Բանը բուրդ է. ՀԿԿ-ում հեղաշրջման են պատրաստվում

Տպագրվել է «Հայկական Ժամանակ» օրաթերթի՝ 2004 թվականի սեպտեմբերի 24-ի համարում

Հայկոմկուսի կանոնադրությամբ՝ 2004-ի ապրիլին լրացել է այն ժամկետը, երբ ՀԿԿ-ն պետք է հրավիրեր իր հերթական համագումարը: Սակայն ՀԿԿ առաջին քարտուղար Ռուբեն Թովմասյանը տարբեր անհեթեթ պատճառաբանություններով վեց ամսից ավելի է հետաձգում է համագումարի հրավիրումը: Պատճառը, ըստ կոմկուսի բյուրոյից վտարված Նորիկ Պետրոսյանի, Խորեն Թռչունիչի եւ Սանատրուկ Սահակյանի, այն է, որ Թովմասյանի բանն այլեւս բուրդ է: «Եթե նա արժանապատվություն եւ խելք ունի, մինչեւ համագումար պետք է հրաժարական տա: Այլապես այլեւս անկասկած է, որ համագումարը նրան անվստահություն է հայտնելու, եւ նա ՀԿԿ առաջին քարտուղարի պաշտոնից հեռացվելու է որպես «իզգոյ», որը պարելով իշխանությունների դուդուկի տակ՝ փորձեց վարկաբեկել կոմկուսի բարի անունը»,- երեկ մեզ հետ զրույցում ասաց ՀԿԿ նախկին երկրորդ քարտուղար Սանատրուկ Սահակյանը:

Իսկ որ Թովմասյանի գործերն իսկապես լավ չեն, դա են վկայում վերջին շաբաթներին մի շարք մարզերի ՀԿԿ շրջկոմներում կազմակերպված ժողովները, ուր հրավիրված են եղել ե՛ւ ՀԿԿ առաջին քարտուղարը, ե՛ւ նրա հակառակորդ եռյակը: Հատկապես սկանդալային են անցել Աշտարակի, Չարենցավանի, Աբովյանի ՀԿԿ  շրջկոմների ժողովները, իսկ Մարտունիում շարքային կոմունիստները հարձակվել են Ռուբեն Թովմասյանի վրա՝ նրան մեղադրելով կոմունիստին անհարիր արարքի, դավաճանության մեջ: «Որքան էլ Թովմասյանը, որդեգրելով այս իշխանություններին ներհատուկ գործելաոճ, այս օրերին նույն իշխանությունների փողերով փորձի կաշառել շրջկոմների որոշ ղեկավարների, նա չի կարողանալու կաշառել 50 հազարանոց կուսակցությանը, որը տեսնում է, թե երբեմնի հզոր կուսակցությունից այսօր ինչ է մնացել:

Իսկ ՀԿԿ-ից մնացել է իշխանություններին հպատակ մի զանգված, որն էլ Ռ.Թովմասյանը, շարունակելով իր նախորդի՝ Վլադիմիր Դարբինյանի ավանդույթները, հպատակորեն ծառայեցնում է իշխանությունների կամքին ու ցանկություններին: Ու երբ Մարտունիում, շարքային կոմունիստների ներկայությամբ, մենք Թովմասյանին փաստերով մեղադրեցինք ծախվածության մեջ, նա սկսեց կմկմալ եւ նույնիսկ չէր կարողանում տղամարդավարի արդարանալ: Ուստի միակ հակաքայլը, որ նա պատրաստվում է կիրառել՝ համագումարը հերթական անգամ հետաձգելն է: Եթե նա այնքան անգրագետ է ու չի հասկանում, որ ո՛չ համագումարը կարող է հավերժորեն հետաձգել, ո՛չ էլ մեզ կարող է զրկել համագումարի պատվիրակ լինելու իրավունքից, մենք նման կոմունիստին ոչնչով օգնել չենք կարող»,- ասում է Ս. Սահակյանը:

Ի դեպ, երեկ մեր զրուցակից կոմունիստներն անկեղծորեն խոստովանում էին, որ իշխանություններին ծախվածության առումով ՀԿԿ նախկին առաջին քարտուղար Վլ.Դարբինյանը գոնե անկեղծ էր: «Այդ մարդն այնքան անկեղծ էր, որ երբ մի քանի բաժակ խմում էր՝ լաց էր լինում կոմկուսի անօգնական վիճակի համար եւ, օղու բաժակը խփելով պատին, խոստովանում էր, որ ինքը կուսակցության կարիքները հոգալու համար փող է վերցնում Սերժ Սարգսյանից: Դարբինյանն այնքան ծանր էր տանում սեփական ծախվածությունը, որ երբ նրան մեղադրում էին ծախվածության մեջ, եղել են դեպքեր, երբ հենց ՀԿԿ գրասենյակում ուշագնաց է եղել: Այս մեկի (Ռ.Թովմասյանի-խմբ.) ձեռքին բռնում ես իշխանությունների տված կաշառքը, ասում է՝ կուսակցական անդամավճար է»,- երեկ խոստովանեց ՀԿԿ շրջկոմի քարտուղարներից մեկը:

Չնայած՝ ՀԿԿ կենտկոմի անդամ Նորիկ Պետրոսյանը հայտնաբերել է փաստեր, որոնք վկայում են, որ Թովմասյանի հոգեւոր հայր Դարբինյանը եղել է կլասիկ պրովոկատոր. «Նա, լինելով կոմունիստ, 1990թ. «Խորհրդային Հայաստան» թերթում տպագրում է  «Գոյապայքար հանուն վաղվա» հակակոմունիստական հոդվածը, իսկ Դարբինյանի հայրը, պարզվում է, դատապարտվել է ազատազրկման,  որովհետեւ կտրել է Մոսկվայի հետ կապող կառավարական հեռախոսագիծը: Եւ ահա նույն այդ պրովոկատոր Դարբինյանի եւ իշխանությունների սադրանքով ՀԿԿ-ին պարտադրվեց Դարբինյանի հակակոմունիստական գործի արժանի շարունակող Ռուբեն Թովմասյանը, որից էլ կոմկուսը պիտի ազատվի միասնական ջանքերով»,- ասում է Նորիկ Պետրոսյանը:   

Բնականաբար, երեկ վերը ասվածների վերաբերյալ մենք փորձեցինք ստանալ նաեւ Ռուբեն Թովմասյանի մեկնաբանությունը: Սովորաբար ջենթլմեն Թովմասյանը երեկ ահարկու տրամադրության մեջ էր: «Ի՞նչ եք բոլորդ կպել էդ համագումարից: Ձե՞զ ինչ, թե համագումարը ես երբ կանեմ»,- սարսափազդու ճվաց ընկեր Թովմասյանն ու այլեւս հրաժարվեց որեւէ բառ ասելուց: Սույն վայրենաբարո տեսարանից ակնհայտ դարձավ, որ նրա պաշտոնավարության օրերն իսկապես հաշված են: Եթե, իհարկե, իշխանությունը Թովմասյանին պահպանելու համար կտրուկ միջոցառումներ չձեռնարկի:

Նաիրա Զոհրաբյան