Խաղադաշտ ենք դուրս գալու հաղթելու համար. Արթուր Պետրոսյան

Հայաստանի ֆուտբոլի ազգային հավաքականն անցյալում է թողել աշխարհի 2018 թ. առաջնության ընտրական փուլի Ռումինայի դեմ խաղում կրած պարտությունը (1:0): Այս մասին այսօր՝ սեպտեմբերի 3-ին, լրագրողների հետ հանդիպման ժամանակ ասաց գլխավոր մարզիչ Արթուր Պետրոսյանը: Վաղը Վազգեն Սարգսյանի անվան «Հանրապետական» մարզադաշտում կայանալիք Դանիայի դեմ ընտրական փուլի հերթական խաղից առաջ մասնագետը խոսեց Ռումինիայի դեմ խաղի եւ հավաքականի ներկայիս վիճակի մասին:

- Ի՞նչ տվեց Ձեզ փորձարկումը պաշտպանությունում՝ 3 պաշտպան, 2 հոգի էլ եզրերից:  Եվ նաեւ հաջորդ խաղի մասին. հաշվի առնելով կենտրոնական պաշտպան Տարոն Ոսկանյանի բացակայությունը՝ ի՞նչ եք անելու:  

- Իմ կարծիքով՝ մինչեւ կարմիր քարտը լավ ստացվեց, կարողանում էինք եւ՛ լավ պաշտպանվել, եւ՛ լավ գրոհներ կազմակերպել: Ինչպես գիտեք, կարմիր քարտից հետո փոխեցինք խաղային տակտիկան, սկսեցինք նորից 4 պաշտպանով խաղալ, բայց ամեն դեպքում իմ կարծիքով՝ հաջող ստացվեց: Ինչ վերաբերում է Տարոն Ոսկանյանին, դա մեծ հարված է մեզ համար, մանավանդ այս պահին, երբ Հրայր Մկոյանը բացակայում է: Պաշտպանների պակաս ունենք, բայց կփորձենք ելք գտնել, հուսով եմ՝ կստացվի:

- Առաջին անգամը չէ, որ հավաքականը խաղի վերջում գոլ է բաց թողնում: Ո՞րն է պատճառը: Ասել եք, որ այս դեպքում հոգնածությունն էր: Ի՞նչ կարելի է անել հետագայում դրանից խուսափելու համար:

- Մոտավորապես 40 րոպե ահավոր ճնշում էր մեր դարպասին, մոտ 40 րոպե 1 հոգի պակաս խաղացինք: Եթե հիշում եք, ես ոչ թե պաշտպաններ, այլ հարձակվողներ մտցրեցի, որովհետեւ 1-ին հերթին իմ թիմին էի ուզում ցույց տալ, որ մենք դաշտ դուրս չենք եկել միայն պաշտպանվելու, ամեն գնով 1 միավոր վաստակելու համար: Հոգեբանական առումով շատ կարեւոր է, որ թիմը հասկանա, որ նույնիսկ 10 հոգով մենք շանսեր ունենք: Իմ կարծիքով՝ մինչեւ 91-րդ րոպեն բավականին լավ ստացվեց: Բայց հակառակորդի անտանելի ճնշման պատճառով հոգնածություն կար, այդ պատճառով չկարողացանք պահել կենտրոնացվածությունը:

- Այնուամենայնիվ, ի՞նչ է պետք փոխել:

- Իմ կարծիքով՝ դա հոգեբանության խնդիր է, որովհետեւ 10 հոգով արդեն ամեն գնով փորձում ես պահել արդյունքը, վերջին րոպեներն են, մի պահ չես հասցնում, ու հակառակորդը գոլ է խփում: Իմ կարծիքով՝ ոչ թե ֆիզիկական պատրաստականության, այլ 1 հոգով պակաս լինելու խնդիրն էր:

- Ձեր գլխավորությամբ հավաքականում 1-ին անգամ տեսանք դարպասապահ Գրիգոր Մելիքսեթյանին եւ Սարգիս Ադամյանին: Ի՞նչ կասեք նրանց մասին: Եվ կխոսե՞ք նախորդ խաղում ամենաակտիվ ֆուտբոլիստներից մեկի՝ Տիգրան Բարսեղյանի մասին:

- Շատ ուրախ եմ Գրիգոր Մելիքսեթյանի համար: Շատ բարձր մակադրակի խաղ անցկացրեց: Բայց 1 խաղ էր, հուսով եմ՝ նույն կերպ կշարունակի: Տիգրանի մասին կասեմ, որ մեծ ծավալի աշխատանք տարավ: Եթե եւս 1 փոփոխության հնարավորություն ունենայինք, նրանք կփոխարինեինք, քանի որ Գոռ Մալաքյանն առողջական խնդիրներ ուներ, ստիպված նրան փոխարինեցինք: Ինչ վերաբերում է Ադամյանին, իմ կարծիքով՝ նա կարող է մեր թիմին օգնել: Նա իր այդ դիրքում չի խաղում իր թիմում. ես նայել եմ նրա բոլոր խաղերը 2-րդ Բունդեսլիգայի: Ամեն դեպքում, այդ 20 րոպեն մեծ նվիրվածությամբ խաղաց թիմի համար: Կարծում եմ՝ հետագայում կարող է մեզ շատ օգնել:

- Ասացիք՝ պաշտպանությունում խնդիրներ ունեք: Ի՞նչ վիճակում է կենտրոնական պաշտպան Գաել Անտոնյանը: Եթե պատրաստ է խաղալու, ինչու՞ նախորդ խաղում Ոսկանյանի կարմիր քարտից հետո նրան դաշտ չմտցրեցիք:

- Որովհետեւ Գաելը երկար ժամանակ խաղային պրակտիկա չի ունեցել: 1 շաբաթ նորմալ մարզվեց մեզ հետ: Եթե խնդիրներ չունենայինք գուցե չխաղար, բայց այդ մասին կարելի է մտածել այս պահին:

- Նշեցիք, որ Մալաքյանին փոխարինեցիք վնասվածքի պատճառով: Ի՞նչ վիճակում է ի՞նչ կասեք Մարկոս Պիզզելիի մասին. խաղի ընթացքում բավականին հոգնում է: Նա պատրա՞ստ է այս խաղում 1-ին րոպեներից խաղալ:

- Դա արդեն մենք ենք որոշելու՝ Մարկոսը խաղալու է, թե՝ ոչ: Իսկ Գոռը մկանային խնդիրներ ուներ, այդ պատճառով փոխարինեցինք: Իմ կարծիքով՝ վաղվա խաղին չի հասցնի:

- Հենրիխ Մխիթարյանը հավաքականի ամենաքննարկվող ֆուտբոլիստն է, նրանից սպասելիքները շատ մեծ են: Նախորդ մարզիչներին մեղադրում էին նրան սխալ դիրքում օգտագործելու մեջ: Հիմա, կարծես թե, դիրքը ճիշտ է ընտրված, բայց չի խաղում այն խաղը, որ երկրպագուները սպասում են:

- Իմ կարծիքով՝ Հենրիխը շատ լավ խաղ ցուցադրեց: Ահռելի աշխատանք կատարեց թիմի համար: Եթե նայեք վիճակագրությունը, կտեսնեք, որ այդ խաղում ամենաշատը նա է աշխատել: Ամենից շատ կիլոմետրերը նա է վազել: Մենք նրանից ամեն խաղում 3 գոլային փոխանցում եւ ամենաքիչը 2 գոլ ենք սպասում, բայց սա թիմային խաղ է. Հենրիխը պետք է թիմին օգնի, թիմն էլ նրան:

- Վաղվա խաղի հետ կապված ի՞նչ խոսքեր եք գտել տղաների համար:

- Դուրս ենք գալու հաղթանակի համար: Տանն ենք խաղում, ձգտելու ենք հաղթանակի: Ճիշտ է՝ հիասթափություն կա, բայց ինչպես գիտեք, Դանիան Հայաստանում հեշտ խաղեր չի ունեցել:

- Ռումինիայի դեմ խաղից հետո ասել եք, որ հավաքականի հետ կապված Ձեր նպատակներն ունեք: Կխոսե՞ք դրանց մասին:

- Ինչպես գիտեք, իմ պայմանագիրը նախատեսված է մինչեւ հոկտեմբերի 15-ը: Դա իմ ցանկությունն է եղել, որովհետեւ, ինչպես գիտեք, ՀՖՖ նախագահ Ռուբեն Հայրապետյանը ցանկանում էր ինձ 3 տարվա պայմանագիր առաջարկել: Ես չգիտեի՝ ինչպես էր ստացվելու իմ աշխատանքը հավաքականում, այդ պատճառով ավելի զգուշավոր մոտեցա հարցին: Դեռ ժամանակ ունենք ֆեդերացիայի նախագահի հետ այդ մասին խոսելու:

- Արդյո՞ք հավաքականի դռները փակ են դարպասապահ Անատոլի Այվազովի համար (խմբ. որոշել է որոշ ժամանակ չխաղալ հավաքականում):

- Իհարկե, ոչ: Ես մարզիչ եմ եւ աշխատելու եմ այն ֆուտբոլիստների հետ, որոնք տվյալ պահին պատրաստ են խաղալու հավաքականում, պատրաստ են ոչ միայն ֆիզիկապես, այլեւ նվիրվածության առումով: Որպես մարզիչ ինձ թույլ չեմ էլ տա նման բան ասել:

- Ի՞նչ կոչ կանեք երկրպագուներին առաջիկա խաղից առաջ:

- Որ գան մարզադաշտ եւ դրական լիցքեր հաղորդեն թիմին: Մենք միշտ տեսնում ենք, միշտ զգում ենք նրանց աջակցությունը, ինչպես Ռումինիայում. շատ հաճելի էր: Նույնն էլ կցանկանայի այստեղ՝ Դանիայի նման ուժեղ թիմի դեմ խաղում տեսնել: