Երեւանում մեկնարկեցին հակաիշխանական անհնազանդության խաղաղ գործողությունները. թարմացվող

16:37 - Նիկոլ Փաշինյանը երթով հասավ Հանրապետության հրապարակ: Հարթակից նա հայտարարեց, որ երկու ժամով կհեռանա հրապարակից՝ հանդիպումների: Նա նշեց, որ երեկոյան 7-ին ավելի մանրամասն կխոսի օրվա իրադարձությունների մասին:

16:22 - Նիկոլ Փաշինյանը քիչ առաջ հայտարարեց, որ շարժմանն է միացել ՀՀ ոստիկանության կապիտան Գարիկ Թովմասյանը: 

16:05 - Փակ է Մաշտոցի պողոտան: Ցուցարարները Մաշտոց-Պուշկին հատվածում պարում են:

15:33 - Սեւանի մայրուղին շարունակում է առավոտվանից փակ մնալ: Հավաքվածները վանկարկում են «ՀՀԿ հեռացի՛ր»:

15:08 - Դալմա առեւտրի կենտրոնի մոտ շարունակվում է աշխատակիցների ցույցը: Ծիծեռնակաբերդի խճուղին շարունակում է փակ մնալ:

15:05 – Մաշտոցի պողոտայում երթով դեպի Հանրապետության հրապարակ են շարժվում Ապրիլյան պատերազմի մասնակիցներ:

14:28- Ոստիկանական մեքենայում գտնվող ցուցարարներն ազատ արձակվեցին եւ  մյուս ցուցարարները բացեցին ոստիկանության ճանապարհը:

14:22- Մաշտոցի պողոտայում ցւոցարարները շրջափակել են ոստիկանական մեքենան եւ թույլ չեն տալիս ոստիկանությանը քաղաքացիներին բերման ենթարկել: Ցուցարարները պնդում են, որ կբացեն պողոտան այն ժամանակ, երբ իրենց ընկերներն դուրս գան ոստիկանական մեքենայից:

14:04- Մեծ երթը շարունակում է շարժվել դեպի Էրեբունի թանգարան: Հանրապետության հրապարակը եւս բազմամարդ է: 

13:43- Ցուցարարները փակել են Ծիծեռնակաբերդի խճուղին:

13:40- Նիկոլ Փաշինյանի գլխավորությամբ երթի մասնակիցները մի քանի րոպեով հանգստանում են այգիներից մեկում:

13:37- Ցուցարարները լավաշ են տալիս ոստիկաններին:

13:33- Քաղաքացիները վանկարկում են. «Նիկոլ վարչապետ»:

13:29- Քաղաքացիները կեչ են անում մերժել ՀՀԿ-ին:

13:28- ՀՀԿ կենտրոնական գրասենյակի մոտ:

12:51- Երթն այս պահին՝ ուղիղ հեռարձակմամբ: Նիկոլ Փաշինյանն իր էջում գրել է. «Ժամը 19:00-ին հավաքվում ենք Հանրապետության հրապարակում։ Մերժի՛ր Սերժի Կա-րե-նին»:

12:45- «Մերժիր Սերժի Կարենին» կարգախոսով երթը շարունակվում է Նար Դոսի անվան փողոցով:

12:43- Նիկոլ Փաշինյանը հայտարարում է, որ Նոյեմբերյանի երեք դպրոցներ դասադուլ են հայտարարել, միացել են համազգային շարժմանը:

12:41-ՀՀ սպորտի եւ երիտասարդության հարցերի նախարարի պաշտոնակատար Հրաչյա Ռոստոմյանը հրաժարվեց իր պաշտոնից: Նա դուրս է գալիս փողոց՝ ժողովրդի կողքին կանգնելու:

12:26- Ուսանողները փակեցին Արշակունյաց- Գրիգոր Լուսավորիչ փողոցների խաչմերուկները՝ բոլոր կողմներից: Այստեղ երթեւեկությունը լրիվ կատվածահար է եղել:

12:20- ԱԺ պատգամավոր Սասուն Միքայելյանը միացավ Նիկոլ Փաշինյանին եւ երթի մասնակիցներին:

12:15- Այս պահին Շիրակի մարզի Արթիկ քաղաքում տեղի է ունենում բազմահազարանոց երթ: Այս մասին հայտարարեց Նիկոլ Փաշինյանը:

12:07- Նիկոլ Փաշինյանը հայտարարեց, որ Չարենց-Սայաթ-Նովա փողոցների խաչմերուկից երթը շարունակվում է Ալեք Մանուկյան փողոցով:

