Քրեական հեղինակություն Բոգոն առեւանգել է վարորդին, շամփուրով ծեծել, 10.000 դոլար պահանջե՞լ

ՀՀ ԱԺ պատգամավոր Սամվել Ալեքսանյանի մտերիմ, Արկադի Համբարձումյանի խնամի Բոգո մականունով հայտնի քրեական հեղինակություն Ռուբեն Կոստանյանը (Սիմոնյան) հայտնվել է իրավապահների ուշադրության կենտրոնում:

Նրա դեմ մոտ մեկ ամիս առաջ հաղորդում է ներկայացվել 2017 թվականի սեպտեմբերին տեղի ունեցած շորթման դեպքի առթիվ: Սույն գործով տուժողը, որը հասկանալի պատճառներով չցանկացավ ներկայանալ, մեր զրույցում սույն դեպքի վերաբերյալ մանրամասներ պատմեց:

Նորագյուղից Բոգոն հայտնի է, որպես ավտոկայանի նայող, ըստ մամուլում շրջանառվող տեղեկությունների՝ նա էր, այսպես ասած, հսկում ավտոկայանում տաքսիների վարորդներին, որոնք ապահովում էին Երեւան-Մարտունի, Երեւան-Ստեփանակերտ եւ այլ երթուղիներ: Երեւան-Ստեփանավան երթուղում ուղեւորափոխադրում իրականացրածներից մեկն էլ եղել է տուժողը: Նա Բոգոյի մոտ է աշխատել 2016 թվականից մինչեւ 2017 թվականի հունվար: Մեր զրույցում տուժողը պատմեց, որ քառօրյա պատերազմի մասնակից է եղել, պատերազմից հետո տեղեկացել է, որ Երեւան-Ստեփանավան երթուղի կա եւ ցանկացել է աշխատել որպես վարորդ: «Աշխատել եմ մի քանի ամիս, հետո մեքենայի վրա ծախս եմ արել, չեմ կարողացել գումարը վճարել, իրենց մեքենան ես սարքել եմ ու իրենց 100 հազար դրամ պարտք եմ մնացել, չեմ էլ ժխտել, իրենց ասել եմ, որ անպայման 100 հազար դրամ գումարը ես կվերադարձնեմ:

Մինչեւ 2017 թվականի հունվարն աշխատել եմ ու մինչեւ սեպտեմբեր ոչ մի զանգ չի եղել, ինձ այդ հարցով չեն անհանգստացրել: Սեպտեմբերին իրենց աղբյուրներով ճշտում են, որ ես տունս վաճառում եմ ու ամսի 3-ի լույս 4-ի գիշերն ինձ առեւանգել են Աջափնյակից ու տարել Կիլիկիա ավտոկայանի հետնամաս, որտեղ ծեծի են ենթարկել, նվաստացրել, սեռական բնույթի հայհոյանքներ հնչեցրել, սպառնացել են վնասել ընտանիքիս անդամներին, այդ թվում՝ երեխաներիս եւ ասել, որ 100 հազար դրամ պարտքի դիմաց ես իրենց 10 հազար դոլար պետք է վճարեմ: Որոշողն էլ եղել է հենց անձամբ ինքը՝ Ռուբեն Կոստանյանը (Սիմոնյան) նույն ինքը՝ Բոգոն»,- մեր զրույցում պատմեց նա՝ հավելելով, որ առեւանգողը եղել է երթակարգավարը, որը Բոգոյի բարեկամն է: «Առեւանգելուց եղել ա երթակարգավարը, իր բարեկամն ա, տարել ա Կիլիկիայի ավտոկայանի մոտ, մեքենայիս բանալին, հեռախոսներս վերցրել է, ավտոկայանի մոտ միացել են արդեն սկզբից իր (Բոգոյի,-հեղ.) մյուս բարեկամը, հետո մեծ տղան, հետո ինքն ա միացել իր մյուս մարդկանց հետո, մոտ 6-7 հոգի են եղել»:

Մեր հարցին, թե ծեծին անձամբ Բոգոն մասնակցե՞լ է, տուժողը դրական պատասխան տվեց. «Բոլորն էլ ծեծել են, սկզբից իր որդին՝ Հովհաննեսն ա ծեծել, ջուրը պահել վրաս, շլանգով ծեծել ա, լիմոնադի արկղով գլխիս ա տվել, խորովածի շամփուրով ա ծեծել մարմնիս տարբեր հատվածներում դրա սպիները ունեմ: Արդեն դատաբժշկի մոտ էլ եմ գնացել»: Մյուս հարցին, թե 10 հազար դոլարը համաձայնե՞ց վճարել, տուժողն ասաց, որ այլ ելք չուներ. «Հաշմանդամ եմ դարձել, ոտքս նորմալ չեմ կարողանում շարժել, երկար քայլում եմ, ցավում ա էդ ծեծից հետո: Խոստացել եմ 10 հազար դոլար վճարել, հետո պայմանավորվածություն է ձեռք բերվել, 5000 դոլար եմ տվել, 1000 դոլար էլ իր քրոջ տղան ա խլել, որպես մաղարիչ, որ էդ 10 հազար դոլարը սարքել ա 5000 դոլար: Տունս վաճառել եմ, Էդ գումարը տվել եմ իրենց, ուրիշ տուն եմ գնել պարտքով»,- մանրամասներ ներկայացրեց տուժողը:

Վերջինս մեր զրույցում ասաց, որ 2017 թվականին տեղի ունեցած դեպքի մասին հիմա է հաղորդում ներկայացրել, քանի որ նախկին իշխանություններին չի վստահել: Այն ժամանակ էլ ինձ ասում էին՝ որտեղ ուզում ես գնա դիմի, մեկա՝ սաղ վլաստը մեր ձեռքն ա: Ես էլ պարզ իմանալով, որ Ազգային ժողովի երկու հանրապետական պատգամավոր իր մտերիմ հարազատներն են՝ Սամվել Ալեքսանյանը, Դերժավայի Արկադի Համբարձումյանը՝ իր խնամին, ոչ մի տեղ չեմ դիմել, չեմ վստահել: Հայաստանում տեղի ունեցած թավշյա հեղափոխությունից հետո Մոսկվայում եմ եղել, հետ եմ եկել, դիմել եմ իրավապահներին ու մինչեւ վերջ պայքարելու եմ»,- նշեց մեր զրուցակիցը:

Նա ասաց, որ հանցագործության մասին հաղորդում ներկայացրել է սույն թվականի հունիսի 12-ին եւ իր պատմելով, հաջորդ օրը Բոգոն ճնշում է գործադրել առանցքային վկաներից մեկի վրա՝ վախեցնելով, որ եթե ինչ-որ մի բառ ասի, ամեն ինչ իր վրա է «ջարդվելու»: «Ձայնագրություններ կան, իրավապահ մարմիններին էլ հանձնված է տվյալ ձայնագրությունը: Վկան հիմա չի գնում անգամ վկայություն տալու՝ իրենց ճնշման արդյունքում, ընտանիքով են սպառնացել, վախեցրել, որ վկան չգնա ցուցմունք տա, Կոստանյանն իր շքախմբով վախեցրել ա: Վկան ծեծին ա ներկա եղել, գումար վճարելուն՝ նույնպես: Հաղորդում տալուց հետո Ռուբեն Կոստանյանն ինձ էլ ա զանգահարել ու ասել, որ նման բան չանեմ, ես էլ պատասխանեցի, որ դուք արել եք, պետք ա պատասխան տաք: Ու սպառնացել ա, որ հիմա կտենաս հակառակը, թե ես ոնց եմ շառ անելու քո վրա, ուզում ես աշխարհի ծերը բողոքի: Այս ձայնագրությունը եւս կա ու ներկայացրել եմ իրավապահներին»,- եզրափակեց տուժողը:

Տեղեկացանք, որ քրեական հեղինակություն Բոգո մականունով հայտնի Ռուբեն Կոստանյանը քրեական գործի շրջանակներում դեռ որեւէ կարգավիճակ չունի: Գործը քննվում է ՀՀ քննչական կոմիտեում: ՔԿ նախագահի խորհրդական Սոնա Տռուզյանը մեր հարցին ի պատասխան միայն ասաց, որ նման քրեական գործ ոստիկանությունից ստացվել է, կատարվում է քննություն եւ ձեռք բերված ապացույցների հիման վրա կկայացվի համապատասխան դատավարական որոշում: Տռուզյանն ասաց, որ այս գործով այլ մանրամասներ հրապարակման ենթակա չեն:

