Ամեն ինչ ընթանում է ըստ ծրագրվածի. փնտրում են 10 հազար հեղափոխական

Տպագրվել է «Հայկական Ժամանակ» օրաթերթի՝ 2005 թվականի փետրվարի 24-ի համարում

Հարցազրույց «Նոր ժամանակների» նախագահ Արամ Կարապետյանի հետ:

- Պարոն Կարապետյան, ինչպես են ընթանում ազգային հեղափոխության նախապատրաստման աշխատանքները:

- Այսօր մենք կատարում ենք երկու շատ կարեւոր աշխատանք. ուժեղացնում ենք կուսակցության կառույցները տեղերում եւ քաղաքական խորհրդակցություններ ենք անցկացնում քաղաքական այլ կուսակցությունների եւ արտասահմանյան երկրների ներկայացուցիչների հետ: Մենք գիտակցում ենք, որ վճռական գործողությունների համար մեզ անհրաժեշտ է լուրջ ունակություններ եւ գաղափարական պատրաստվածություն ունեցող նվազագույնը 10 հազար մարդ, ովքեր պատրաստ կլինեն բանակային իրավիճակի: Այսինքն կանգնել մի քանի գիշեր, անկախ նրանից` ո՞ր կուսակցությունները կմիանան մեզ, որոնք ոչ: Հանդիպելով այլ կուսակցությունների հետ մենք ցանկանում ենք ճշտել, թե որքանով են նրանք պատրաստ մասնակցել հեղափոխական փոփոխություններին, նրանց հնարավորության սահմանները: Միջազգային հանրությանը տարբեր ուղղություններով փորձում ենք բացատրել մեր գործողությունների տրամաբանությունը:

- Որքա՞ն է տեւելու ապրիլին սկսվող հեղափոխությունը:

- Նշելով հեղափոխության սկզբի ժամկետը մենք չենք նշելու ավարտի կոնկրետ ժամկետներ: Մենք շատ լավ տեղեկացված ենք, որ իշխանությունները հեղափոխության վարկաբեկումը տանելու են հենց այդ ուղղությամբ. ապրիլին չստացվեց, մայիսին էլ չի ստացվելու եւ այլն: Հեղափոխության հաջողության  համար շատ կարեւոր է ճշտել երկու հանգամանք. կա՞ հասարակության մեջ բավարար հեղափոխական ավյուն եւ կա՞ այն քաղաքական մոմենտը, որը այդ հեղափոխական ավյունը կվերածի պոռթկման: Ապրիլին մենք ընդամենը սկսելու ենք հասարակության հետ շփումը, գնալու ենք շրջաններ, որպեսզի պարզենք, թե կա՞ այդ կրիտիկական զանգվածը:

- Այսինքն, եթե պարզվի, որ անհրաժեշտ կրիտիկական զանգված չկա, հեղափոխություն անելու գործը կդադարեցվի՞:

- Ենթադրենք տեսանք, որ չկա, ընդունեցինք փաստը, բայց դա չի նշանակելու հրաժարվել գործընթացից, որովհետեւ ես միանշանակ համոզված եմ, որ Հայաստանում անհրաժեշտ են համակարգային փոփոխություններ: Եթե անհրաժեշտ քանակ չկա, պետք է հասկանալ որքան կա, ինչ գործընթացներ են պետք, որ այն դառնա կրիտիկական: Իմ անձնական մոտեցումն այն է, որ այդ կրիտիկական զանգվածը կա, ուղղակի քաղաքական պահի անորոշությունն է ինձ ստիպում չնշել կոնկրետ գործողությունների ժամկետներ:

- Ձեզ մեղադրում են, որ սկսելով ինչ-որ գործողություններ եւ դրանք ավարտին չհասցնելով դուք ընդամենը հասարակության մեջ առկա դժգոհության գոլորշին եք բաց թողնում:

- Անցյալ տարի ապրիլին ես էի ընդդիմությանը կոչ անում չգնալ ակտիվ գործողությունների, որը ի վերջո վերածվեց ձեր ասած գոլորշի բաց թողելուն: Այսօր մեր նպատակն է պարզել այդ գոլորշու քանակը եւ եթե ես համոզվեմ, որ իրոք չկա հեղափոխության հաջողության համար անհրաժեշտ կրիտիկական զանգվածը, ապա իրոք ցանկացած ակտիվացում կլինի գոլորշի բաց թողնել:

- Հայտնի է ձեր հեղափոխության նպատակը` իշխանափոխություն, սակայն հայտնի չէ, թե ինչպիսի գործողություններով եք հասնելու ձեր նպատակի  իրականացմանը:

- Կարծում եմ, որ այս անգամ լինելու է սցենարների հանրագումար: Այսինքն լինելու են համաժողովրդական պոռթկմանը բնորոշ գործողություններ, հանրահավաքներ, երթեր, ցույցեր, իշխանությունը ներկայացնող որոշակի անձանց հրաժարականներ, իշխանության հրահանգները կատարելուց հրաժարվելու դեպքեր:

- Հեղափոխություն անելու ձեր մտադրության մասին հայտարարելուց հետո իշխանությունների կողմից եղե՞լ են փորձեր ձեզ հետ հանդիպելու եւ ձեր մտադրությունից հրաժարվելու առաջարկություններ:

- Ոչ նման հանդիպումներ չեն եղել:

- Հնարավոր համարու՞մ եք, որ նման առաջարկներ կարող են լինել, երբ դուք սկսած կլինեք ձեր գործողությունները երբ ձեզ կխոստանան, որ պատրաստ են հեղափոխություն վերեւից տարբերակին:

- Մենք հստակ սահմանել ենք հեղափոխություն վերեւից սցենարը. խորհրդարանի լուծարում, նոր ընտրություններ, նոր կառավարության ձեւավորում: Եթե դա կլինի, մենք կմասնակցենք այդ գործընթացին: Սակայն այն ուժերը, որոնք պետք է գան խորհրդարան, լինեն նոր ձեւավորված կառավարության կազմում ոչ մի կապ չպիտի ունենա ներկա իշխանությունների հետ:

- Ռոբերտ Քոչարյանի, Սերժ Սարգսյանով փոխարինելը ձեզ համար վերեւից հեղափոխությո՞ւն է, թե՞ ոչ:

- Դա Հայաստանի համար ամենատեւական, ամենախորքային ճգնաժամի մեջ մտնելու սցենարն է: Դա ոչ թե հեղափոխություն է, այլ կարելի է ասել իսկական հակահեղափոխական գործընթաց:

- Հեղափոխության հաղթանակից հետո ինչպե՞ս եք վարվելու օլիգարխների հետ:

- Ես շատ քիչ եմ ծանոթ այդ մարդկանց հետ, այնպես որ որեւէ անձնական հակակրանք կամ համակրանք նրանց նկատմամբ չունեմ: Լինելու է մի հստակ ճամփաբաժան, արդյոք նրանք իրենց ունեցվածքը ձեռք են բերել կրիմինալ, թե ոչ կրիմինալ ճանապարհով: Մենք գիտենք, որ վերջին տարիներին Հայաստանում սպիտակ բիզնեսով զբաղվելը գրեթե անհնար է եւ այդ պատճառով լինելու է տնտեսական հանցագործությունների ամնիստիա, սակայն չի լինելու, որ երեկ փող աշխատելու համար մարդ սպանողը ազատվի պատասխանատվությունից:

- Ինչպիսին է լինելու հեղափոխությունից հետո Ռոբեր Քոչարյանի, Սերժ Սարգսյանի, Արթուր Բաղդասարյանի, Անդրանիկ Մարգարյանի ճակատագիրը:

- Նմանատիպ խնդիրները պետք է որոշվեն ապագայում:  Եթե շարժումը հեղափոխական է եւ իշխանությունները հեղափոխության նկատմամբ ճնշումներ գործադրեն, իսկ հեղափոխությունը այնուամենայնիվ հաղթի, հաջորդ պահից մարդիկ հարցնելու են, թե ինչու էին ճնշում: Երկրի հեղինակությունից ելնելով ճիշտ չեմ համարում նախկին նախագահների նկատմամբ հատուկ հետապնդում սկսելը: Սակայն ընդունելի չեմ համարում նաեւ, որ գա այնպիսի իշխանություն, որը գալիս է ամեն ինչ կոծկելու մտադրությամբ: Այսօր էլ ընդդիմադիր դաշտում կան գործիչներ, որոնք պատրաստ են իշխանության գալ ամեն ինչ կոծկելու պայմանով:

- Ձեզ ներկայացվող մյուս մեղադրանքն էլ այն է, որ ձեր հեղափոխությունը ղեկավարվում է դրսից, մասնավորապես Ռուսաստանից: Դուք նախորդ օրն եք վերադարձել Մոսկվայից եւ արդյոք այդ փաստը կարելի է դիտել որպես ասվածի ապացույց:

- Ես գիտեմ, թե ովքեր են դա տարածում, ինչ նպատակով, ում է ուղղված: Ուզում են բացատրել, որ սա ռուսական ուժ է եւ ամերիկացիներ նրա հետ գործ չունեք: Մեզ մեղադրում են, որ մենք մահակ ենք Ռուսաստանի իշխանությունների ձեռքին: Սակայն Հայաստանի մամուլը կարդալով հասկանում ես, որ ՌԴ իշխանությունները Հայաստանի իշխանությունների հետ այնպիսի հարաբերությունների մեջ չեն, որ մահակի կարիք զգան: Իսկ եթե կան կոնկրետ ապացույցներ, եթե Դավիթ Շահնազարյանը, որը նախկինում եղել է ԱՊՎ ղեկավար եւ ունի լուրջ տվյալներ, ապա դրանք պարտավոր է ներկայացնել ԱԱԾ տնօրեն Գորիկ Հակոբյանին, որպեսզի նա կարողանա կանխել Հայաստանի ներքին գործերին, արտաքին միջամտության այդ փորձը: Ես չեմ թաքցնում, որ թե Ռուսաստանի, թե Միացյալ Նահանգների տարբեր ներկայացուցիչների հետ աշխատանք է տարվում մեր դիրքորոշումը ներկայացնելու համար: Մինչեւ այսօր ոչ իշխանություններից, ոչ ընդդիմությունից, ոչ էլ դրսի ուժերից չեմ լսել հեղափոխության անհրաժեշտությունը հերքող որեւէ փաստ: Միակ բանը, որ ասում են այն է, որ հեղափոխություն չի լինի, որովհետեւ չի լինի երբեք: 

Ավետիս Բաբաջանյան