«Հայաստան- Իրաք հարաբերությունների դաշտը խիստ փոխշահավետ է». Դավիթ Լոքյան

ՀՀ տարածքային կառավարման եվ զարգացման նախարար, հայ-իրաքյան հանձնաժողովի  համանախագահ Դավիթ Լոքյանը եվ Իրաքի Հանրապետության գյուղատնտեսության նախարար, հանձնաժողովի իրաքյան համանախագահ Ֆալահ Հասան Զիդան ալ-Լուհայիբին երկօրյա նիստի աշխատանքների ավարտին սեպտեմբերի 26-ին ստորագրել են  տնտեսական, առեվտրային, գիտական եվ տեխնիկական հարցերով հայ-իրաքյան հանձնաժողովի 4-րդ նիստի համատեղ արձանագրությունը:

Կողմերը համաձայնել են, որ կարեվոր է ստեղծել նոր պայմաններ՝ նպատակ ունենալով երկկողմ համագործակցությունը բարձրացնել նոր մակարդակի վրա: Հանձնաժողովի համանախագահները հայտարարել են, որ երկկողմանի  համագործակցության  ոլորտները բազմաթիվ են. առեվտրաշրջանառություն, ներդրումներ, բանկային եվ  նավթային համակարգ, գյուղատնտեսություն, զբոսաշրջություն, մշակութային, էներգետիկ, կրթական, առողջապահական, տեղեկատվական  տեխնոլոգիաներ, երիտասարդություն, դիվանագիտություն եվ այլն: Ընդգծվել է հատկապես  Հայաստանից Իրաք ցամաքային ճանապարհով բեռափոխադրումների կազմակերպման հարցը: Կողմերը համաձայնել են խրախուսել երկու երկրների գործարարներին՝ ստեղծել համատեղ  ձեռնարկություններ ներդրումների բոլոր ոլորտներում:

Նախարար Դ. Լոքյանի խոսքով, երկօրյա նիստի ընթացքում  Ֆիքսվել են այնպիսի առանձնահատուկ ուղղություններ, որոնք  հետագա աշխատանքի ընթացքում հստակ արդյունք են ապահովելու:  «Արձանագրված ուղղությունները խիստ շոշափելի են եվ ռեալ, եվ ամենափոքր ակտիվության պարագայում  կարող ենք արձանագրել լրջագույն արդյունքներ: Առաջին կարեվոր խնդիրը, որ հանձնաժողովը պարզաբանել է,  դա առեվտրային ոլորտում երկու երկրների համագործակցության խնդիրն է: Իրաքյան կողմն առաջարկում է, որ մենք  անպայման Բաղդադում ունենանք մշտական գործող ապրանքային ցուցահանդես, ինչը հնարավորություն կտա ապահովել մեր երկրի արտադրանքի ծանոթացումը Իրաքում: Առաջարկ է եղել ակտիվ մասնակցել  նաեվ  այս տարի Բաղդադում կայանալիք տոնավաճառին:

Բոլորիս հասկանալի է, որ  Հայաստան-Իրաք  հարաբերությունների դաշտը խիստ փոխշահավետ է: Կարողություններ, հնարավորություններ կան յուրաքանչյուր երկրում եվ մեր թիմերին է  վստահված այդ խնդիրը լուծել ու մենք պատավոր ենք այն իրականացնել»,-ասել է նախարար Լոքյանը: Նա իր գոհունակությունն է հայտնել  հանձնաժողովի անդամներին, փոխնահագահներին, որոնք ջանք են դրել երկկողմանի  հարաբերություններն ակտիվացնելու համար:

Իրաքյան համանախագահ Ֆալահ Հասան Զիդան ալ-Լուհայիբին  նույնպես շնորհակալություն է հայտնել հանձնաժողովի անդամներին հետեվողական աշխատանքի համար: «Այս նիստը շատ մեծ նշանակություն ունի բոլորիս համար եվ փաստաթուղթը, որը ստորագրեցինք,  համապարփակ է եվ ընդգրկում է այն բոլոր կարեվորագույն ոլորտները, որոնց մասին նշեց  նախարար Լոքյանը: Հույս ունեմ, որ Իրաքի եվ Հայաստանի համար կարեվոր ոլորտներում ձեռք բերված պայմանավորվածությունները կյանքի կկոչվեն մոտ ապագայում: Կարեվորում եմ տնտեսական եվ ֆինանսական համագործակցումը երկու երկրների Կենտրոնական, նաեվ մասնավոր բանկերի միջեվ եվ ընդհանուր մեխանիզմի մշակումը: Մենք պայմանավորվել ենք ակտիվացնել մշակույթի, զբոսաշրջության ոլորտները, քանի որ  Հայաստանը շատ գեղեցիկ երկիր է եվ վստահաբար կարող ենք դա կյանքի կոչել: Այդ համատեքստում պայմանավորվել ենք խրախուսել իրաքցի տուրիստների այցը Հայաստան եվ արագ կարգավորել օդային եվ ցամաքային ճանապարհներով փոխադրումների հարցը: Մեր պատվիրակությունը ներառում է բոլոր նախարարություններից աշխատակիցներ եվ   լիահույս ենք, որ հաջորդ տարի կյանքի կոչած կլինենք այս բոլոր կետերը»,-ասել է իրաքյան համանախագահը:

Համանախագահների ելույթից հետո ստորագրված արձանագրության եվ հետագա անելիքների մասին կարծիքներ են հայտնել նաեվ երկու երկրների դեսպանները, կառավարությունների ներկայացուցիչները: Նիստի ավարտից հետո կայացած ասուլիսում հայ-իրաքյան հանձնաժողովի համանախագահները ԶԼՄ-ների ներկայացուցիչներին ներկայացրել են ստորագրված արձանագրության հիմնական ուղղությունները, առաջիկա անելիքները, պատասխանել լրագրողների հարցերին: