Ապրիլին. ընդդիմությունը կրկին կփորձի

Տպագրվել է «Հայկական Ժամանակ» օրաթերթի՝ 2005 թվականի մարտի 29-ի համարում

Ապրիլի 11-14-ի քառօրյայի ընթացքում, ըստ ամենայնի, պատգամավոր Հմայակ Հովհաննիսյանը կձեռնարկի իր հերթական ստորագրահավաքը՝ այս անգամ Ռոբերտ Քոչարյանին պաշտոնանկ անելու համար ՍԴ-ից եզրակացություն ստանալու հարցով: Իր ստորագրահավաքն, ըստ պատգամավորի, պայմանավորված կլինի ապրիլի 2-ից մեկնարկող ընդդիմության գործողություններով, որոնք  ծրագրված է կուլմինացիայի հասցնել ապրիլի 13-ին: Եւ այսպես, ապրիլի 2-ին բողոքի ակցիա եւ երթ է պատրաստվում անցկացնել «Ա1+»-ը, որին մասնակցելու են նաեւ ընդդիմության ներկայացուցիչներն իրենց լիդերներով, իսկ երեկ տեղի ունեցած «Արդարություն» դաշինքի նիստը հաստատել է ապրիլի 12-ի լույս 13-ի գիշերը տեղի ունեցած բռնարարքների տարելիցի միջոցառումները:

Ըստ այդմ, ապրիլի 13-ին կառավարության նիստերի դահլիճում ընդդիմությունը կնշի ապրիլյան բռնարարքների մեկամյակը, եւ նույն օրը գլխավոր դատախազության, նախագահական նստավայրի եւ ԱԺ-ի մոտ տեղի կունենան զանգվածային պիկետներ: Ահա այդ պիկետների եւ դրանց հնարավոր զարգացումների հետ է կապում Հմայակ Հովհաննիսյանն ապրիլի 13-ին ԱԺ-ում կառավարության հետ հարց ու պատասխանի օրը Ռոբերտ Քոչարյանին իմփիչմենթ հայտնելու համար նախաձեռնվող իր ստորագրահավաքը:

«Հաշվի առնելով այն, որ Ղրղզստանում հիմնական դեպքերը շրջադարձ ապրեցին ընդամենը ժամերի ընթացքում, ես չեմ բացառում, որ ապրիլի առաջին օրերից մեկնարկող հասարակական կազմակերպությունների եւ կուսակցությունների տարաբնույթ ակցիաները կարող են արդեն ապրիլի կեսերին հասնել անհրաժեշտ կուլմինացիայի: Համենայնդեպս, ես կարծում եմ, որ ընդդիմությունն այս անգամ առավել վճռական կլինի ու, հաշվի առնելով երկրում առկա հասարակական դժգոհության մեծ ալիքը, կկարողանա այդ ալիքը վերածել համաժողովրդական շարժման եւ նպաստել գործող նախագահին պաշտոնանկ անելու իմ ստորագրահավաքին: Եթե ընդդիմությունն իր գործողությամբ ինձ աջակցի, ապա ես վստահ եմ, որ ստորագրությունների թիվը շատ ավելին կլինի, քան պահանջվող 44-ը»,- ասում է պատգամավոր Հմայակ Հովհաննիսյանը:

Պատգամավորն արդեն ունի խորհրդարանական ընդդիմության համաձայնությունը՝ միանալ ստորագրահավաքին: Ինչ վերաբերում է ՕԵԿ-ին, ապա Հմայակ Հովհաննիսյանը վստահ է, որ եթե ընդդիմությունը կարողանա հասարակական ընդվզումներն ապրիլի կեսերին հասցնել անհրաժեշտ կուլմինացիայի, ապա Արթուր Բաղդասարյանն ու իր թիմը լինելու են առաջին ստորագրողները:

Ինչեւէ, եթե ամեն ինչ զարգանա ընդդիմության նախատեսած սցենարով, եթե  ընդդիմությանը հաջողվի ապրիլի կեսերին ժողովրդին հասցնել անհրաժեշտ կուլմինացիայի, եթե Հմայակ Հովհաննիսյանն այդ կուլմինացիայի ճնշման տակ կարողանա ապահովել պատգամավորական 44 ստորագրություն, ի՞նչ ընթացակարգով պետք է տեղի ունենա Ռոբերտ Քոչարյանի պաշտոնանկության գործընթացը: Համաձայն ԱԺ կանոնակարգի հոդված 95-ի, ՀՀ նախագահին պաշտոնանկ անելու վերաբերյալ որոշման նախագծի քննարկումը կատարվում է կանոնակարգի 55-րդ հոդվածի համաձայն. այսինքն, այն ընթացակարգով, ինչպիսի ընթացակարգով քննարկվում է ցանկացած այլ որոշման նախագիծ: Իսկ ԱԺ կանոնակարգի հոդված 48-ում նշված է, որ ԱԺ որոշման նախագիծ ներկայացնելու իրավունք ունի ԱԺ ցանկացած պատգամավոր:

Այնուհետեւ, կանոնակարգի հոդված 52-ում ասված է. «Պատգամավորների առնվազն 1/3-ի (44 ստորագրություն) նախաձեռնությամբ ներկայացված ԱԺ որոշման նախագիծն առանց քվեարկության ընդգրկվում է հերթական նստաշրջանի եւ առաջիկա քառօրյայի օրակարգ եւ քննարկվում արտահերթ»: Այսինքն, այն պահին, երբ պատգամավոր Հմայակ Հովհաննիսյանը հանդես կգա Քոչարյանին պաշտոնական անելու ԱԺ որոշման նախագծով, որին կցված կլինեն պաշտոնանկության հիմքերն ու 44 պատգամավորի ստորագրությունը, այդ որոշման նախագիծն առանց քվեարկության մտնում է քառօրյա նիստի օրակարգ եւ քննարկվում է արտահերթ: Դրանից հետո արդեն գործելու Է ԱԺ կանոնակարգի հոդված 95-ը:

Դա նշանակում է, որ պատգամավոր Հմայակ Հովհաննիսյանի ներկայացրած որոշման նախագիծն արտահերթ կարգով քննարկելուց հետո պատգամավորները 66 կողմ ձայնով պետք է դիմեն ՍԴ՝ նախագահին պաշտոնանկ անելու համար եզրակացություն ստանալու  հարցով: ՍԴ-ի եզրակացությունը վերադառնում է խորհրդարան, եւ արդեն պատգամավորների ձայների 2/3-ով (88 ձայնով)՝ փակ-գաղտնի քվեարկությամբ,ՀՀ նախագահը համարվում է պաշտոնանկ արված: Ինչ վերաբերում է պաշտոնանկության հիմքերին, ապա Հմայակ Հովհաննիսյանն ըստ ամենայնի կօգտվի դեռ 2002 թվականին ընդդիմության կողմից ԱԺ-ին ներկայացված՝ «ՀՀ նախագահ Ռոբերտ Քոչարյանին պաշտոնանկ անելու հարցի մասին եզրակացություն ստանալու նպատակով ՍԴ դիմելու մասին» ՀՀ ԱԺ որոշման նախագծից:

Այդ հիմքերն են թե՛ 1998-ին, ինչպես նաեւ  2003-ին, ՀՀ նախագահի թեկնածու առաջադրվելու համար բնակության վայրից կեղծ տեղեկանք ներկայացնելը, թե՛ հոկտեմբերի 27-ի ահաբեկչությունը չկանխելը, թե՛ «Առագաստ» սրճարանում նախագահի թիկնապահի կողմից Վրաստանի քաղաքացու սպանությունն ու էլի բազմաթիվ հիմքեր: Նշենք նաեւ, որ մեր տեղեկությամբ, քանի որ հենց ապրիլի 11-ին ԱԺ նախագահ Արթուր Բաղդասարյանը պաշտոնական այցով մեկնելու է Մոսկվա եւ Սանկտ-Պետերբուրգ՝ իր հետ տանելով պատգամավորական մի մեծ խումբ, խորհրդարանական մեծամասնության հանրապետական հատվածը մտադիր է տապալել եկող քառօրյան, այսպիսով՝ տապալելով նաեւ իմփիչմենթի հարցով ստորագրահավաքը:

Նաիրա Զոհրաբյան