12:00- Ոստիկանությունը շարունակում է Մելիք Ադամյան փողոցը կենտրոնացնել ոստիկանական ուժերով: Րոպեներ առաջ կրկին փշալարերով մեքենաներ եւ այլ զինտեխնիկա տեղափոխվեց այնտեղ: Ոստիկաններին հրաման տրվեց շրջափակել Կառավարության շենքը:

11:50- «ՀՀԿ-ն ժամանակի վրա է աշխատում: Ես խորհուրդ եմ տալիս դա չանել»,- երթի ընթացքում հայտարարեց Նիկոլ Փաշինյանը եւ անդրադառնալով իր այն հայտարարությանը, որ ՀՀԿ-ականները Սերժ Սարգսյանի հրաժարականը փորձում են, որպես ծխածածկույթ օգտագործել, մեկնաբանեց. «Ուզում են Կարեն Կարապետյանին նշանակեն վարչապետ եւ մտածում են, որ ժողովուրդն այդքան միամիտ է, որ կհամաձայնի՝ մեկ ՀՀԿ-ականին, մեկ ուրիշ ՀՀԿ-ականով փոխարինելուն»,- ասաց Նիկոլ Փաշինյանը:

Նա մեկնաբանեց նաեւ Կարեն Կարապետյանի այն խոսքերը, որ հրապարակում վարչապետ ընտրելը հակասում է օրենքին:

«Կարեն Կարապետյանը չի հասկացել, թե մենք ինչ ենք ասում: Մենք ասում ենք, որ վարչապետ պետք է ընտրվի ԱԺ-ում, թեկնածությունը պետք է առաջադրվի խմբակցությունների կողմից, իսկ ժողովուրդը հրապարակում մինչեւ այդ պետք է հավանություն տա որեւէ թեկնածուի»,- ասաց նա:

Դիտարկմանը՝ ՀՀԿ-ն չի քվեարկի այդ թեկնածուին, Փաշինյանը հարցադրում արեց.

«Նրանք ուզու՞մ են, որ այս իրավիճակը լուծում ստանա: Իրենք պետք է հասկանան, որ ՀՀԿ-ն այլեւս իշխանություն չէ»:

Փաշինյանը նաեւ ասաց, որ իրենք կբոյկոտեն այն արտահերթ ընտրությունները, որոնք կանցկացվեն այս իշխանության ներքո:

«Ակտիվ բոյկոտի միջոցով այդ ընտրությունները չեն կայանա: Ժողովուրդը հաղթել է եւ ժողովրդի հաղթանակի արդյունքները հիմա պետք է արձանագրվեն»:

11:25- Խիստ հսկողության տակ է վերցված ՀՀԿ կենտրոնական գրասենյակը: Մելիք Ադամյան փողոցում ոստիկաններ եւ զինտեխնիկա են կուտակել:

 11:18- «Այս պահին Արշակունյաց պողոտան, Գարեգին Նժդեհի հրապարակը, Հալաբյան-Կիեւյան խաչմերուկները փակ են: Այս պահին էլ Մարտունուց 200 մեքենայով ավտոերթով մեզ են միանում»,- ասաց Նիկոլ Փաշինյանը:

Քիչ հետո Փաշինյանի մասնակցությամբ գլխավոր երթն անցնելու է Մաշտոցի պողոտայով: Ժամը 6-ին Հանրապետության հրապարակում համերգ է լինելու, 7-ին՝ հանրահավաք, իսկ մինչեւ այդ, Փաշինյանի տեղեկացմամբ, լինելու են երթեր եւ այլ գործողություններ:

11:13- Այս պահին ոստիկանությունը զորքեր եւ տեխնիկա է կենտրոնացնում մայրաքաղաքի տարբեր հատվածներում:

10:57-Այս պահին Երեւանում կրկին հակաիշխանական անհնազանդության խաղաղ գործողություններ են մեկնարկել: Փակ են մի շարք փողոցներ, երթի են դուրս եկել ուսանողները, բժիշկները, որոնք հայտարարել են դասադուլի եւ գործադուլի մասին: Այս պահին փակ են մի շարք փողոցներ:

Ավելի վաղ տեղեկացրել էինք, որ Նիկոլ Փաշինյանը հայտարարել էր՝ այս գործողությունները շարունակվելու են այնքան ժամանակ մինչեւ գործող իշխանության ներկայացուցիչներն իշխանությունը խաղաղ ճանապարհով կփոխանցեն ժողովրդին: Այս գործողությունների արդյունքում Սերժ Սարգսյանն արդեն հրաժարական է տվել: