Պատասխանատուն Հայաստանի իշխանություններն են, փաստերը նրանց դեմ են. Անդրիաս Ղուկասյան. ՖՈՏՈ

Էրեբունի եւ Նուբարաշեն վարչական շրջանների ընդհանուր իրավասության դատարանում դատավոր Վարդան Գրիգորյանի նախագահությամբ այս պահին շարունակվում է  զանգվածային անկարգությունների եւ «Սասնա ծռերին» օժանդակելու մեջ մեղադրվող Անդրիաս Ղուկասյանի գործով դատական նիստը:

Նրան սատարելու են եկել հարազատները, ընկերները. դատարանի դահլիճում են գտնվում նաեւ սույն գործի անջատված մասով մեղադրյալ, իսկ այս գործով վկա Դավիթ Սանասարյանը եւ «Ժառանգություն» կուսակցության փոխնախագահ Արմեն Մարտիրոսյանը:

Անդրիաս Ղուկասյանը նիստերի դահլիճ մտնելուն պես հետաքրքրվեց, թե որտեղ են տուժողները: Նշենք, որ նախորդ նիստին դատարան էին ներկայացել սույն գործով 36 տուժող ոստիկան: Այսօր, սակայն թե՛ տուժողները, թե՛ 49 վկա դատարան չէին ներկայացել:

Անդրիաս Ղուկասյանը հարազատների հարցին ի պատասխան իրեն մարտական է զգում. «լիցքավորված»: Մինչ նիստը սկսվելը Անդրիաս Ղուկասյանին հարցրինք, թե ի՞նչ դիրքորոշում ունի առաջադրված մեղադրանքի վերաբերյալ: Ի պատասխան Armtimes.com-ի հարցի, Ղուկասյանն ասաց, որ որեւէ մեկին մեղադրանք առաջադրելուց պետք է հանցակազմ լինի: «Իմ մեղադրական եզրակացության մեջ հանցակազմը բացակայում է, ես եկել եմ ստեղ, որ ես մեղադրեմ, ոչ թե առարկեմ ինձ ներկայացված մեղադրանքի դեմ: Պետք է մեր հասարակությունը հասկանա եւ պատճառները հուլիսյան իրադարձությունների, ե՛ւ գլխավոր պատասխանատուների մեղավորությունը, ո՞վ է պատասխանատու այս ամենի համար ՝ Հայաստանի իշխանությունները: Համապատասխան փաստերն ու ապացույցները նրանց դեմ են»,- ասաց Ղուկասյանը:

Նիստը սկսվելուց հետո Անդրիաս Ղուկասյանը բացարկ հայտնեց մեղադրող դատախազ Պետրոս Պետրոսյանին:

Ղուկասյանը հայտարարեց, որ նախաքննության ընթացքում իրեն չծանոթացնելով գործի բոլոր նյութերին՝ քննիչը մեղադրական եզրակացությունն ուղարկել է դատախազ Պետրոս Պետրոսյանին, մինչդեռ իր կողմից այդ ժամանակ միջնորդություններ էին ներկայացվել: «Հուլիսին դատախազն իմ 30 միջնորդությունները մերժել է 1 օրում՝ պաշտպանական կողմին զրկելով իմ անմեղությունն ապացուցող էական ապացույցներ ներկայացնելու հնարավորությունից, եւ ոտնահարելով իմ իրավունքները: Սա դիտավորյալ վերաբերմունք է իմ հանդեպ: Բացի այդ, վկաները կեղծ ցուցմունքներ են տվել իմ դեմ: Գիտելիքի պակասի հետեւանք է այն, որ մեկ օրում մարդը 30 բողոքի լուծում է տալիս»: 

Դատավոր Վարդան Գրիգորյանը հորդորեց կողմերին իրար վիրավորական արտահայտություններ չասել: Ապա միջնորդությանը միացավ Անդրիաս Ղուկասյանի պաշտպան Կարեն Մեժլումյանը. «Անդրիաս Ղուկասյանին մեղադրում են Արտակ Մկրտչյանի ցուցմունքով, ըստ որի՝ նա կոչ է արել քարեր հավաքել եւ ՊՊԾ գունդը գրավել: Մենք տեսագրություններ ներկայացրինք վարույթն իրականացնող մարմնին առ այն, որ Անդրիաս Ղուկասյանի հետ Ազատության հրապարակում են եղել Դավիթ Սանասարյանը, Արմեն Մարտիրոսյանը, Լեւոն Բարսեղյանը, եւ նրանց էլ հարցաքննելու կարիք կա: Այդ դեպքում կպարզվի՝ Ղուկասյանը նման կոչեր արե՞լ է, թե՞ ոչ: Միջնորդությունը, սակայն, մերժվեց: Ի՞նչ անենք…միայն գործի ելքով շահագրգիռ դատախազը կարող էր մերժել, որը չի ցանկանում, որպեսզի իրականությունը բացահայտվի»:

Անդրիաս Ղուկասյանի մյուս պաշտպան Ինեսա Պետրոսյանն էլ հայտնեց, որ դատախազը գործի վերաբերյալ ի սկզբանե ունեցել է կողմնակի վերաբերմունք, քանի որ արդեն իսկ ընդգրկված է եղել ՊՊԾ գնդի գործով: «Ինչի մասին է խոսում, որ երեք տասնյակ բողոքներ մեկ օրում է քննվում, նա քաղաքական պատվեր է կատարել: Ակնկալում ենք, որ այս մասով իրականացվի արդարադատություն: Ինչի մեջ մեղադրում են Անդրիաս Ղուկասյանին, օդ է»: Պաշտպանի խոսքով՝ երկու դրվագով մեղադրանքների հիմքում հոգեկան խնդիրներ ունեցող վկաների ցուցմունքեր են դրված: «Դատախազն ուղղակի քաղաքական պատվեր է կատարել: Սա դատարան բերելու գործ չէ», - ասաց Ինեսա Պետրոսյանը:

Մեղադրող դատախազ Պետրոս Պետրոսյանն առարակեց ներկայացված միջնորդության դեմ, ապա միաժամանակ դիմելով դատավորին ասաց, որ միջնորդության վերաբերյալ որոշում կայացնելուց հետո դատարանը քննարկի նաեւ պաշտպանական ողմի վարքագիծը եւ համապատասխան որոշում կայացնի:

Դատավորի որոշմամբ միջնորդության վերաբերյալ դատարանի որոշումը կհրապարակվի հաջորդ նիստի մեկնարկին՝ երեքշաբթի՝ սեպտեմբերի 12-ին, ժամը 14 00-ին: