Քրոջ որդին, կինը, սանիկը, քավորը. ՀՀԿ-ական ռեկտորն ազատում է Վարդեւան Գրիգորյանի մարդկանց

Շիրակի պետական համալսարանում սկանդալային իրավիճակ է: Այս մասին քիչ առաջ armtimes.com-ի խմբագրություն ահազանգեց Շիրակի պետական համալսարանի ընդհանուր բաժնի նախկին վարիչ եւ ռեկտորի ընդունարանի նախկին գործավարուհի Լենա Խաչատրյանը եւ տեղեկացրեց, որ գործող ռեկտոր, ՀՀԿ-ի Շիրակի մարզային կառույցի ղեկավար Սահակ Մինասյանն իրեն անհիմն ազատել է աշխատանքից:

«2016-ին եկավ պարոն Մինասյանը, եւ մեկ ամիս անց սկսեց հաշվեհարդար տեսնել: Ասում էր`սրա հետ ես կանգնած, նրա հետ ես խոսում եւ այլն: Անձնական վիրավորանքներ էր ինձ հասցնում: 2016 թվականին ինչ-որ ծանուցում կորավ: Դա պրոռեկտոր Անահիտ Ֆարմանյանի ծանուցումն էր, որը ես չեմ տեսել: Դա կադրերի բաժնի աշխատանքի մեջ է մտնում: Այդ ծանուցումն իր համար պարզապես պատրվակ եղավ, որ ինձ աշխատանքից ազատի: Մինչեւ 2016 թվականի դեկտեմբերի վերջ ինձ ասում էր`գող ես, ծանուցումը դու ես գողացել: Ես ամեն օր լացով աշխատանքի եմ գնացել, լացով ետ եմ եկել: 2017 թվականի հունվարին Մինասյանը, ուսումնամեթոդական վարչության պետը եւ ռեկտորի օգնական Անահիտ Հովհաննիսյանը կանչեցին եւ ասացին, որ դիմում գրեմ: Նրանց ասացի, որ չեմ ուզում գրել, ազատվել, քանի որ ծանուցումը ես չեմ վերցրել: Մինասյանի օգնական Անահիտ Հովհաննիսյանն ասաց, որ մենք գիտենք, որ դու չես վերցրել, մեզ քո պաշտոնն է պետք, գրի, ազատվի: Նրանք ինձ ազատել են ու ծանուցման մեջ գրել են`նոր հաստիքացուցակով Ձեր մասնագիտությանը համապատասխան աշխատանք չենք կարողանում առաջարկել: Սահակ Մինասյանը գիտխորհրդի նիստի ժամանակ ասել է, թե մի հոգի կար`չխաղաց մեր խաղի կանոններով, ազատեցինք: Ինչու՞ բուհը կազինո է: Նրանք ինձ ազատել են եւ պատճառաբանում են, որ ես նախկին ռեկտոր Վարդեւան Գրիգորյանի մարդն եմ»,- armtimes.com-ի հետ զրույցում ասաց Լենա Խաչատրյանը:

Լենա Խաչատրյանն ասում է, որ դեռ 15 տարի կա իր կենսաթոշակային տարիքը լրանալուց, բայց Մինասյանը դա հաշվի չի առել:

«Ասում եմ, որ ես կբողոքեմ, պատասխանում է` դու քեզանից ինչ ես ներկայացնում, որ իմ դեմ բողոքես: Ասում է` քեզ էլ նայի, ինձ էլ նայի, ես թիկունք ունեմ, Արման Սահակյանն (ՀՀԿ խմբակցության ԱԺ պատգամավոր) իմ թիկունքն է: Նրա խոսքով`եթե ուզում ես ինստիտուտում աշխատել, պետք է իր համար տվյալներ հավաքես, տանես իրեն ներկայացնես: Ինձանից էլ էր տվյալներ ուզում»,- ասում է Խաչատրյանը:

ՇՊՀ-ի նախկին աշխատակցուհին նաեւ պատմում է, որ Սահակ Մինասյանը բուհում աջ ու ձախ աշխատանքի է տեղավորում իր բարեկամներին:

«Բարեկամներին, քավոր-սանիկներին բերել գործի է լցրել: Նրա քրոջ որդին`Միրզոյան Նարեկին տեղավորել է մեզ մոտ իրավաբան, եւ ստանում է 350 հազար դրամ աշխատավարձ, Նարեկի կնոջն ընդունել է աշխատանքի մշակույթի վարժարանում՝ որպես կազմակերպիչ: Մինասյանի գործավարուհին ստանում է 300 հազար դրամ, իսկ օգնականը`Անահիտ Հովհաննիսյանը, ստանում է 400 հազար դրամ: Այն դեպքում, երբ գիտության թեկնածու դասախոսները ստանում են 30-40 հազար դրամ: Բերել է ռեկտորի խորհրդական, ո՞րն է դրա գործառույթներն, ականջ դնե՞լը: Խորհրդականն էլ Սերգեյ Շահպարոնյանն է`իր երեխաների քավորը: Ինքն էլ ինչ-որ Արմեն Ղանդիլյանի քավորն է, դրան էլ բերել է գնումների համակարգող, բայց ազատել է նախկին աշխատակցին: Իմ տեղն էլ ընդհանուր բաժնի վարիչ է բերել, որը 26 տարեկան աղջիկ է եւ մտերիմ է իր մարդկանց հետ», -ասում է նախկին աշխատակցուհին:

Armtimes.com-ն այս թեմայի շուրջ զրուցեց նաեւ ՀՀԿ-ական ռեկտոր Սահակ Մինասյանի հետ: Նա հետ մեր զրույցը ներկայացնում ենք ստորեւ.

- Պարոն Մինասյան, համալսարանի նախկին աշխատակցուհի Լենա Խաչատրյանը պնդում է, որ իրեն աշխատանքից ազատել եք անհիմն: Ճի՞շտ է:

- Ես այդ հաստիքը վերացրել եմ, ինքն էլ ժամանակին ծանուցվել է, ազատվել է:

- Ինչու՞ եք վերացրել, ուզում եք ասել, որ հիմա բուհը ընդհանուր բաժնի վարիչ չունի՞:

- Հաստիքի վերացման պատճառը կառուցվածքային փոփոխություններն են եղել:

- Նրան ինչ-որ ծանուցման գողության մեջ մեղադրե՞լ եք:

- Ես նրան գողության մեջ մեղադրելու համար պետք է իրավական կառույցում աշխատեի:

- Պարոն Մինասյան, ճի՞շտ է, որ բուհում աշխատանքի եք ընդունել Ձեր բարեկամներին`քավորին եւ սանիկին: Օրինակ, ձեր քրոջ որդին`Նարեկ Միրզոյանը, նրա կինը, ձեր երեխաների քավոր`Սերգեյ Շահպարոնյանը, ձեր սանիկ Արմեն Ղանդիլյանն աշխատում են բուհում:

- Սերգեյ Շահպարոնյանը քաղաքի լավագույն մտավորականներից է, ինչ կապ ունի, որ իմ երեխաների քավորն է: Այո, նա իմ խորհրդականն է: Արմեն Ղանդիլյանը, որպես գնումների համակարգողի վաղուց եմ ընդունել աշխատանքի: Նախկինն ազատվել է սեփական դիմումի համաձայն: Նարեկ Միրզոյանի աշխատանքի ընդունվելը հաստատել է հոգաբարձուների խորհուրդը, իսկ կինը վաղուց է աշխատում:

- Պարոն Մինասյան, ինչպե՞ս է ստացվել, որ քավոր-սանիկ, բարեկամներով աշխատում եք ինստիտուտում:

- Ես բարեկամներ չունեմ ինստիտուտում աշխատող:

- Բայց ես թվարկեցի, իսկ դուք հաստատեցիք...Ի՞նչ սկզբունքով է եղել նրանց ընտրությունը:

- Ես, որ եկել եմ նույնիսկ վարորդին չեմ փոխել, բայց իրավունք ունեի խորհրդականին փոխելու, իրավունք ունեի դիմումով ազատված մարդկանց նորով փոխարինելու:

Այսօր համալսարանում աշխատող դասախոսներ, հայտնի քաղաքագետ Գագիկ Համբարյանը եւ պատմաբան Հովհաննես Խորիկյանը բաց նամակով դիմել են Սերժ Սարգսյանին եւ Կարեն Կարապետյանին, նշելով, որ. «Ռեկտորն ավերում է բուհը»:

Այս նամակի վերաբերյալ Մինասյանն ասաց, որ կլինի հրապարակային պատասխան:

Հիշեցնենք, որ Գյումրու մանկավարժականում նման իրավիճակ առկա էր նաեւ ապրիլ ամսին: Աշխատակիցներին ազատում էին կրկին Վարդեւան Գրիգորյանի հետ կապելով: Վարդեւան Գրիգորյանը ԲՀԿ-ական, այժմ «Ծառուկյան» խմբակցության ԱԺ պատգամավոր է: