Երկրորդ քաղաք. Գյումրին ընտրում է կրիմինալին

Տպագրվել է «Հայկական Ժամանակ» օրաթերթի՝ 2005 թվականի հոկտեմբերի 25-ի համարում

Շիրակի մարզպետ Ռոմիկ Մանուկյանը Գյումրիի քաղաքապետ եւ քաղաքապետի թեկնածու Վարդան Ղուկասյանին գիտի որպես «քրեական անցյալով մարդ»: Քվեարկությանը օրը` կիրակի առավոտյան, պարոն Մանուկյանը վստահ էր, որ կեղծիքներ տեսնելու դեպքում գյումրեցին այնպես կհակազդի, որ «մենք էլ կրակը կընկնենք»: Օրվա սկզբին մարզպետն արդեն տեղեկություններ ուներ, որ Վարդան Ղուկասյանի կողմնակիցները «շենք առ շենք ընկած՝ անում են ամեն ինչ, որ մարդիկ քվեարկության չգնան»: Փաստն այն է, որ Գյումրիի 119 հազար 51 ընտրողից քվեարկությանն, ըստ թիվ 34 ԸԸՀ-ի, մասնակցել է 46 հազար 324 մարդ կամ ընտրողների 39,5 տոկոսը:

Գործող քաղաքապետ Վարդան Ղուկասյանը 6 հազար 339 ձայնի տարբերությամբ կիրակի օրը վերընտրվեց Գյումրիի քաղաքապետի պաշտոնում: 79 տեղամասերի արդյունքով նախնական հաշվարկներով նա հավաքել է 23 հազար 350 ձայն: ՀՀ ԱԺ երեք գումարումների պատգամավոր Մարտին Սուքիասյանի շտաբը թիվ 34 ընտրատարածքային ընտրական հանձնաժողովում երեկ մինչեւ ժամը 14-ը արդեն բողոքարկել է ընտրությունների արդյունքները: Ըստ Մարտին Սուքիասյանի նախընտրական շտաբի պետ, Շիրակի փոխմարզպետ, Գյումրիի նախկին քաղաքապետ Միքայել Վարդանյանի, բողոքարկման հիմնական պատճառն այն է, որ ընտրատարածքներում ընտրողների ցուցակներն էականորեն տարբերվում էին այն ցուցակներից, որոնք կային շտաբի տրամադրության տակ:

«Նույն տարածքի ընտրողները ցրված էին տեղամասերով»,- ասաց Շիրակի փոխմարզպետը: Թիվ 34 ԸԸՀ նախագահ Սայադ Մինասյանն ասում է, որ Մարտին Սուքիասյանի բերած բողոքը ԸՕ 40/1-ով կմերժվի, որովհետեւ «համապատասխան ձեւով չի ներկայացվել»: Այսինքն, անստորագիր է, եւ շտաբի պետն իր տվյալները ճիշտ չէր ներկայացրել: Ըստ այդմ, «կեղծ տվյալներ պարունակող դիմումները չեն քննարկվում»: Մարտին Սուքիասյանի շտաբի պետը երեկ ժամը 16-ի դրությամբ դեռ տեղյակ չէր, որ ԸԸՀ-ն մտադիր է մերժել իր դիմումը: Թեկնածուներից ոչ մեկն էլ ԸԸՀ-ին բողոքներ չի ներկայացրել երեկ տեղի ունեցած բռնությունների կապակցությամբ: Ողջ կիրակի օրվա ընթացքում քաղաքում երկու թեկնածուներն էլ ընտրակաշառք էին բաժանում:

Մարդիկ անձնագրերով գալիս էին Վարդան Ղուկասյանի շտաբ, եւ շտաբի պետի սենյակում նրանց տեղեկացնում էին, թե որ սենյակը պետք է մտնել: Շտաբի պատասխանատու, Գյումրիի փոխքաղաքապետ Գագիկ Մանուկյանը մեզ տեղեկացրեց, որ անձնագրերով եկած այդ մարդկանց իրենք պարզապես տեղեկացնում են, թե որ տեղամասում պետք է քվեարկեն: Մարտին Սուքիասյանի շտաբն ընտրությունների նախորդ օրը քաղաքի կենտրոնից տեղափոխվել էր ծայրամաս՝ «Թուրքի մայլա» թաղամաս: Այստեղ անձնագրերով մարդկանց կուտակումներ կային: Երբ Միքայել Վարդանյանից հետաքրքրվեցինք, թե ինչու են տեղափոխել շտաբը, որտեղ աշխատել են այս ամսվա 5-ից, միգուցե աչքից հեռու կաշառք բաժանելու համա՞ր, պարոն Վարդանյանը պատասխանեց. «Նախորդ շտաբը վերցրել էինք վարձով, կոմունիկացիաներ չունեինք»:

Հանդիպեցինք մի կնոջ, որը չգիտեր, թե ումից պետք է պահանջի Մարտին Սուքիասյանի օգտին իր բերած քվեների գումարը: Նրա հետ տեղի ունեցավ այսպիսի երկխոսություն: «Ցուցակ եմ տվել, ո՛չ ցուցակը կա, ո՛չ պատասխանը»,- գրգռված ասաց նա: Հետաքրքրվեցինք՝ ի՞նչ ցուցակ: «Ձենի»,- ասաց նա: Քանի՞ հոգու: 150: Եվ ինչքա՞ն պետք է վճարեն նրան: «Մարդա 5 մանեթ»,- պարզաբանեց կինը: 5 դրա՞մ: «Ի, 5 հազար դրամ»,- թեման փակեց նա: Այդ ժամանակ նրա կողքով անցավ Մարտին Սուքիասյանը, որը մեր պարզաբանումներին ի պատասխան ասաց.

«Ես իմ գործն եմ անում, դուք՝ ձերը»: Քվեարկության ավարտից մեկ ժամ առաջ տեղեկություններ եղան, որ լրագրողների «Ասպարեզ» ակումբի մոտ Սուքիասյանի կողմնակիցներն ընտրակաշառք են բաժանում: Այս տեղեկությունները հասել էին նաեւ Վարդան Ղուկասյանի թիմակիցներին, որոնք մոտ քառասուն տարեկան Անահիտին ծեծելով եւ մերկացնելով փորձում էին վերցնել դեռեւս առավոտյան քվեարկած այս կնոջ մոտի 2 հազար դրամը, որը նա ստացել էր Մարտինի թիմակիցներից:

«Իմ հալալ քրտինքն ա»,- բղավելով դիմադրում էր Անահիտը: Ժամը 19-ին տեղեկություններ ստացանք, որ մի քանի հաղթանդամ երիտասարդ ներխուժել են Մարտին Սուքիասյանի՝ Անի թաղամասում գտնվող շտաբ եւ ծեծել ներսում գտնվողներին: Միքայել Վարդանյանը ծեծը բացառեց: «Տղայական բան էր»,- կատարվածը բնորոշեց նա: Իսկ գյումրեցիներն ինչո՞վ են բացատրում Վարդան Ղուկասյանի հաղթանակը: «Նրա արածը տեսել ենք, չնայած կրիմինալը մի քիչ շատացել է»,- ասում էր 60-ամյա մի տղամարդ: «Մարտին Սուքիասյանը միշտ էլ ընտրակաշառքով է դարձել պատգամավոր, գյումրեցիների մեծ մասը դեմքով էլ չգիտի նրան, դե, հիմա թող տեսնի, թե Գյումրին ինչպես է մերժում իրեն»,- ասում էր մեկ ուրիշ գյումրեցի:

Հ.Գ. Շիրակի մարզպետ Ռոմիկ Մանուկյանից երեկ հետարքրվեցինք, թե ինչո՞վ է ինքը բացատրում ԱԺ պատգամավոր Մարտին Սուքիասյանի պարտությունը Գյումրիի քաղաքապետի ընտրություններում. «Հանրապետական կուսակցությունը չկանգնեց նրա կողքին: Գյումրիից ընտրված ՀՀԿ-ական պատգամավորներ Սուքիաս Ավետիսյանը եւ Աշոտ Աղաբաբյանը չօգնեցին իրենց գործընկերոջը, իսկ մյուս թեկնածուն (Մարզպետունի Մարգարյանը) աջակցեց գործող քաղաքապետին` իր հավաքած ձայներով»: Հիշեցնենք, որ Գյումրիի քաղաքապետի երրորդ թեկնածուն՝ Մարզպետունի Մարգարյանը, 4 հազար 445 ձայնով կիրակի օրվա ընտրություններում գրավել էր երրորդ տեղը: Ի դեպ, հանրապետական Մարտին Սուքիասյանին ՀՀԿ-ից եւ ՀՅԴ-ից բացի աջակցում էր ընդդիմադիր ՀԺԿ-ն, որի Գյումրիի կառույցի ղեկավար Արտաշես Կարապետյանը թիվ 34/51 տեղամասում պարոն Սուքիասյանի վստահված անձն էր, բայց այդպես էլ նրան չթույլատրեցին մասնակցել ձայների հաշվարկին:    

Մհեր Արշակյան