Շարժման ձնագնդի նման մեծանալը Սերժ Սարգսյանի մոտ մտավախություն է առաջացնում. քաղաքագետ

Քաղաքագետ Արմեն Բաղդասարյանը կարծում է, որ #ԻմՔայլը շարժման վերջին օրերի ցնցող հանրահավաքներն արդեն տվել են իրենց ցանկալի արդյունքները: ՀԺ-ի հարցերին ի պատասխան քաղաքագետը նշեց, որ Սերժ Սարգսյանին այս հանրահավաքներն անհանգստացնում են, քանի որ փողոցային պայքարի դուրս եկած քաղաքացիների թիվը զգալիորեն աճում է:

- Պարոն Բաղդասարյան, այսօր 5-րդ օրն է՝ Երեւանում եւ հանրապետության խոշոր քաղաքներում մեծամասշտաբ ցույցեր են ընթանում: Այս արդյունքը սպասելի՞ էր:

- Անձամբ ինձ համար սպասելի էր եւ ես այդ մասին մի քանի անգամ ասել եմ դեռեւս հանրահավաքային շարժումը սկսելուց առաջ:

- Սպասելի՞ էր, որ այսքան մարդ դուրս կգա փողոց:

-Ես բազմահազարանոց հանրահավաքներ սպասում էի:

- Ըստ Ձեզ, այս գործողությունները որքա՞ն կշարունակվեն եւ ի՞նչ արդյունք կտան:

- Ես չգիտեմ՝ ինչքան կշարունակվեն: Այս շարժումն արդեն լուրջ արդյունք է տվել եւ արդյունքն այն է, որ քաղաքական ակտիվություն եղավ, հասարակությունն արթնացավ: Ամբողջ աշխարհին ցույց տվեց, որ Հայաստանում կա հասարակություն, այլ թե հլու հնազանդ ժողովուրդ: Այս շարժումը կստիպի իշխանություններին հաշվի նստել հասարակության հետ: Գլխավոր արդյունքն արդեն արձանագրված է: Սերժ Սարգսյանին իշխանությունից հեռացնելը կստացվի՞, թե՞ ոչ: Ես թերհավատորեն կմոտենամ, բայց մեծ արդյունք արդեն արձանագրվել է:

- Ոստիկանությունը հավաքները ցրելու հայտարարություններ է անում, բայց առայժմ լայնամասշտաբ գործողություններ չի կիրառում, բացառությամբ ապրիլի 16-ի, երբ լուսաձայնային նռնակներ կիրառվեցին խաղաղ ցուցարարների ուղղությամբ: Իշխանությունները զգուշանու՞մ են:

- Իշխանություններն ընտրել են այլ մարտավարություն: Նրանք ընտրել են շարժումը մաշեցնելու եւ ահաբեկելու մարտավարություն: Այսինքն՝ այստեղից մի 10 հոգի գողանան տանեն, այնտեղից՝ մի 20 հոգի տանեն: Տանեն ոստիկանական այս ու այն բաժանմունքներ եւ ցրեն: Հասնեն նրան, որ մարդիկ զգուշանան փողոցում: Ես կարծում եմ, որ այս մարտավարությունը շատ արդյունավետ չի լինի: Նրանք երբ համոզվեն, որ այս մարտավարությունն օգուտ չի տալիս, կանցնեն կոշտ մեթոդների:

Իսկ ինչո՞ւ «մարդ գողանալու» մարտավարությունն արդյունք չի տա:

- Ես չեմ կարծում, որ այսպիսի շարժումը կարելի է մարել այդպիսի քայլերով: Սա ցանցային պայքար է, իսկապես հզոր պայքար է, եւ մարդկանց գիտակցությունն արթնացել է: Ուժային կառույցների կողմից ցանկացած այդպիսի ահաբեկչական գործունեություն հակազդեցություն կծնի: Ինչքան ոստիկանությունը նման միջոցների դիմի, մարդիկ այդքան կշատանան:

- Սերժ Սարգսյանն ԱԺ-ում վարչապետի ընտրությունից հետո դիմելով ԵԼՔ-ի՝ դահլիճում ներկա պատգամավորներին՝ հորդորեց, որ Նիկոլ Փաշինյանին հետ բերեն ԱԺ: Սերժ Սարգսյանը մտավախություն ունի՞, որ իրավիճակը վերահսկողությունից դուրս կգա եւ իր իշխանությանը սպառնալիք կհանդիսանա:

- Սերժ Սարգսյանն արդեն այդպիսի մտավախություն ունի: Շարժման ձնագնդի նման մեծանալն է նրա մտավախության հիմքում:

- Նա նաեւ մի քաղաքական ենթատեքստով հայտարարություն արեց. «...որպեսզի Հայաստանում հանգած հրաբուխները չարթնանան, իսկ հանգած հրաբուխները չեն արթնանա, եթե բզբզողներ չլինեն»: Այս հայտարարությունը սպառնալի՞ք էր՝ ուղղված Նիկոլ Փաշինյանին: Կարո՞ղ ենք ենթադրել, որ քնած հրաբուխը քաղաքացիներն են, իսկ բզբզացողը՝ Նիկոլ Փաշինյանը, որին հաջողվում է հազարավոր քաղաքացիների այս օրերին փողոց հանել:

- Ես չգիտեմ, թե Սերժ Սարգսյանն ինչ նկատի ուներ: Ենթադրում եմ, որ միայն Նիկոլ Փաշինյանին չէին ուղղված այս խոսքերը, այլ նաեւ այն քաղաքական ուժերին, որոնք մինչեւ այս այլ շարժումներ են կազմակերպել եւ հիմա պասիվ են: Գուցե ակնարկ էր նրանց, որ հիմա չգան ու չմիանան:

Այսինքն, Սերժ Սարգսյանը «քնած հրաբուխ» ասելով նկատի ուներ այն քաղաքական ուժերին, ովքեր դեռ ժողովրդի կողքին կանգնելու համար քայլ չե՞ն կատարել:

- Երեւի նկատի ուներ այն քաղաքական ուժերին, որոնք պաշտոնապես այս շարժմանը չեն միացել:

- Երեւանում տեղի ունեցող հակաիշխանական միջոցառումներին անդրադառնում են նաեւ միջազգային լրատվամիջոցները: Նրանք իրենց հրապարակումներում շեշտադրում են այն փաստը, որ Սերժ Սարգսյանը 3-րդ անգամ է դառնում ղեկավար՝ հազարավոր քաղաքացիների կամքին հակառակ: Միջազգային մամուլն օրինակներ է բերում 2008 թվականի իրադարձություններից: Սա չի ենթադրու՞մ, որ միջազգային հարթակում Հայաստանի ժողովրդավարության մակարդակն անկում կապրի:

- Հայաստանի ժողովրդավարության մակարդակն արդեն անկում ապրել է այս քանի օրերի ընթացքում եւ արդեն արձանագրվել է, որ Սերժ Սարգսյանի ղեկավարման 3-րդ ժամկետի մեկնարկը կասկածի տակ է դնում Հայաստանի ժողովրդավարական ընթացքը: Բնականաբար, կասկածի տակ է դրվում, որովհետեւ նույն անձի 3-րդ ժամկետով ղեկավարելը մեխանիկորեն երկիրը դասում է ավտորիտար ռեժիմ ունեցող պետությունների շարքին:

Պարոն Բաղդասարյան, Սերժ Սարգսյանի վարչապետ դառնալու կապակցությամբ Արեւմուտքից դեռ արձագանքողներ չեն եղել՝ շնորհավորանքների տեսքով: Արեւմտյան երկրների ղեկավարները դեռ ժամանակ ունե՞ն նրան շնորհավորելու, թե՞ կարող ենք այստեղ քաղաքական ենթատեքստեր փնտրել:

- Նրանք դեռ ժամանակ ունեն, կհետեւեն իրադարձությունների զարգացմանը եւ ըստ այդմ էլ իրենց դիրքորոշումը կարտահայտեն: Չշնորհավորելը կամ ուշ շնորհավորելը եւս դիրքորոշում է: Կարող են անգամ չշնորհավորել, քանի որ Հայաստանը նախագահ ունի, նախագահին շնորհավորել են եւ դա բավարար է: Ամեն դեպքում վերաբերմունքը պաշտոնական հայտարարություններով է արտահայտվում: Կարծում եմ, որ մեզ համար ոչ շահեկան հայտարարություններ կլինեն:

Ոչ շահեկան՝ Հայաստանի՞, թե՞ ժողովրդի համար:

- Հայաստանի համար: Ցավոք սրտի, Սերժ Սարգսյանի իշխանությանը տրված գնահատականը մեխանիկորեն վերաբերվում է նաեւ Հայաստանին: Օրինակ, Հայաստանը, երբ դասվում է ոչ ժողովրդավար երկրների շարքին կամ ավտորիտար ռեժիմ ունեցող, դա վերաբերվում է ամբողջ Հայաստանին: Եթե պատժամիջոցներ լինեն եւ վերաբերմունքը փոխվի Հայաստանի նկատմամբ, փոխվելու է պետության նկատմամբ, ոչ թե իշխանության նկատմամբ:

Տպագրվել է «Հայկական ժամանակ» օրաթերթի ապրիլի 19-ի համարում:

Տպել
4555 դիտում

Գյումրիում մահվան ելքով ավտովթար է գրանցվել

Առերեւույթ չարաշահումներ՝ Անիի համայնքապետարանում

ՀՀԿ-ն կողմ չէ Ընտրական օրենսգրքի վերաբերյալ ներկայացված փոփոխություններին. Արփինե Հովհաննիսյան

Ձեր հարցը լուծողը ես չեմ, օրենքն արգելում է աջ ղեկով մեքենաների ներկրումը. Հակոբ Արշակյան

Ֆորս մաժոր Ազգային ժողովում. ԸՕ-ի նախագիծը չի քննարկվում ոչ 24, ոչ էլ 72 ժամյա ռեժիմներում

Վրդովվելու անհրաժեշտություն չկա, եթե անարդար է, կշտկենք. Փաշինյանը՝ «Վերածնունդ» ավանի մասին

Առաջիկա 5 օրվա եղանակի կանխատեսում

Նորանշանակ նախարարը դիտողություն է արել ծխախոտի մնացորդը գետնին գցող ոստիկանին, այնուհետև ինքն է վերցրել այն (տեսանյութ)

Կամ գնում ենք նոր ԸՕ-ով, կամ դուք գնում եք սաբոտաժի ճանապարհով. Նաիրա Զոհրաբյանը՝ ՀՀԿ-ականներին

«Քաղաքացիական պայմանագիր» կուսակցությունը խորհրդարանական ընտրություններում հաղթանակ է ակնկալում. Նիկոլ Փաշինյան

11 տարի անց 1-ին անգամ Կլասիկոն կանցնի առանց Մեսսիի

Կարեւոր խնդիր է լինելու կոոպերացիայի զարգացումը. Տիգրան Սարգսյան

Կապանում ՔՊ-ի թեկնածուի պարտությունը կապ չունի Հունան Պողոսյանի նշանակման հետ. Ն. Փաշինյան

Լոռին նոր փոխմարզպետ ունի. նոր նշանակումներ մարզպետի թիմում

Իմ անձնական հարաբերությունները մեր գործընկերների հետ շատ ուղիղ են, անկեղծ. Փաշինյան

Նախագահ Արմեն Սարգսյանը Ժնեւում կմասնակցի Համաշխարհային ներդրումային համաժողովին

Ընտրական օրենսգրքի փոփոխությունները հնարավոր է՝ չընդունվեն, 10 պատգամավոր բացակայում է. նիստը լարված է

Պատրաստվում ենք ինտենսիվանցել Հայաստան-ԱՄՆ հարաբերությունները. Նիկոլ Փաշինյան

ՏԻՄ ընտրությունները ցույց տվեցին, որ ակնհայտ է հեղափոխության հաղթանակը. Նիկոլ Փաշինյան

Էդուարդ Շարմազանովն աշխատանքային այցով մեկնել է Սանկտ Պետերբուրգ եւ Մոսկվա