Ուսուցիչը բողոքում է տնօրենից, գործընկերները՝ ուսուցչից, փոխնախարարը՝ նրանց տված գիտելիքից

Երեւանի Սամվել Շահմուրադյանի անվան N85 հիմնական դպրոցի բակում ու պատերից ներս մթնոլորտն այսօր շիկացած էր: 9-րդ դասարանն ավարտող աշակերտների մի մասը Հայոց պատմություն առարկայի քննությունից դուրս էին գալիս լացելով: Դպրոցի մոտ խմբված ծնողները բողոքում էին, որ տնօրենի եւ պատմության ուսուցչուհու լարված փոխհարաբերությունների պատճառով տուժում են երեխաները, որոնք քննության են ներկայանում հոգեբանորեն ճնշված՝ հնարավորություն չունենալով դրսեւորել իրենց գիտելիքները: Ուսուցչուհի Հասմիկ Առուշանյանը տնօրենի դեմ վերջերս բողոքներ է ներկայացրել տարբեր մարմիններ: Գործը դարձել է իրավապահների քննության առարկա:

Աշակերտներից ոմանք դժգոհում էին, թե հայոց պատմության ուսուցչուհին քննական տոմսից դուրս իրենց հարցեր էր տալիս՝ չնայած խոստացել էր, որ այդպես չի լինի: Ծնողները նկատում էին, որ այսօր մեծ պահանջներ ներկայացնելու դեպքում հարկավոր էր ուսումնական տարիների ընթացքում առարկան լավ մատուցել, ոչ թե թեմաները դասագրքից ընդամենը կարդալ: Ընդգծում էին, որ ուսուցչուհին ինքը քննության է ներկայացել քննական նյութը պարունակող տետրով զինված եւ կասկած էին արտահայտում նրա մասնագիտական գիտելիքների վերաբերյալ: Ի դեպ, Հասմիկ Առուշանյանի ֆեյսբուքյան էջում ավելի ուշ նշում հայտնաբերեցինք այն մասին, որ սովորել է Երեւանի պետական տնտեսագիտական համալսարանում եւ ունի տնտեսագետ-հաշվապահի մասնագիտություն:

Դպրոցի բակում հավաքված ծնողները հայտարարում էին, որ եթե գործող տնօրեն Դիանա Ղուկասյանն ազատվի զբաղեցրած պաշտոնից եւ նրան փոխարինի Հասմիկ Առուշանյանը, ինչին վերջինս ձգտում է, ապա իրենց երեխաներին տեղափոխելու են մեկ այլ ուսումնական հաստատություն: Հայտարարում էին, որ գործող տնօրենից որեւէ դժգոհություն իրենք չունեն, ինչքան էլ ընդունում են, որ ցանկացած հաստատությունում, փնտրելու դեպքում, հնարավոր է ինչ-ինչ չարաշահումներ հայտնաբերել: Տնօրեն Ղուկասյանն, ըստ ծնողների, միշտ հասանելի է, պատրաստ լսել եւ լուծում տալ իրենց ներկայացրած ցանկացած խնդրի, մարդկային վերաբերմունք ունի:  

«Խնդիրներ կան ու այդ խնդիրները իրոք լուրջ խնդիրներ են, լուծման կարիք ունեցող, ես չեմ հասկանում` ինչ է կատարվում այստեղ, որը ում բարեկամն է, ոնց, ինչ: Նա այսպես ասաց, նա այնպես արեց: Ուղղակիորեն ես ուզում եմ, որ երեխաները դրանից չտուժեն, որովհետեւ երկու քարի արանք ընկածը մեր երեխաներն են, որ լացելով քննությունից դուրս են գալիս, որ շատ վատ են իրենց զգում: Ես այսօր եկել եմ, ձայնս էլ կտրված, հիվանդ՝ ընկել եմ կռիվների մեջ՝ սկսում եմ սրան մի բան ապացուցել, նրան մի բան բացատրել: Ինչի համար ես այդ վիճակի մեջ ընկնեմ, ինչի համար իմ երեխան պիտի դառնա հարցաքննման առարկա»,- ասաց աշակերտներից մեկի ծնողը:

