Չանչուրյանը կտա՞կ է գրելու. պարի պետականում կրքերը շիկանում են

Տպագրվել է «Հայկական Ժամանակ» օրաթերթի՝ 2005 թվականի հուլիսի 12-ի համարում

Շուտով լրանում է Պարի պետական անսամբլի գեղարվեստական ղեկավար Սուրեն Չանչուրյանի անաշխատունակության թերթիկի ժամկետը, եւ առաջիկա մի քանի օրերի ընթացքում վերջնականապես հայտնի կդառնա, թե ով է ղեկավարելու այս կոլեկտիվը: Մենք արդեն տեղեկացրել ենք, որ դեռ 2004 թվականի սեպտեմբերին կաթվածահար է եղել Չանչուրյանի ձախ կողմը եւ արդեն մի քանի ամիս է, նրա պաշտոնին տիրանալու համար լուրջ ինտրիգներ ու սկանդալներ են տեղի ունենում պարարվեստի գործիչների շրջանում: Բայց քանի որ ՀՀ վաստակավոր արտիստը հրաժարականի դիմում չի ներկայացրել եւ պարբերաբար անաշխատունակության թերթիկ է ներկայացրել անսամբլի տնօրինությանը, թեկնածուներից եւ ոչ մեկին չէր հաջողվում արագացնել Պարի պետականի ղեկավարի հարցի լուծումը:

Երեկ, սակայն, մեզ հայտնի դարձավ, որ օրերս մշակույթի նախարարությունում արդեն սույն հարցը քննարկվել է, եւ դա էլ երեկ թերեւս պատճառ էր դարձել, որ կողմերը կրկին ակտիվանան: Բանն այն է, որ Չանչուրյանի պաշտոնի ամենամեծ հավակնորդը մինչ այժմ էլ համարվում է «Բերդ» պարային համույթի գլխավոր բալետմայստեր Կարեն Գեւորգյանը, որին մշակույթի նախարար Հովիկ Հովեյանը փորձում էր դարձնել Պարարվեստի ուսումնարանի տնօրեն, բայց խայտառակ աղմուկի արդյունքում այդ որոշումը տապալվեց: Պարի պետական անսամբլի կոլեկտիվն անգամ հայտարարեց, թե Չանչուրյանի տեղը գրավելու համար Կարեն Գեւորգյանն անստորագիր նամակներ է ուղարկել Ոստիկանության կազմակերպված հանցագործությունների դեմ պայքարի (6-րդ) վարչություն:

Երեկ, սակայն, վերջին շրջանում բավական պոպուլյար դարձած պարային այս գործիչը մեզ հետ ունեցած զրույցի ընթացքում հայտարարեց, որ ինքը նպատակահարմար չի գտնում աշխատել այդ կոլեկտիվի եւ այդ նախարարության հետ, ու առաջիկա տարիների ընթացքում Պարի պետականն իր ծրագրերի մեջ չի մտնում: Ըստ նրա, վեցերորդ վարչություն ուղարկված անստորագիր նամակներն իրականում գրվել են հենց կոլեկտիվի անդամների կողմից, եւ իր անունն օգտագործելով՝ նրանք փորձում են իրենց հարցերը լուծել: Եւ ընդհանրապես, Պարի պետականում սկսված ամբողջ այդ պատմությունը ղեկավարվում է նախագահականից: «Այդ անսամբլը գոյություն չունի: Ընդհանրապես, բոլոր պետական կոլեկտիվները պետք է լուծարվեն եւ նոր կոնցեպցիաներ ու մոտեցումներ մշակվեն»,- ասում էր Կարեն Գեւորգյանը:

