Տարին երկու անգամ. ասուլիս` հանուն պարտքի

Տպագրվել է «Հայկական Ժամանակ» օրաթերթի՝ 2005 թվականի ապրիլի 20-ի համարում

«Ես, ուղղակի ելնելով կառավորության որոշումից, պարտավորված եմ տարին երկու անգամ հանդես գալ ՊՆ-ում հավատարմագրված լրագրողների առջեւ: Ուզում եմ, որ սա բոլորի համար հասկանալի լինի. ուղղակի հիմա է ժամանակս ներել»,-ահա այսպիսի ինքնաարդարացումով սկսեց երեկվա իր ասուլիսը ՀՀ ՊՆախարար Սերժ Սարգսյանը ՄԱԱ-ում: ՀՀ ՊՆախարարի հիմնական ասելիքն այն էր, որ ԱԺ-ում  ԼՂ հարցով վերջին լսումների ժամանակ իր զեկույցից հետո, որի ժամանակ ասել էր, թե ԼՂ հարցը կարող է լուծվել միայն փոխզիջումային ճանապարհով, Հայաստանում փորձ է արվել ներկայացում բեմադրել: Այդ ներկայացումն, ըստ Սերժ Սարգսյանի, ունի պատվիրատուներ եւ պատվեր կատարողներ:

«Բեմադրման նպատակն էր մեզ ներկայացնել որպես սկզբունքից շեղված մարդկանց, ովքեր մի ժամանակ անզիջում էին այդ խնդիրներում, հիմա ելնելով ինչ-ինչ-ինչ հանգամանքներից՝ դարձել են շատ փափուկ, զիջող եւ այլն»,- ասաց Սերժ Սարգսյանը եւ ավելացրեց, որ ինքն ի սկզբանե խոսել է ԼՂ խնդիրը փոխզիջումների հիման վրա լուծելու մասին, դրանում համոզված է եղել նախկինում, համոզված է այսօր եւ համոզված է լինելու ապագայում: Պարոն Սարգսյանն առանձին-առանձին անդրադարձավ պատվիրատուներին եւ պատվեր կատարողներին, ընդ որում վերջիններիս մասին խոսեց շատ խղճահարությամբ. «Ես հասկանում եմ, որ այդ մարդիկ իրենց հացն են վաստակում»,- ասաց, նաեւ ավելացրեց, որ այդ մարդկանց թվում  տեսնում է որոշ լրագրողների, նախկինում պետական պաշտոնում եղած ու մասնագիտական անպիտանելիության համար համակարգից դուրս մղված մարդկանց:

Իսկ պատվիրատուները, ըստ Սերժ Սարգսյանի, ի տարբերություն կատարողների, տիրապետում են թեմայի մանրամասներին, շատ լավ գիտեն, թե ով ինչ համոզմունքի տեր է, երբ, ինչ հայտարարություն է արել, սակայն ելնելով քաղաքական նկատառումներից՝ փորձում են խեղաթյուրել խոսքերը: «Բայց չբավարարվելով դրանով, չունենալով հակազդելու կուռ միտք՝ իջնում են անձնական վիրավորանքի մակարդակի՝ դավաճան, հայրենիք չունեցող, կաշառակեր եւ այլն»,- երեկ ասաց ՊՆախարարը: Սակայն, ըստ Սերժ Սարգսյանի, ԱԺ-ում իր զեկույցին բացասաբար արձագանքած ոչ բոլոր գործիչներն են մասնակցում այդ ներկայացմանը: Ո՛չ պատվիրատուների եւ ո՛չ էլ պատվեր կատարողների շարքում չգտնվելու պատվին, օրինակ, արժանացան Ժիրայր Սեֆիլյանը, Մանվել Ղազարյանը եւ Վազգեն Մանուկյանը:

Մինչդեռ այսօր Սերժ Սարգսյանին քննադատում են նաեւ մարդիկ, ովքեր պատերազմի ընթացքում, ինչպես երեկ ասաց ՊՆախարարը, թռել են Հայաստանից եւ հիմա այն աստիճանի են հասել, որ իրենց հանրապետությունում չեղած ժամանակը ներկայացնում են, իբր եղել են մարտական դիրքերում: Իսկ բացառո՞ւմ է արդյոք ՊՆախարարը, որ փոխզիջումների հարցում Հայաստանի եւ իր վրա արտաքին ուժերի կողմից ճնշումներ են գործադրվում: Այս հարցին պատասխանելիս Սերժ Սարգսյանը քիչ էր մնում երդվեր. «Ես որեւէ անգամ որեւէ տեղ ճնշում չեմ զգացել, ուղղակի, ի՞նչ ասեմ, ամոթ ա, էլի, հո չե՞մ ասելու՝ երդվում եմ: Այդպիսի բան չի եղել: Եթե կա ճնշում, ապա մեզ վրա կա այնքան ճնշում, ինչքան Ադրբեջանի վրա»,- նկատենք, որ ռեւերանսների մասին առաջինը խոսեց ՊՆախարարը:

Նա, ըստ էության, չբացառեց, որ ձգտում է ավելի մեծ պաշտոնի, սակայն ասաց, որ դա չի անի Ղարաբաղի գնով, այն հարցին, թե զիջումների մասին իր ելույթն ընդունվեց, որպես նախընտրական ճառ եւ ռեւերանս  Արեւմուտքին, Սերժ Սարգսյանը պատասխանեց. «Որեւէ ամենից մեծ պաշտոնի, ամենից մեծ կարողության համար ես պատրաստ չեմ գնալ ԼՂ խնդրի լուծման ավելի զիջումների, քան իրավիճակն է պահանջում, քան ես համոզված եմ: Ես այդ հրմշտոցին չեմ մասնակցում»: Իսկ հրմշտոց այսօր, ըստ Պնախարարի, Հայաստանում կա, քանի որ յուրքանչյուրն ուզում է իրեն որպես արեւմտամետ եւ առաջադեմ գաղափարների ջատագով ներկայացնել: Սակայն Սարգսյանն այդ հրմշտոցին չի մասնակցել եւ չի մասնակցի:

Գիտե՞ք ինչու, որովհետեւ այն ժամանակ, երբ բոլորը հրմշտվում են, ՀՀ ՊՆախարարը գործում է. «Չեմ մասնակցել այդ հրմշտոցին ու երբեք էլ չեմ մասնակցի, շատ պարզ պատճառով՝ մարդու մասին դատում են, ոչ թե նրա խոսքերից, այլ գործերից»,- ասաց պրն Սարգսյանը: Իսկ այդ  «գործի» շրջանակներում Սերժ Սարգսյանը երեկ մի քանի կարեւոր հայտարարություն արեց: Նախ, ՀՀ-ում հնարավոր հեղափոխության մասին հարցին պատասխանելիս նա ծաղրում էր ՀՀ քաղաքական գործիչներին՝ ասելով, որ Կամոյի օրինակը վառ է նստել այդ մարդկանց հոգեբանության մեջ, սակայն երբ հիշատակվեցին Սահակաշվիլիի եւ Յուշչենկոյի անունները՝ անսպասելիորեն ասաց. «Յուշչենկոն, Սահակաշվիլին ընտրել են իշխանափոխության ցիվիլ ձեւեր»,- իսկ այն հարցին, թե ինքը համաձայն է այդ ձեւերի հետ, պատասխանեց. «Իհարկե, եթե իշխանությունը չի կարողանում երկիրը կառավարել, պետք է գնա»:

«Գործի» շրջանակներում հաջորդ հայտարարությունը վերաբերում է Թուրքիայի հետ հարաբերություններին. «Ես համարում եմ, որ մենք պարտավոր ենք թուրքերի հետ հարաբերությունները վերականգնել առանց նախապայմանների: Ասածս չի նշանակում, որ թուրքերը չպետք է ճանաչեն ցեղասպանությունը, չպետք է վերաձեւավորեն ԼՂ հարցում իրենց մոտեցումները, բայց զուտ հարաբերությունները սկսելու համար ես համոզված եմ ուղղակի, որ նախապայմաններ պետք չեն»,- ասաց ՀՀ ՊՆախարարը: Ի դեպ, Սերժ Սարգսյանը երեկ ասաց, որ շատ նորմալ է վերաբերում այն բանին, որ Սասուն Միքայելյանը առաջինն իր անունն է հնչեցրել որպես մոտակա ժամանակների նախագահի թեկնածու:     

Աննա Հակոբյան