Գլուխս չգիտեմ որտեղ թաքցնեմ. դպրոցի տնօրենը` իրեն վարկաբեկող նամակի մասին

Իջեւանի N 3 դպրոցի տնօրենը վստահ է, որ իրեն վարկաբեկող անանուն նամակը, որն ուղարկվել է կրթության եւ գիտության նախարարություն ու նաեւ հրապարակվել լրատվամիջոցներում, չի գրվել իր գործընկերների կողմից, որովհետեւ այս ընթացքում նրանք տեսել են իր աշխատանքի արդյունավետությունը:

Պողոսյանը չի թաքցնում, որ կատարվածն իր համար սթրեսի պատճառ է դարձել:  

«Համոզված եմ, որ գործընկերներս դրա հետ բոլորովին կապ չունեն: Գիտեմ` հարվածը որտեղից է գալիս. որովհետեւ կարմիր վկայականները չեմ բաշխում, նվեր չեմ տալիս կամ էլ շահադիտական նպատակներ չունեմ ընդհանրապես: Իմ հեղինակության համար շատ վատ է այս պահին. ես դուրս եմ գալիս տանից, մինչեւ դպրոց ինձ թվում է, թե ամբողջ աշխարհը տեղյակ է դրա մասին, ու գլուխս չգիտեմ որտեղ պահեմ: Բայց ես հասկացել եմ, որ իրականում պիտի կարողանամ հաղթահարել... Նման բաներ չեմ տեսել, հարյուր տարի ղեկավար չեմ եղել, այնպիսի բաներ չեմ արել, որ ամեն անգամ երեսծեծանք ստանամ, սա էլ սովորականի պես ընդունեմ: Չէ, ինձ համար սա լուրջ սթրես է»,- մեր զրույցում ասաց նա:

Իջեւանի N3 դպրոցի տնօրենը մեկնաբանեց իրեն հասցեագրված մեղադրանքների շարքը:

Այդ պաշտոնում իր առաքելությունը ծառահատումներով սկսելու մասին ասաց, որ բարդիները կարճացվել են մարզպետարանի ու քաղաքապետարանի թույլտվությամբ, քանի որ կոտրվող ճյուղերը վնասում էին դպրոցի նորոգված տանիքն ու անձրեւատար խողովակները: Գոյացած փայտանյութը տրամադրվել է աշխատող բանվորներին, ինչպես նաեւ ուսուցիչներին:

Ընդամենը 150 հազար դրամ աշխատավարձ ստանալու պարագայում պաշտոնավարման երեք տարվա ընթացքում ավտոմեքենա գնելու, տան շինարարությունը շարունակելու, կնոջը վճարովի կրթության տալու մասին մեղադրանքին անդրադառնալով՝ նախ ուղղեց, որ իր աշխատավարձը 170 հազար դրամ է կազմում:

«Ես ֆիզկուլտուրայի ուսուցիչ եմ, բռնցքամարտի մարզիչ, 16 տարվա մանկավարժական ստաժ եմ ունեցել: Մինչեւ տնօրեն դառնալս ամեն ամառ աշխատել եմ Ռուսաստանում, մենք խանութ ունենք: Եղբորս հետ համատեղ օբյեկտ ունենք, բայց ինչ տնօրեն եմ դարձել, այդ օբյեկտում քարը քարին չի ավելացել»,- պատասխանեց Հրայր Պողոսյանը:

Չհերքեց նամակում նշված այն տեղեկությունները, թե դպրոցում աշխատանքի է ընդունել կնոջը, ընկերներին: «Այս թաղամասում ապրում եմ 7 տարեկանից: Ես շփվող մարդ եմ, սպորտսմեն, միշտ էլ հեղինակություն եմ ունեցել: Թաղամասում համարյա բոլորն իմ ընկերներն են, կամ ընկերների բարեկամները: Հիմա լավ, եթե մարդը եկել է աշխատանքի ընդունվելու, չընդունե՞մ: Այն մեկը չի եկել, այս մեկն է եկել: Նա էլ գար, էլի իմ ընկերն էր լինելու»,- նշեց մեր զրուցակիցը:

Նրա կինը դպրոցում ցերեկային պահակի հաստիք է զբաղեցնում: Հերքում է, թե նա աշխատանքի չի գալիս: Նկատում է, որ տարիներ առաջ, երբ ընդամենը ինքը N5 դպրոցում ֆիզկուլտուրա էր դասավանդում, կինն այնտեղ էլ դռնապան է եղել:  

«Ես բանակի փողը կերել եմ, դուք դրանից խոսեք»,- շտապեց առավել սուր մեղադրանքին անդրադառնալ տնօրենը` հավելելով, որ մյուս մեղադրանքներից այնքան չի վիրավորվել, որքան այդ մեկից:  

Ասաց, որ ապրիլյան պատերազմի օրերին ամբողջ դպրոցն աջակցություն է տրամադրել բանակին: «Աշակերտներից գումար չենք հավաքել, ծնողներն առեւտուր են արել, իրենց երեխաների հետ ուղարկել դպրոց: Բերել ենք, գազելը լցրել, տարել մարզպետարանի համապատասխան տեղը: Ուսուցիչներն ու տնօրինությունն էլ իրենց գումարն են հավաքել, մեծ առեւտուր արել: Իսկ արհմիության գումարի հետ կապված ես բոլորի հետ խորհրդակցել եմ` գնանք մարզպետարան, տեսնենք` ոնց անենք էդ գործողությունը: Այնտեղ խորհուրդ են տվել սպասել` ասելով, համայնքներն էլ պիտի գումար բերեն, կզանգենք, դա էլ կբերես»,- պարզաբանեց Իջեւանի N3 դպրոցի տնօրենը` հավելելով, որ արհմիության գումարն ինքը ոչ մի անգամ չի տեսնում, եւ եթե որոշում է կայացվում այն ծախսել որեւէ համատեղ միջոցառում կազմակերպելու համար, արհմիության նախագահը վճարում է բոլորի ներկայությամբ: «Մենք հաշվետվություն ենք տալիս, թե այդ գումարը որտեղ է»,- եզրափակեց Պողոսյանը:

Ինչ վերաբերում է երկար դասամիջոցներին դպրոցի դռները փակելուն եւ իր բիզնեսը ծաղկեցնելուն, տնօրենը նշեց, որ երեխաները շատ էին հեռանում եւ ուշանում դասերից: Հայտարարեց, որ այդտեղ այլեւս սնունդ չի վաճառվի, եւ ծնողներին կառաջարկի երեխաների հետ ուտելիք ուղարկել: