Մենք պաշտպանել ու պահպանել ենք այն ամենը, ինչ մեզ բնորոշում է իբրեւ ազգ. Գարեգին Բ-ն՝ Նյու Յորքի «Մետրոպոլիտան»-ում

Սեպտեմբերի 24-ին Ն.Ս.Օ.Տ.Տ. Գարեգին Երկրորդ Ծայրագույն Պատրիարք եւ Ամենայն Հայոց Կաթողիկոսը Նյու Յորքում (ԱՄՆ) ներկա գտնվեց «Մետրոպոլիտան» արվեստի թանգարանում կազմակերպված «Հայաստան» ցուցահանդեսի պաշտոնական բացման արարողությանը: Այս մասին հայտնում են Մայր աթոռի մամուլի ծառայությունից:

Մի քանի տարի նախապատրաստվող այս եզակի ցուցահանդեսում ներկայացված են ավելի քան 140 ցուցանմուշներ, որոնք տրամադրվել են Հայաստանյայց Առաքելական Ս. Եկեղեցու Նվիրապետական Աթոռների թանգարաններից, Հայաստանի պատմության թանգարանից, Մեսրոպ Մաշտոցի անվան Մատենադարանից, ինչպես նաեւ Սփյուռքում գործող տարբեր թանգարաններից եւ մասնավոր հավաքածուներից: Ցուցադրված սրբությունների եւ արվեստի գործերի մեծ մասը դարերի ընթացքում ստեղծվել եւ պահպանվել է Հայոց Եկեղեցու կողմից։

Պաշտոնական ընդունելության ընթացքում Նորին Սրբությունն առանձնազրույց ունեցավ թանգարանի ղեկավարության եւ «Հայաստա՛ն» ցուցահանդեսի հիմնական համադրող դոկտ. Հելեն Էվանսի հետ, որոնց փոխանցեց իր գնահատանքը հիանալի ցուցահանդեսի կազմակերպման համար։ Գարեգին Բ Կաթողիկոսն իր շնորհակալական խոսքն ասաց նաեւ ցուցահանդեսին աջակցություն բերած բարերար հայորդիներին եւ ազգային-եկեղեցական հաստատությունների ներկայացուցիչներին:

Կազմակերպիչների խոսքով, ցուցահանդեսը մասունքարանների, մանրանկարներով զարդարուն ձեռագրերի, եզակի գործվածքների, խաչքարերի, արժեքավոր եկեղեցական զգեստների եւ հնատիպ գրքերի միջոցով ներկայացնում է, թե ինչպե՛ս են հայերը զարգացրել իրենց քրիստոնեական ինքնությունը, որը դարեր շարունակ շաղկապել է աշխարհասփյուռ հայ համայնքներին:

Բացման արարողությանն Ամենայն Հայոց Կաթողիկոսը իր օրհնությունն ու պատգամը բերեց միջոցառման մասնակիցներին` մասնավորապես նշելով.

«...Այստեղ ցուցադրված մշակութային նմուշները եւ քրիստոնեական մասունքները, հիրավի, բնական ընկալում են ձեւավորելու այն մասին, թե դարերի ընթացքում ի՛նչ արժեքներ է ստեղծել քրիստոնեությունը պետական կրոն հռչակած առաջին ժողովուրդը եւ ի՛նչն է առավել շատ կարեւորել ու փայփայել:

…Մենք պաշտպանել ու պահպանել ենք այն ամենը, ինչ մեզ բնորոշում է իբրեւ ազգ ու ժողովուրդ՝ մեր հայրենիքը, մեր լեզուն, մեր եկեղեցիները, մեր գիրը, սրբությունները եւ հավատքը։ Մեր կրոնը, մեր Ազգային Եկեղեցին է մեզ օգնել ապահովել մեր ազգային զարգացման անընդհատությունն այն դժնդակ տարիներին, երբ զուրկ ենք եղել պետականությունից։

Եվ այսօր այստեղ ենք. ժամանակին համընթաց ապրող ազգ, որը հպարտորեն ցուցադրում է իր աստվածատուր մշակութային ժառանգության հարստությունը Նյու Յորքի «Մետրոպոլիտան» թանգարանում՝ արժանավոր տեղ զբաղեցնելով աշխարհի մեծ ժողովուրդների կողքին»։

Ելույթի ավարտին Նորին Սրբությունը նաեւ իր գնահատանքը փոխանցեց Հայաստանի բոլոր բարեկամներին, իսկ ցուցահանդեսի գլխավոր համադրող դոկտ. Հելեն Էվանսին, ի նշան հայ ժողովրդի երախտագիտության, շնորհեց Հայաստանյայց Առաքելական Սուրբ Եկեղեցու «Սուրբ Սահակ-Սուրբ Մեսրոպ» պատվո բարձր շքանշան:

Միջոցառմանը ներկա էին ՀՀ վարչապետ Նիկոլ Փաշինյանը, ԱՄՆ Հայոց Արեւելյան թեմի հոգեւոր դասը առաջնորդությամբ թեմակալ առաջնորդ Հոգեշնորհ Տ. Դանիել վարդապետ Ֆինդիկյանի, Գերաշնորհ Տ. Խաժակ արքեպիսկոպոս Պարսամյանը, Հայկական Բարեգործական Ընդհանուր Միության նախագահ Պերճ Սեդրակյանը, հայ ազգային բարերարներ, Նյու Յորքի հայ համայնքային կազմակերպությունների ներկայացուցիչներ։

Ցուցահանդեսը հնարավոր է դարձել «Հակոբ Գեւորգյան հիմնադրամի» աջակցությամբ։ Հավելյալ աջակցություն են տրամադրել Նյու Յորքի Քարնեգի կորպորացիան, Միշել Դավիդ-Վեյլ հիմնադրամը, Հայկական Բարեգործական Ընդհանուր Միությունը, Գյորգի ընտանիքի հիմնադրամը, Հրայր եւ Աննա Հովնանյաններ հիմնադրամը, Կարագյոզյան հիմնադրամը, Նազար եւ Արտեմիս Նազարյանների ընտանիքը, Արվեստների Ռեդդոք հիմնադրամը, Քուլհաջյան ընտանիքը եւ Փարոս հիմնադրամը, Ասո Օ. Թավիթյանը եւ Արվեստների ազգային հիմնադրամը։

«Մետրոպոլիտան» թանգարանում «Հայաստա՛ն» ցուցահանդեսի պաշտոնական բացումից հետո Գարեգին Երկրորդ Վեհափառ Հայրապետը եւ ՀՀ վարչապետ Նիկոլ Փաշինյանը Ասո Օ. Թավիթյանի հրավերով հյուրընկալվեցին պաշտոնական ընթրիքի, որին մասնակցում էին նաեւ Նյու Յորքի այլ խոշոր համայնքների կրոնական առաջնորդները, որոնց թվում Կաթոլիկ Եկեղեցու կարդինալ Թիմոթի Դոլանը եւ ԱՄՆ-ի Հույն Ուղղափառ Եկեղեցու առաջնորդ Դեմիտրիոս արքեպիսկոպոսը։

Տպել
632 դիտում

Քննարկվել է գենետիկ հետազոտություններին վերաբերող 10 մլն դոլար արժողությամբ «Հայկական գենոմ» նախագիծը

Մեծ է հավանականությունը, որ նոր կառավարության կառուցվածքում սփյուռքի նախարարություն չենք ունենա․ Նիկոլ Փաշինյան

Ժամանակը ջրի երես հանեց իրականությունը. Մարինա Խաչատրյան

Տարօրինակ չէ, որ Ավինյանը դրամաշնորհ է ստացել փոխվարչապետ նշանակվելու օրը․ Փաշինյանը՝ Տ․ Ավինյանի ստացած գրանտի մասին

ՀԱՊԿ-ի ներսում տեղի է ունեցել շատ լուրջ խոսակցություն, որը ստեղծման օրվանից տեղի չի ունեցել. Փաշինյան

Բոլթոնը եկավ, առաջարկ եղավ, մենք հնարավորություն չենք տեսնում. Փաշինյանն՝ ԱՄՆ-ից զենք գնելու մասին

Պետք չէ անհարկի քաղաքականացնել. Փաշինյանը՝ Գյումրիում սպանված կնոջ մասին

Քառօրյա պատերազմի վերաբերյալ կարդացել եմ տասնյակ էջերով գաղտնի նյութեր, հետախուզության նյութերի բացակայություն չի եղել

Նախիջեւանի դիրքերի տեղաշարժերի 95 տոկոսը տեղի է ունեցել 2018 թվականի փետրվար-մայիս ամիսներին. Փաշինյան

Փախուստի փորձ «Նուբարաշեն» քրեակատարողական հիմնարկից. մեղադրանք է առաջադրվել 8 անձի

Փաշինյանը՝ Լուկաշենկոյի այն հայտարարության մասին, թե ինչու Պուտինին բան չի ասում Ադրբեջանին զենք վաճառելու համար

Հանրային ռադիոյի գործադիր տնօրեն Մարկ Գրիգորյանը հրաժարական տվեց

Թեւակոխում ենք առավել ինտենսիվ եւ ընդարձակ ծրագրերի կազմման ու իմպլեմենտացման փուլ. Նիկոլ Փաշինյան (տեսանյութ)

ՀՀ ոչ մի կառավարություն Ղարաբաղի հարցում այդքան թափանցիկ չի եղել, որքան մեր կառավարությունը․ Փաշինյան

Նրանք ՊԲ հնաբնակներ են. Փաշինյանը՝ Արցախի ՊԲ-ում տեղի ունեցած փոփոխությունների մասին

2018-ին ոչ մի անգամ չեմ հանդիպել ֆեդերացիայի նախագահի հետ. Ստեփանյանի քննադատությունը

Կրեմլում անհանգիստ են ԱՄՆ-ի ֆինանսավորած լաբորատորիաներով

Գլխավոր հատակագիծ. ամեն հայի հույսի տուն...

Դեբեդավանի դպրոցի տնօրենն իր հրազատներին տեղավորել է աշխատանքի եւ սեփականացրել դպրոցը․ նամակ՝ Փաշինյանին

Վանդալիզմը Երեւանում. Բուզանդը դիմադրում է հացադուլով