Համացանցային որոնման արդյունքում քրեական հեղինակության Բոգոյի անվան հետ կապված մամուլում բազմաթիվ հրապարակումներ հայտնաբերեցինք: Ամենաթարմը, թերեւս 2016 թվականին տեղի ունեցած դեպքն է եղել: 2016 թվականի հուլիսին ծեծկռտուք, ապա կրակոց էր տեղի ունեցել Իսակովի պողոտայում գտնվող «555» հացատանը: Վիրավորներից մեկը հենց Բոգոն էր, մյուսը՝ «Ֆեռո» ընկերության տերը՝ Ռոբերտ Ավետիսյանը. վերջինիս 15 մլն դրամ պարտք էին տվել՝ բիզնեսը զարգացնելու նպատակով եւ կարողացել էին ստանալ միայն 5 մլն-ն։ Մյուս մասը հենց Բոգոն է գնացել ստանալու եւ հույս է ունեցել գումարը ստանալ հենց այդ օրը: Կանչել է Ավետիսյանին Իսակովի պողոտայում գտնվող «555» հացատուն, բայց գումարը հետ ստանալ չի հաջողվել։ Վիճաբանություն է տեղի ունեցել, որը վերածվել է ծեծկռտուքի եւ ավարտվել կրակոցներով: Բոգոյին մեղադրանք էր առաջադրվել բռնության գործադրմամբ ինքնիրավչության համար եւ 2017 թվականին նրա նկատմամբ պատիժ էր նշանակել տուգանք՝ ՀՀ-ում սահմանված նվազագույն աշխատավարձի յոթհարյուրապատիկի չափով:

Երեկ մեզ չհաջողվեց շորթման դեպքի վերաբերյալ պարզաբանում ստանալ նրանից:

Տպել
28086 դիտում

Սփյուռքի նախարարը կհանդիպի Եգիպտոսի վարչապետի հետ

Խաղաղություն եւ մեծագույն հաջողություններ. Բակո Սահակյանը շնորհավորել է ՀՀ անկախության 27-րդ տարեդարձը

Հրազդանի նախկին քաղաքապետ Արամ Դանիելյանի նկատմամբ հարուցվել է քրգործ. պաշտոնական

Արա Բաբլոյանը պաշտոնական այցով կմեկնի Շվեյցարիա

Թուրք սահմանախախտ երեխայի ծնողները խնդրում եմ ՀՀ իշխանություններից հետ վերադարձնել իրենց որդուն

Երթուղայինով՝ «պպզած». առանց ռազմավարության

Էլի չստացվեց. «ԱՄ»-ն Ռուզան Խաչատրյանի հետ չէ

55 միլիոն դրամ. ավտոմեքենաների տեխզննությամբ զբաղվող ընկերությունները մասնակի վերականգնել են պետության պատճառված վնասը

Խասիաթ. եթե կալանավորել են՝ կդատեն

Մոլախաղեր, գյուղատնտեսություն եւ ընդերք. տնտեսական կառուցվածքը կառավարությանը չի բավարարում. վարչապետ

Մեծ դեբատ. Հանրային հեռուստաընկերության եթերում կբանավիճեն Երեւանի քաղաքապետի թեկնածուները

«Ռոնալդու. կատարելության տենչով» գիրքը հասանելի է հայերենով

ԱՊՀ անդամ երկրներին ներկայացվել է կոռուպցիայի դեմ պայքարում ՀՀ փորձն ու աննախադեպ արդյունքները

Շվեյցարիա, Ղազախստան, Չինաստան. Արմեն Սարգսյանին շնորհավորում են ՀՀ անկախության 27-րդ տարեդարձի առթիվ

Ucom-ի բաժանորդները կվայելեն 5 դրամ/ՄԲ ռոմինգի առավել մատչելի սակագինը Ռուսաստանում

ԼՂ հակամարտության խաղաղ կարգավորման հարցը մշտապես ԱԺ ուշադրության կենտրոնում. Բաբլոյանը վստահեցրել է Ղուլյանին

ՖԻՖԱ-ի աղյուսակում ՀՀ ֆուտբոլի ընտրանին կրկին 100-րդն է, 1-ին տեղում 2 թիմ է

Էրիկ Էսրաիլյանը եւ Ջին Բլոքը հարգանքի տուրք են մատուցել Հայոց ցեղասպանության զոհերի հիշատակին

Մուշեղ Սաղաթելյանը ենթարկվել է խոշտանգումների. մանրամասներ Մարտի 1-ի գործով ՄԻԵԴ վճռից

Ինչո՞ւ են վաղը սելֆի անելու. նախարարն աղմուկի կենտրոնում հայտնված միջոցառման մասին