Չնայած Գեւորգյանի այս հայտարարություններին, երեկ հրավիրած մամուլի ասուլիսի ժամանակ Պարի պետական անսամբլի կոլեկտիվի անդամների կողմից հնչում էր բացառապես Գեւորգյանի անունը: «Եթե Կարեն Գեւորգյանը գա, մենք պայքարելու ենք: Բայց մինչեւ Սուրեն Չանչուրյանը հրաժարական չտա, ոչ ոք չի կարող գալ: Եւ նրա հրաժարականի մեջ կարող է գրված լինել, թե ով է նրա պրոտեժեն, այսինքն, ում է ուզում ինքը տեսնել Պարի պետականի գեղարվեստական ղեկավար»,- ասում էր Պարի պետականի բալետմայստեր Ասատուր Կարապետյանը: Այսինքն, կոլեկտիվի անդամների տրամաբանությամբ ստացվում է, որ Չանչուրյանը պետք է կտակ գրի եւ ասի, թե ում է թողնում Պարի պետականը: Ընդհանրապես, մշակույթի նախարարությունն, ըստ նրանց, իրավունք չունի առանց կոլեկտիվի կարծիքը հարցնելու, Պարի պետականում նշանակում անել:

Բայց նախարարությունը, փաստորեն, ոչ միայն կոլեկտիվի կարծիքը չի հարցրել, այլ ավելին, անսամբլի բալետմայստերի տեղեկություններով, մոտ օրերս խորհրդակցություն է հրավիրել եւ քննարկել Պարի պետականը «Բարեկամություն» անսամբլի հետ միավորելու հարցը: Սա թերեւս ամբողջությամբ լցրել էր կոլեկտիվի անդամների համբերության բաժակը: Հասկանալի է, սակայն, մշակույթի նախարարության քննարկած միավորման այս տարբերակն ամենեւին էլ չի կարող գոնե առաջիկայում իրականություն դառնալ, քանի որ այս դեպքում արդեն երկարատեւ սկանդալն անխուսափելի կլինի: Ամեն դեպքում, նախարարությունը կարծես թե հասկացել է, որ այդ տարբերակը չի կարող իրականություն դառնալ եւ դադարեցրել է հարցի հետագա քննարկումը:

Բայց եթե անգամ այս տարբերակը չիրականանա եւ Կարեն Գեւորգյանն էլ իսկապես հրաժարվի Պարի պետականի գեղարվեստական ղեկավարի հավակնություններից, միեւնույն է, լարումը կոլեկտիվում սրանով թերեւս չի ավարտվի, քանի որ նրանք միասնական թեկնածու չունեն: Երեկ, երբ անսամբլի բալետմայստերը հայտարարում էր, որ Չանչուրյանը պետք է ասի, թե ով է լինելու իր իրավահաջորդը, անսամբլի ստուդիայի տնօրենը պնդում էր, որ Չանչուրյանը վերադառնալու է աշխատանքի, իսկ Պարարվեստի գործիչների միության նախագահ Վանուշ Խանամիրյանն ասում էր, որ Չանչուրյանի հետ հնարավոր չէ հանդիպում կազմակերպել, իսկ մի պահ էլ քիչ էր մնում, որ Կարապետյանն ու Խանամիրյանը հրապարակային կոնֆլիկտ ունենային, չնայած մասնակցում էին համատեղ ասուլիսի:

Եւ ընդհանրապես, ինչպես ցույց է տալիս տարիների փորձը, Պարի պետականում պարբերական սկանդալները սովորական երեւույթ են: Մինչ այժմ այստեղ սկանդալային պատմություններ են եղել մի քանի ղեկավարների հետ, ընդ որում, բոլորն էլ արտասահմանյան հյուրախաղերի հետ կապված: Ամեն դեպքում, անորոշ իրավիճակը պետական այս խմբում որոշակի կդառնա շատ շուտով, քանի որ Սուրեն Չանչուրյանի անաշխատունակության թերթիկը, որն ավարտվում էր ապրիլի 28-ին, այնուհետեւ երկարացվել էր ընդամենը երեք ամսով:    

Լուսինե Բարսեղյան