Մենթալիտետ. Հրազդանում փաթաթած ունեն օրենքը

02/06/2018 schedule15:20

Տպագրվել է «Հայկական Ժամանակ» օրաթերթի՝ 2005 թվականի հունիսի 1-ի համարում

Թիվ 41 ընտրատարածքային ընտրական հանձնաժողովում երեկ սկսվեց Հրազդանի քաղաքապետի մայիսի 29-ին կայացած ընտրությունների արդյունքների ստուգումը: Ստուգումների առաջին օրը հատկապես ուշագրավ էր հանձնաժողովներում ունեցած անդամների թվի տեսանկյունից երկու թեկնածուների ուժերի դասավորվածությունը գնահատելու համար: Հիշեցնենք, որ Հրազդանի քաղաքապետի պաշտոնի համար պայքարում են գործող քաղաքապետ ՀՀԿ անդամ Արամ Դանիելյանը եւ անկուսակցական Արթուր Շաբոյանը: Ըստ նախնական արդյունքների, գործող քաղաքապետի օգտին տրված ձայները 349-ով ավել են եղել, քան Ա.Շաբոյանի օգտին տրված քվեները: Նույնիսկ թիվ 41 ԸԸՀ անդամները չէին թաքցնում, որ հանձնաժողովի 9 անդամներից 6-ը Ա.Դանիելյանի կողմնակիցներ են, իսկ 3-ը` Ա.Շաբոյանի:

Մեծամասնության երեքը Ռոբերտ Քոչարյանի նշանակած անդամներն էին, որոնցից Գագիկ Հարությունյանը հանձնաժողովի նախագահն էր, իսկ Գարեգին Գյուրջյանը՝ նախագահի տեղակալը (վերջինս Ա.Դանիելյանի ազգականներից է), բացի այդ, գործող քաղաքապետի կողմի մեջ էին մտնում նաեւ ընդդիմադիր երկու քաղաքական ուժերի՝ «Արդարություն» դաշինքի եւ «Ազգային միաբանության» նշանակած անդամներն ու ՕԵԿ անդամը: Իսկ Ա.Շաբոյանի սատարող եռյակի մեջ մտնում էին ԸԸՀ քարտուղար Մարտին Պողոսյանը, որը նշանակվել էր ՀՀԿ-ից, ՀՅԴ-ն եւ ՄԱԿ-ը ներկայացնող անդամները: Ի դեպ, ինչպես նկատեցիք, ՀՀԿ անդամը ոչ թե իր կուսակցին էր պաշտպանում, այլ նրա հակառակորդին: Այս դեպքում, ինչպես մեզ պարզաբանեցին, պատճառն Ա.Շաբոյանի եւ ԸԸՀ քարտուղարի անձնական մտերմությունն է:

Մի խոսքով, Հրազդանում կարելի է ասել, որ երկու պայքարողներն էլ իշխանական որոշակի շրջանակների հովանավորյալներ են:  Առաջինը ԸԸՀ-ն ստուգեց թիվ 1 տեղամասի փաստաթղթերը: Երկու ժամից ավել ԸԸՀ անդամները ճշտում էին տեղամասի ընտրացուցակներում մասնակիցների ստորագրությունների թիվը, քանի որ ԸԸՀ անդամների ստացած թիվը տեղամասային հանձնաժողովի արձանագրած տվյալից 10-ով փոքր էր: Մի քանի անգամ հաշվելուց հետո ԸԸՀ անդամները ստիպված էին ընդունել այն փաստը, որ թիվ 1 ՏԸՀ արձանագրած թիվը սխալ է: Ընտրական մնացած փաստաթղթերի ստուգման արդյունքում Ա. Դանիելյանի ձայները նվազեց 13-ով, Ա.Շաբոյանինը՝ 12-ով, իսկ անճշտությունների թիվն այստեղ կազմեց 7: Սակայն իրավիճակը սրվեց հաջորդ՝ թիվ 19 տեղամասի քվեարկության արդյունքները ստուգելիս:

Այստեղ ընտրական ցուցակների հետ կապված ավելի խոշոր խախտում ի հայտ եկավ: Պարզվեց, որ դատարանի վճռով քվեարկության եկածների լրացուցիչ ցուցակում, որը ո՛չ կնքված էր եւ ո՛չ էլ ԸԸՀ նախագահի կողմից ստորագրված, բացակայում էին ընտրողների անձնագրային տվյալները եւ ստորագրությունը: Իսկ «Ընտրական օրենսգիրքը» եւ ԿԸՀ որոշումները պահանջում են, որ լրացուցիչ ընտրական ցուցակները լրացվեն բուն ընտրական ցուցակների պես, այսինքն՝ դրանցում պետք է նշվեն ընտրողների անձնագրային տվյալները, եւ քվեաթերթիկ ստացողը պետք է ստորագրի: Եթե ԸԸՀ-ն օրենքով առաջնորդվեր, ապա քվեաթերթիկ ստացածների թիվը հաշվարկելիս «լրացուցիչ ցուցակի» 33 տվյալը պետք է չհաշվեր, այսինքն՝ այդ 33-ը համալրեր անճշտությունների թիվը: Ա.Դանիելյանի կողմնակից ԸԸՀ անդամները այլեւս չկարողացան իրենց զսպել եւ սկսեցին բաց տեքստով խոսել:

Մասնավորապես, նրանք հերթով վիճում էին Ա.Շաբոյանի վստահված անձ Հակոբ Ադամյանի հետ՝ ասելով, որ իրենք լավ են հասկանում, թե ինչու է նա պահանջում այդ 33 հոգանոց ցուցակը որպես ընտրական ցուցակ չընդունել, ուստի, ԸԸՀ անդամները պնդում էին, որ իրենք նման բան թույլ չեն տա: Նրանք, լծվելով իրենց թեկնածուին պաշտպանելու սուրբ գործին, մոռացել էին, որ իրենց գործողությունների միակ շարժառիթը պետք է լինի օրենքը: Հետագա ապօրինությունը կանխելուն չօգնեց նաեւ ԿԸՀ ներկայացնող փոխնախագահ Համլետ Աբրահամյանի եւ Եղիշե Տերտերյանի միջամտությունը: Նրանք ԸԸՀ անդամներին բացատրեցին, որ իբրեւ լրացուցիչ ցուցակ ներկայացվող փաստաթուղթը չի կարող իրավական տեսանկյունից ընդունվել, բայց ԸԸՀ անդամները օրենքի մասին կարծես մոռացել էին:

Ուստի, ԿԸՀ անդամներին մնում էր միայն առաջարկել, որ ԸԸՀ-ն իր դիրքորոշումն արտահայտի հատուկ որոշմամբ: ԸԸՀ անդամ Մուշեղ Մանասյանը, որը ներկայացնում էր ՀՅԴ-ն, առաջարկեց որպես լրացուցիչ ցուցակ ներկայացվող թուղթն իբրեւ ընտրական փաստաթուղթ չընդունել: Այս առաջարկությունը երկար վեճերից հետո ի վերջո դրվեց քվեարկության, եւ դրան կողմ քվեարկեցին միայն հեղինակը, ՀՀԿ եւ ՄԱԿ անդամները, իսկ հինգ անդամները դեմ քվեարկեցին, մեկն էլ` ձեռնպահ: Այս դեպքում կողմ քվեարկողները փաստացի գիտակցաբար խախտեցին ԸՕ-ն եւ իրավական ուժ չունեցող թուղթը հիմք ընդունեցին:

Ի դեպ, բավական հետաքրքիր իրավիճակում հայտնվեց ԿԸՀ-ն: Փաստորեն, այն բանից հետո, երբ այս մարմնի ներկայացուցիչները իրենց գործընկերներին կտեղեկացնեն տեղի ունեցածի մասին, ԿԸՀ պարտավոր է դիրքորոշում արտահայտել: Ու որպեսզի ԿԸՀ-ն չդառնա ապօրինության մասնակից, այս մարմինը կարող է դիմել դատախազությանը` պահանջելով պատասխանատվության ենթարկել թիվ 41 ԸԸՀ այն 5 անդամներին, որոնք քվեարկել են հոգուտ օրենքի խախտմանը` կանխելով անճշտությունների աճը: Ինչեւէ, հաջորդ տեղամասի ստուգումը ի տարբերություն իր նախորդի բուռն կրքերի տեղիք չտվեց, այստեղ անճշտությունների թիվը կազմեց 1, այսպիսով՝ բոլոր երեք տեղամասերի ստուգման արդյունքում անճշտություների թիվը աճեց 10-ով, իսկ առջեւում դեռեւս ստուգման են սպասում եւս 20 տեղամասեր, չնայած, եթե ԸԸՀ-ն այս տեմպերով շարունակի, ապա ԸՕ-ով նախատեսված ժամկետում, որից մնացել է 3 օր, դրանց մի փոքր մասը միայն կստուգի` ասելով, որ մնացածը «չհասցրեց»:

Վահագն Հովակիմյան

Տպել
1884 դիտում

Թիվ 3/5 տեղամասի քվեարկության արդյունքները վերահաշվարկվել են, որևէ ցուցանիշի փոփոխություն չի արձանագրվել. ԿԸՀ

Դատախազության հանձնարարությամբ առերևույթ ընտրախախտումների 42 դեպքերով նախապատրաստվում են նյութեր

Միջազգային սիմպոզիում՝ նվիրված անցումային արդարադատությանը. ներկա կլինի նաեւ Նիկոլ Փաշինյանը

«Dasaran.am» կրթական հարթակը նոր ծրագրի միջոցով կաջակցի զորակոչի կազմակերպմանը

Հեռուստաաշտարակի վերանորգման պատճառով որոշ ռադիոհաճախականություններ ժամանակավոր կանջատվեն

ԿԳՆ-ում անցկացվել է Տարվա լավագույն ուսուցիչ, տնօրեն եւ դաստիարակ մրցույթների վերջին փուլը

Դավիթ Տոնոյանն ընդունել է «Դիտակետ» ծրագրի պատասխանատուներին

Մեկնարկել է Զոհրաբ Մնացականյանի հանդիպումը ԵԱՀԿ Մինսկի խմբի համանախագահների հետ

Փոխվարչապետ Մհեր Գրիգորյանն ընդունել է ՎԶԵԲ Տարածաշրջանային տնօրենների պատվիրակությանը

Գտնվել է առաջ քաշված խնդրի փոխզիջումային տարբերակ. տրանսպորտի փոխնախարար Ա. Փամբուխչյան

Հայ-շվեյցարական համագործակցության շրջանակը բավականին լայն է. Բաբլոյանը՝ Շվեյցարիայի Համադաշնության փոխնախագահին

ՀՀ սփյուռքի նախարարը հանդիպել է Եգիպտոսի վարչապետի հետ

Կանցկացվի ՀՀ և ՌԴ ԶՈՒ զորքերի միացյալ խմբավորման ստորաբաժանումների մարտավարական զորավարժություն

Ամերիկայի Հայ Ավետարանչական Ընկերակցությունն ու ՊՆ-ն կհամագործակցեն Սիրիայի հումանիտար օգնության հարցում

Իշխել հնարավոր է, եթե դու իշխանության մասնիկ ես. ԵԿՄ-ում թեժ զարգացումներ են

Թող ոչ մի երեխա չտեսնի եւ չիմանա պատերազմի սարսափը. մանուկներին նվիրված միջոցառում (լուսանկարներ)

Համապատասխան արձագանք ստանալուն պես կկազմակերպվի 16-ամյա Ումութ Ալի Օզմենի վերադարձը Թուրքիա. ԱԳՆ

Բնակիչների մեծ մասը չսատարեց այդ մոտեցմանը. ՀՀԿ-ն շնորհավորել է Երևանի նորընտիր քաղաքապետին

Մրցույթն ավարտվեց. Գյումրու ծննդատան նոր տնօրենը Էդգար Սուքիասյանն է

Բռնցքամարտի մարզիչներին ստիպում են Արթուր Գեւորգյանի դեմ դուրս գալ. նա պարզաբանում է