Սամվել Շահմուրադյանի անվան N85 հիմնական դպրոցում ստեղծված պայթյունավտանգ իրավիճակը այստեղ էր բերել նաեւ կրթության եւ գիտության նախարարի տեղակալ Լուսինե Առաքելյանին: Նրա հետ զրույցում նույնպես ներկայացվեց, որ երեխաները լացելով են դուրս գալիս քննությունից, որովհետեւ պատասխանելիս ընդհատում են, տոմսից դուրս հարցերով շեղում: Փոխնախարարն ասաց, որ իր ներկայությամբ նույնպես լացող է եղել: «Ես էլ եմ տոմսից դուրս հարց տվել, որովհետեւ տոմսի հարցերը չգիտեր: Ստիպված հարցրել եմ՝ կասե՞ք Հայաստանի Հանրապետության անկախության օրը: Չի ասել: Համատարած սովորել են միայն «Գրերի գյուտը» եւ «Քրիստոնեության ընդունումը», այն էլ երկու նախադասություն: Բոլորը լացում են հենց տոմսը քաշելիս, բոլորը լացում են դեռ չպատասխանած: Այնտեղ որեւէ մեկը որեւէ մեկին որեւէ տառով չի վիրավորում»,- ասաց քննասենյակից դուրս եկած փոխնախարարը:

Այն ծնողներին, որոնց երեխաները անբավարար են ստացել կամ գնահատականը իրենց չի բավարարում, Լուսինե Առաքելյանն առաջարկեց դիմում ներկայացնել նախարարություն. «Մենք առանձին քննություն կնշանակենք՝ առանց տիկին Առուշանյանի, եւ համապատասխան կարգով ձեր երեխաները նորից կհանձնեն պատմության քննությունը: Փառք Աստծո, ինչպես ասում եք, իրենք սովորել են, ամեն ինչ շատ լավ գիտեն: Տիկին Առուշանյանը քննությանը ներկա չի լինի, եւ որեւէ մեկը հոգեբանական ճնշում չի գործադրի (իմիջիայլոց հիմա էլ շատ հանգիստ եւ անկաշկանդ մթնոլորտ էր), եւ ձեր երեխաները կստանան գնահակատական՝ ըստ իրենց գիտելիքների»:

«Թող դասը ինքը չկարդա, երեխային ասի՝ կգնաս, կսովորես: Ես էլ կարող եմ տանը կարդալ, ասել՝ բալես, սա սովորիր, հասկացա՞ր իմ կարդալով»,- փոխնախարարին դիմելով՝ պատմության ուսուչուհու մասին ասաց մի ծնող: «Թիվ 85 դպրոցի հետ կապված բոլոր պատմություններին՝ բոլոր մանրամասներով, իրենց բոլոր կենցաղային նրբերանգներով, շատ լավ ծանոթ ենք, բայց եկեք հիմա խոսենք խնդրո առարկայի շուրջ»,- պատասխանեց Լուսինե Առաքելյանը:

Լրագրողների հետ զրույցում, անդրադառնալով իր նշած խնդիրներին, փոխնախարարն ասաց. «Ես չեմ ուզում հիմա շատ մանրամասնել, որովհետեւ բողոքները երկուստեք են: Դրանք քննվում են, ուսումնասիրվում են: Ուղղակի կասեմ, որ պատմությունը սկսվել է տիկին Առուշանյանի բողոքի դիմումից՝ նախարարություն, որտեղ ահագին հետաքրքիր մանրամասներ են ներկայացված, որոնք նաեւ շատ շուտով փաստերով, ամենայն հավանականությամբ, կապացուցվեն: Հետո հաջորդել է ուսուցիչների բողոքը՝ տիկին Առուշանյանի հետ կապված, եւ հիմա արդեն միացել են նաեւ աշակերտները: Բողոքների որոշ մասը հիմնավոր են, որոշ մասը՝ ոչ: Ուղղակի այն, ինչ որ ես տեսա քննության ժամանակ, տեսա նաեւ առավոտյան մեկ այլ դպրոցում. սա քննության նկատմամբ հիմնականում մատների արանքով վերաբերմունք է: Կարելի է ասել՝ անհարգալից վերաբերմունք է ընդհանրապես առարկայի նկատմամբ: Ես գտնում եմ, որ այս հարցում մեղավոր են եւ ծնողները, եւ երեխաները, եւ առավելեւս ուսուցիչը»,- եզրափակեց ԿԳ փոխնախարար Լուսինե Առաքելյանը:

Տպել
5297 դիտում

Իլ դը Ֆրանսի պատվիրակությունը հարգանքի տուրք է մատուցել Ցեղասպանության զոհերի հիշատակին

ՀՀ ոստիկանության պատվիրակությունը Դուբայում մասնակցում է Ինտերպոլի 87-րդ Գլխավոր Ասամբլեային

Վերին Լարս տանող ճանապարհահատվածը բացվել է մարդատար ավտոմեքենաների համար. դեսպանություն

Առաջիկա օրերին տեղումներ չեն սպասվում, օդի ջերմաստիճանն էապես չի փոխվի

Ես աշխատող, գործ անող պատգամավոր եմ. Նաիրա Զոհրաբյանը Սյունիքում է, շրջում է գյուղերում (տեսանյութ)

ՀՀ նախագահը իտալական ռազմաարդյունաբերական ընկերության ղեկավարի հետ քննարկել է համագործակցության հնարավորությունը

Հրդեհ բնակարանում, կա տուժած. հայտարարվել է բարդության ԲԻՍ-1 աստիճան

Հանդիպել են Հայաստանի և Իտալիայի նախագահները

Հրադադարի պահպանման ռեժիմն այս շաբաթ խախտվել է 80 անգամ, արձակվել է 700 կրակոց

Կադաստրի գրասենյակները Երևանում կաշխատեն նաև շաբաթ-կիրակի, մարզերում՝ առանց ընդմիջման

Գյուղերում տուն կառուցելու համար նոր փոխառություն կտրվի. խորհրդակցություն Կարմիր շուկայում

Ստեփանծմինդա–Լարս ավտոճանապարհը փակ է. ռուսական կողմում կա 435 բեռնատար և 172 մարդատար ավտոմեքենա

Թուրքիայում Աթաթուրքի արձանը պղծելու համար պատանիներ են ձերբակալվել

Լարսում խցանման մեջ հայտնված վարորդների համար սնունդ, տաք ջուր, դեղորայք է ապահովվել. Փամբուխչյան

Ամենայն Հայոց Կաթողիկոսի ձեռամբ օծվեց Նովոսիբիրսկի նորակառույց եկեղեցին

Գոռ Վարդանյանն այդ օրը փրկել է ինձ. Մարինա Խաչատրյանը՝ քաղաքապետարանի հայտնի միջադեպի մասին

Լարսը շարունակում է փակ մնալ. ռուսական կողմում 400 մարդատար և 150 բեռնատար ավտոմեքենա է մնացել

Գյումրիում ավտոլվացման կետ է այրվել. մեկ մարդ հոսպիտալացվել է տարբեր աստիճանի այրվածքներով

Մարուքյան, Թանդիլյան, Բաբաջանյան, Գորգիսյան. «Լուսավոր Հայաստան»-ի 157 հոգանոց համամասնական ցուցակը

Շոկային սկիզբը, Յուրայի պոկերը ու ՀՀ ֆուտբոլի հավաքականի ջախջախիչ հաղթանակը