Սարի թաղում զինված դիմադրություն է ցույց տրվել, տուժել են ոստիկաններ. հատված՝ մեղադրանքից

Էրեբունի եւ Նուբարաշեն վարչական շրջանների ընդհանուր իրավասության դատարանում դատավոր Վարդան Գրիգորյանի նախագահությամբ այսօր շարունակվում է Անդրիաս Ղուկասյանի գործով դատական նիստը:

Դատարանն այսօր անցավ դատաքննության փուլին: Մեղադրող դատախազ Պետրոս Պետրոսյանը հրապարակեց Անդրիաս Ղուկասյանի մեղադրական եզրակացությունը:

Ըստ այդմ՝ Ղուկասյանը մեղադրվում այն բանի համար, որ նա 2016 թվականի հուլիսի 29-ին  կազմակերպել է զանգվածային անկարգություններ, ինչպես նաեւ փորձել է միանալ հուլիսի 17-ին ՊՊԾ գնդի տարածքում գտնվող շենքեր, շինություններ զավթած, ոստիկաններին եւ բժիշկներին պատանդ պահած կազմակերպված զինված խմբին: Սակայն հանցագործություններն ավարտին չեն հասցրել իր կամքից անկախ հանգամանքներում:

Մեղադրական եզրակացության մի որոշ հատված կապված էր ՊՊԾ գունդը գրված «Սասնա ծռեր» խմբի անդամներին: Ըստ այդմ՝ ստեղծված իրավիճակն ավելի սրելու համար Անդրիաս Ղուկասյանը մտադրվել է Երեւան քաղաքում զանգվածային անկարգություններ կազմակերպել՝ նպատակ ունենալով խոչընդոտել կազմակերպված խմբի հանցավոր գործողությունների խափանմանը, կանխմանը, զավթածն ու պատանդներին ուղղված իրավապահների գործունեությանը: «Իր հանցավոր մտադրությունն իրականացնելու նպատակով Անդրիաս Ղուկասյանը 2016 թվականի հուլիսի 29-ին ցերեկը հանդիպել է իր ծանոթ Գեղամ Սահակյանին, վերջինինս խնդրել է գնալ եւ ուսումնասիրել ՊՊԾ գնդի հարակից տարածքում ծառայություն իրականացնող ոստիկանական ուժերի տեղեկայումը: Գեղամ Սահակյանից նշված տեղեկատվությունը ստանալուց հետո համարելով, որ իր ծրագիրը իրագործելի է, նույն օրը՝ ժամը 19:30-ին, Ազատության հրապարակում մեկնարկած զանգվածային միջոցառման ընթացքում Անդրիաս Ղուկասյանը, Արմեն Մարտիրոսյանը, Դավիթ Սանասարյանը հանդես են եկել ելույթներով, որոնց ժամանակ մարդկանց կոչ են արել դուրս գալ փողոց եւ սատարել ՊՊԾ գունդը զավթած անձանց: Ավարտից հետո մինչեւ ապօրինի երթով մարդկանց Սարի թաղ առաջնորդելը Անդրիաս Ղուկասյանն առանց բարձրախոսի մարդկանց կոչ է արել քարեր վերցնել՝ ոստիկանների վրա նետելու համար: Այնուհետեւ Արմեն Մարտիրոսյանը, Դավիթ Սանասարյանը, Անդրիաս Ղուկասյանը ստանձնել են ապօրինի երթի ղեկավարումը»,- ասվում է մեղադրական եզրակացությունում:

Այնուհետեւ զանգվածային անկարգության մասնակիցները հասնելով Նար-Դոս փողոց՝ հանկարծակի երթի ուղղությունը շեղել են դեպի Սարի թաղ:

Սարի թաղում նրանք վանկարկումներով իրենց աջակցությունն են հայտնել ՊՊԾ գունդը զավթած անձանց, հնչել են նաեւ փողոցը փակելու, գունդ հասնելու կոչեր: Այդ ընթացքում գունդը զավթած կազմակերպված խմբի անդամները հրազենային կրակոցներ են արձակել Սարի թաղի ուղղությամբ՝ միաժամանակ նպատակ ունենալով ոգեւորել Սարի թաղում զանգվածային անկարգություններին մասնակցող անձանց: «Կրակոցների հետեւանքով ոստիկանության մեկ ծառայող հրազենային ծանր մարմնական վնասվածք է ստացել, ոստիկանության երկու ծառայողներ վնասվածքներ են ստացել ստորին վերջույթների շրջանում: Արձակված կրակոցներից վնասվել է ոստիկաններին տեղափոխող մեքենան,  Սարի թաղի տներից մեկը, ինչպես նաեւ իրական վտանգ է ստեղծվել զանգվածային միջոցառման մասնակիցների կյանքի եւ առողջության վրա: Ստեղծված անմիջական վտանգը, ինչպես նաեւ ՊՊԾ գնդի տարածք հնարավոր անձի ներթափանցումը կանխելու նպատակով հավաքվածներին ընդառաջ են գնացել ոստիկանության տարբեր ստորաբաժանումներ: Ոստիկանության ներկայացուցիչներն Արմեն Մարտիրոսյանի հետ բանակցելու միջոցով զանգվածային միջոցառման մասնակիցներից պահանջել են հեռանալ այդ տարածքից, հորդորելով գնալ կամ Խորենացի, կամ Ազատության հրապարակ, որը չի արվել»,- նշվում է մեղադրական եզրակացությունում:

Ըստ մեղադրանքի՝ հավաքված բազմությունը հետզհետե ավելի ագրեսիվ է դարձել, չի ենթարկվել ոստիկանության օրինական պահանջներին:

«Այն բանից հետո, երբ Արմեն Մարտիրոսյանը բերման է ենթարկվել, հավաքված բազմությունը, ժամը 22:30-ի սահմաններում շարունակել է զանգվածային անկարգությունները, որոնք ուղեկցվել են ոստիկանության ծառայողների նկատմամբ իրականացվող բռնություններով, զինված դիմադրություն ցույց տալով, գույքի ոչնչացմամբ: Այդ ընթացքում բազմությանը հրահանգվել է քարեր նետել ոստիկանների վրա: Քարեր են նետվել՝ ինչի հետեւանքով ոստիկանության մի քանի ծառայողներ ստացել են մարմնական վնասվածքներ: Զանգվածային անկարգությունների կազմակերպման եւ կատարման արդյունքնում վտանգվել է հասարակական անվտանգությունը, որը վերականգնվել է ոստիկանության գործողությունների ժամանակ»,- ասվում է հրապարկված մեղադրական եզրակացությունում:

Մեղադրանքի հրապարակումից հետո Անդրիաս Ղուկասյանը դատավորի հարցին ի պատասխան ասաց, որ ներկայացված մեղադրանքում, այսպես կոչված, զանգվածային անկարգություններն ունեն շարունակություն, բայց չունեն սկիզբ: «Ինչպես նաեւ սկիզբ չունեն պատանդներ վերցնելու, շենքեր գրավելու  եւ ապօրինի զենք կրելու գործողությունները, սակայն պնդում են, որ այդ գործողությունները մնացել են անավարտ՝ ոստիկանության գործողությունների արդյունքում: Այս առումով ինձ պարզ չի մեղադրանքի էությունը, ինչպես կարող է լինել մեղադրանք, եթե բացակայում է հանցակազմը: Ինձ պարզ է, որ սա շինծու մեղադրանք է, սուտ է եւ այդ մեղադրանքը ես չեմ ընդունում»,- հայտարարեց Ղուկասյանը: