանիսն են նրանք եւ ովքեր են, պաշտպանը չցանկացավ պատասխանել:

Մեխակ Հարությունյանի դեմ մահափորձն իրականացվել է սույն թվականի մարտի 25-ին՝ «Արմավիր» ՔԿՀ-ում: «Արմավիր» ՔԿՀ-ի դատապարտյալներից մեկը փորձել է ածելիով վիզը կտրելու միջոցով սպանել նրան: Ըստ պաշտոնական հաղորդագրության՝ զբոսանքի՝ օրենքով սահմանված ժամանակը լրանալուց հետո, վերադառնալիս դատապարտյալը մուտք է գործել ՔԿՀ անվտանգության ապահովման բաժնի աշխատակցի աշխատասենյակ, բռնություն գործադրել նրա նկատմամբ, հափշտակել բանալիներն ու շտապել դեպի այն խուցը, որտեղ պահվում է կալանավոր Մ.Հարությունյանը (խոսքը Մեխակ Հարությունյանի մասին է,-հեղ.)։ Ապա՝ բացել է խցի դուռը եւ հարձակվել այնտեղ միայնակ գտնվող կալանավորի վրա, բռնություն գործադրել նրա նկատմամբ, կտրող-ծակող առարկայով հարվածել նրա մարմնի տարբեր մասերին։ Մեր տեղեկություններով, դատապարտյալը հասցրել է ածելիով վնասել Մեխակ Հարությունյանի կոկորդը. նա նաեւ վնասվածքներ է ստացել դեմքի շրջանում: Մեզ հաջողվեց պարզել, որ դատապարտյալը, որը ցանկացել է սպանել 19-ամյա Մեխակին, նախկինում մի քանի անգամ դատապարտված 36-ամյա Հ. Բ.-ն է: Մեզ հաջողվեց ճշտել, որ մեղադրյալներից մեկը հենց նա է:  Շրջանառվող որոշ տեղեկությունների համաձայն՝ Մեխակ Հարությունյանի սպանության պատվերը տվել է քրեական հեղինակություն Նորատուսցի Ալիկը: Նշենք, որ սպանված Հայկ Հակոբյանը Նորատուսցի Ալիկի մորեղբոր որդին է: Այս տեղեկությունը, սակայն, մեր զրույցում հերքեց Նորատուսցի Ալիկի պաշտպան Մկրտիչ Վասակյանը:

Ինչ վերաբերում է մայր գործին՝ Գեղարքունիքի փոխմարզպետ Անդրանիկ Հակոբյանի որդու՝ 29-ամյա Հայկ Հակոբյանի սպանությանը, ապա մեղադրյալի պաշտպան Ռուստամ Խաչատրյանն ասաց, որ շուտով նախաքննության ավարտ կհայտարարվի: Մինչ դա պաշտպանը միջնորդություն է ներկայացրել Գլխավոր դատախազին եւ Քննչական կոմիտեի նախագահին: «Միջնորդության մեջ փաստերով հիմնավորել եմ, որ սխալ է որակավորված պաշտպանյալիս կատարած գործողությունները, որովհետեւ  ոչ թե Մեխակ Հարությունյանին պետք է մեղադրեին ՀՀ ՔՕ 104 հոդվածի 1-ին մասով (դիտավորյալ սպանություն), այլ՝ ՀՀ ՔՕ 108 հոդվածով (անհրաժեշտ ինքնապաշտպանություն): Անձը պաշտպանվել է, այժմ սպասում ենք միջնորդության պատասխանին»,- ասաց պաշտպանը: Հարցին, այսինքն Մեխակ Հարությունյանը պնդում է, որ ինքնապաշտպանվե՞լ է, Խաչատրյանը դրական պատասխան տվեց՝ նշելով. «Հայկ Հակոբյանն իր վրա զենք է բարձրացրել, դրա համար նա դիմել է այդ քայլին»: Նա ասաց, որ Մեխակ Հարությունյանը ցուցմունք է տվել, նաեւ առերեսումներ են եղել, բայց թե ում հետ՝ չասաց: Այս փուլում պաշտպանն այլ հարցերի չպատասխանեց:

Գեղարքունիքի փոխմարզպետի որդին՝ Հայկ Հակոբյանը, սպանվել է հունվարի 7-ին, ցերեկը՝ ժամը 12:30-ի սահմաններում. «Տոյոտա լենդ քրաուզեր պրադո» ավտոմեքենայից կրակոցներ են արձակվել «Աուդի-Q7» մակնիշի ավտոմեքենայի ղեկին գտնվող Հայկ Հակոբյանի գլխի եւ պարանոցի ուղղությամբ, ինչի հետեւանքով ստացած վնասվածքներից վերջինս հիվանդանոցի ճանապարհին մահացել է. Հակոբյանի վրա 7 կրակոց է արձակվել: Սպանության մեջ մեղադրվում է Նորատուսի բնակիչ, 19-ամյա Մեխակ Հարությունյանը: Հիշեցնենք, որ նա Նորատուսի գյուղապետի եղբոր՝ Չոլի շուն մականունով հայտնի Արտակ Հարությունյանի որդին է: