Արուճում գտնված զինանոցը կապ ունի՞ Նորքի բանդայի հետ. ձերբակալվածն անցել է այս գործով

Օրեր առաջ Արագածոտնի մարզի Արուճ գյուղում մեծ քանակությամբ զենք-զինամթերք է հայտնաբերվել. այդ գործով ձերբակալվածը 57-ամյա Գնել Հովհաննիսյանն է:

Քննչական կոմիտեն նախօրեին հայտնել էր մի ամբողջ զինանոցի հայտնաբերման մասին: Մեր տեղեկություններով, հայտնաբերված զենք-զինամթերքը կարող է կապ ունենալ 2015 թվականին Նորքում ԱԱԾ-ի կողմից մեծ աղմուկով վնասազերծված զինված խմբի հետ: Մեզ հայտնի դարձավ, որ Գնել Հովհաննիսյանն անցել է այս գործի շրջանակներում որպես մեղադրյալ: Զինված խմբի գործով նախաքննության ընթացքում նրա մոտից տրոտիլ էին հայտնաբերել եւ ապօրինի զենք-զինամթերք պայթուցիկ նյութեր պահելու մեղադրանքով կալանավորել: Գնել Հովհաննիսյանը, սակայն երկար չի մնացել անազատության մեջ. նա որոշ ժամանակ անց 1 միլիոն դրամ գրավի դիմաց ազատ է արձակվել:

Դատական տեղեկատվական համակարգից տեղեկացանք, որ Գնել Հովհաննիսյանը 2016 թվականին անհայտ անձից ապօրինի կերպով ձեռք է բերել եւ իր Երեւան քաղաքի Շարուրի փողոցի 13-րդ շենքի 29-րդ բնակարանին կից ավտոտնակում ապօրինի պահել փշրտող պայթուցիկ նյութ հանդիսացող երեք հատ գործարանային արտադրության 200 գրամանոց տրոտիլային պայթաղյուսներ, ռազմամթերք հանդիսացող թվով երեք հատ գործարանային արտադրության «ЭДП» տեսակի էլեկտրոդետոնատորներ, որոնք 2016թ. սեպտեմբերի 30-ին կատարված խուզարկությամբ հայտնաբերվել են հիշյալ բնակարանին կից ավտոտնակում: Նա մեղավոր է ճանաչվել ՀՀ քրեական օրենսգրքի 235 հոդվածի 1-ին մասով (ապօրինի կերպով զեքն զինամթերք, պայթուցիկ նյութեր, ռազմամթերք ձեռք բերելը, կրելը կամ փոխադրելը) եւ դատապարտվել ազատազրկման երեք ամիս ժամկետով:

Այս անգամ զինանոցը հայտնաբերվել է Գնել Հովհաննիսյանի հայրական տանը՝ թաքստոցում: Մեր զրույցում Արուճի գյուղապետ Բագրատ Մարտիրոսյանն ասաց, որ Գնել Հովհաննիսյանն իրենց գյուղի բնակիչ չէ, ապրում է Երեւանում: «Էդ տանն իր թոշակառու ծնողներն են մնում: Էլ ես ուրիշ ինֆորմացիա չեմ կարող տալ, որովհետեւ գյուղում չեմ եղել, չգիտեմ ինչ է եղել: Լրատվությունից եմ իմացել, որ եկել գնացել են (նկատի ունի իրավապահներին)»,- եզրափակեց գյուղապետը:

Տեղեկացանք, որ Գնել Հովհաննիսյանը ամուսնացած է, ունի երկու երեխա: Մասնակցել է հայրենիքի սահմանների պաշտպանության համար մարտական գործողություններին, ԵԿՄ անդամ է:

Ըստ պաշտոնական հաղորդագրության՝ 2017թ.-ի նոյեմբերի 02-ին ՀՀ ոստիկանության Երևան քաղաքի վարչության օպերատիվ կառավարման կենտրոն քաղաքացուց ահազանգ էր ստացվել՝ Աբովյանից Սպիտակ մեկնող սեւ գույնի Լեքսուս ավտոմեքենայի մեջ անօրինական զենքի առկայության մասին: Զինանոցը, սակայն հայտնաբերվել է փետրվարի 23-ին:

Ստորեւ ներկայացնում ենք Գնել Հովհաննիսյանի հորական տանից խուզարկությամբ հայտնաբերված զենք-զինամթեքների ցանկը.

Որսորդական հրացանի կոտորակներ, 5,45 տեսակի, 62,54 եւ այլ տեսակի փամփուշտներ, որոնց թվում նաեւ՝ զրահահատ-հրկիզվող, լուսացրող փամփուշտներ, ինչպես նաեւ տարայի մեջ լցված «սոկոլ» տեսակի վառոդի խառնուրդ, թվով 3 ինքնաձիգի կողապայուսակ, ՀՄՄ-ի դիտման սարք, զրահամեքենայի ՏՊԿՈՒ 2Բ տեսակի օպերատոր նշանառուի տեսասարք, գնդացիրի բռնիչ, «ՊԿ» տեսակի ընթացքի նշանոց՝ իր նշանահատիկով, ինքնաձիգի գարեփուկ, 800գ. տարողությամբ տարայով «տաուտ», արբալետի նետեր, ազդանշանային հրթիռի ինքնաշեն սարք, 7,6.39 տրամաչափի ձեռքի գնդացրի փամփշտատուփ, ինքնաշեն եղանակով պատրաստված 32 մմ. որսորդական հրացանի խզակոթ՝ իր փողակալով, թվով 1 «ԿԱՐԱԲԻՆ» տեսակի հրացանի փակաղակ, «ԱԿՄ» տեսակի ինքնաձիգի պահեստատուփեր, թվով «ԱԿՄ» տեսակի ինքնաձիգի փամփուշտներ, ինքնաձիգի սվին դանակ, ինքնաձիգի 4 խլացուցիչ, «ՆԱԳԱՆ» տեսակի ատրճանակ, «ԴՐԱԳՈՒՆՈՎ» տեսակի դիպուկահար հրացանի «ՑԲԴ» փող, «ԱԿՄ» տեսակի ինքնաձիգի փող, «Ֆ1» տեսակի բեկորային նռնակներ, «ՊԳԴ5», «ՊԳ45», «ՊԿԳ3» տեսակի նռնակներ, մի քանի  տեսակի պայթուցիկ լիցքեր, էլեկտրոդետոնատոր, քողարկվող դիմակ եւ զինամթերքի այլ տեսակներ։

Մեր տեղեկություններով՝ Գնել Հովհաննիսյանին այսօր մեղադրանք կառաջադրվի ՀՀ քրեական օրենսգրքի 235 հոդվածի 1-ին մասով: