ՀՀԿ-ն կողմ չէ Ընտրական օրենսգրքի վերաբերյալ ներկայացված փոփոխություններին. Արփինե Հովհաննիսյան

Մեր խմբակցությունը կողմ չէ Ընտրական օրենսգրքի վերաբերյալ ներկայացված փոփոխություններին: ԱԺ-ում լրագրողներին ասաց ՀՀ ԱԺ փոխնախագահ Արփինե Հովհաննիսյանը։ «Դրա հիմքում ընկած են մի շարք պատճառներ, որոնցից հիմնականն այն հապճեպությունն է, որով այս փոփոխությունները ներկայացվել են։ Թե՛ Վենետիկի հանձնաժողովի, թե՛ ԵԱՀԿ ԺՄԻԳ-ի եզրակացությունները այս հարցի կապակցությամբ չկան։ Փաստենք, որ առաջին անգամ նրանք Ընտրական օրենսգրքի վերաբերյալ չեն ներկայացրել տեսակետ»,- նշեց Հովհաննիսյանը։

Անդրադառնալով Վենետիկի հանձնաժողովի նախագահի հայտարարությանը՝ Հովհաննիսյանը նշեց, որ նա գնահատական է տվել փոփոխությունների բնույթին, որտեղ բառացիորեն նշված է խոշոր փոփոխությունների մասին։ «Կան փոփոխություններ, որոնք էական բնույթի են կամ խոշոր փոփոխություններ են եւ կան այնպիսիք, որոն ոչ էական են։ Խոշոր փոփոխությունների հետ կապված հանձնաժողովի դիրքորոշումը շարունակում է մնալ նույնը՝ դրանք պիտի կատարվեն այնպիսի ժամանակահատվածում, որպեսզի քաղաքական ուժերը ժամանակ ունենան ու դրա համար այդ մեկ տարին անընդհատ նշվում է։ Անկեղծ ասեմ, որ ես բացարձակապես չէի ակնկալում, որ որեւէ մեկի կամ որեւէ երկրի կամ անձի կամ որեւէ քաղաքական ուժի համար Վենետիկի հանձնաժողովը կփոխի 47 անդամ-պետությունների համար տարիներ շարունակ ընտրությունների համար մշակած մոտեցումը։ Սա նորմալ է»,- ասաց նա:

ՀՀ ԱԺ փոխնախագահ Արփինե Հովհաննիսյանը՝ անդրադառնալով ԱԺ արտահերթ ընտրություններին ՀՀԿ-ի մասնակցությանը, նշեց, որ իր անձնական դիրքորոշումը ոչ թե ինչ-որ ցանկությունների հանրագումար է, այլ մի շարք գործոնների հավասարակշռում ու դրա հիման վրա դիրքորոշման ձեւավորում։ «Ես այդ գործոնների հետ կապված իմ դիրքորոշումները կուսակցության ներքին քննարկումներում արտահայտել եմ, ասել եմ, թե ինչ հանգամանքներ եմ կարեւորում։ Այս պահի դրությամբ դեռեւս կլռեմ այդ գործոնների մասին, հետո, քիչ ավելի ուշ կխոսեմ, թե՛ իմ անձնական դիրքորոշման համար հիմք հանդիսացած գործոնների եւ թե՛ հանրապետական կուսակցության համար հիմք հանդիսացած կուսակցական դիրքորոշման մասին»,- նշեց Հովհաննիսյանը։

Դիտարկմանը, թե համաձայն է ՀՀԿ խոսնակի այն հայտարարության հետ, որ դաշինքով ընտրություններին մասնակցելը քննարկման թեմա է, Հովհաննիսյանը նշեց. «Դա ավելի ուշ շրջանի քննարկման թեմա է, մի շարք հանգամանքներից ու գործոններից է կախված»։

Վարչապետի թեկնածու առաջադրելու հարցում ՀՀԿ-ն որեւէ անակնկալ չի պատրաստվում մատուցել, ՀԺ-ի հարցին ի պատասխան ասաց Արփինե Հովհաննիսյանը։ Դիտարկմանը, թե արդյոք անհրաժեշտ է հրավիրել նիստ այն դեպքում, երբ ոչ մի խմբակցություն թեկնածու չի առաջադրում՝ Հովհաննիսյանը նշեց. «Նիստ պետք է գումարվի ցանկացած դեպքում։ Սա իրավունքի ուժով գումարվող հատուկ նիստ է, որը պետք է հրավիրվի։ Մնացած ձեւակերպումների հետ կապված՝ այս պահին չեմ ուզում որպես ՀՀԿ ներկայացուցիչ՝ ինչ-որ վերաբերմունք կանխորոշել»,- նշեց Հովհաննիսյանը։

Նա ասաց, որ այս պահին կառավարության ներկայացուցիչների միջեւ եւս կա անհամաձայնություն առ այն, թե ինչպես անցկացնել արտահերթ ընտրությունները, քանի որ կա անհամաձայնություն «քվեարկություն» տերմինի հետ կապված։ Նա նկատեց, որ կա երկու տարբերակ՝ Նիկոլ Փաշինյանի թեկնածությունն առաջադրել ու հետո ենթադրել, որ կլինի քվեարկություն, որտեղ նա չի ընտրվի, կամ էլ որեւէ քաղաքական ուժ որեւէ թեկնածուի չի առաջադրի։ «Մեկնաբանությունը սահմանադրականության տիրույթում է, թող կառավարությունն ինքը որոշի»,- ասաց նա։

Դիտարկմանը, ՀՀԿ-ն կանի՞ այնպես, ինչպես որոշի կառավարությունը Հովհաննիսյանն արձագանքեց. «Ես, որպես ՀՀԿ խմբակցության ներկայացուցիչ, կհետեւեմ կուսակցության դիրքորոշմանը։ Ինչպես արդեն ասացի՝ անակնկալներ թեկնածու առաջադրելու տեսքով, բնականաբար, չեն սպասվում»։