Իր լոլիկը վաճառող գյուղացին չի հարկվելու, որովհետեւ օրենսդրությամբ այդ եկամուտն ազատված է հարկումից․ ՊԵԿ նախագահ

«Եթե այլ երկրում եկամուտն արդեն հարկվել է, միեւնույն եկամուտը միեւնույն հարկատեսակով մենք հարկելու որեւէ նպատակ չենք հետապնդում»,- այսօր կառավարությունում լրագրողների հետ զրույցի ժամանակ հայտարարեց ՊԵԿ նախագահ Դավիթ Անանյանը՝ անդրադառնալով ՊԵԿ նախագծին, ըստ որի՝ եթե քաղաքացին արտագնա աշխատանքից գումար է ուղարկում կամ գյուղացին գյուղմթերքի վաճառքից եկամուտ է ստանում, ապա ստացված գումարի 23 տոկոսը պետք է վճարվի պետական բյուջե՝ որպես եկամտահարկ:

«Այսօրվա էս քննարկումները, որ ֆեյսբուքում կամ սոցցանցերում տարածում են գտել, հիմնավոր չեն։ Ուղղակի կարող է այս կամ այն միտքը, նախադասությունը սխալ ընկալված լինի»,- ասաց ՊԵԿ նախագահը՝ հավելելով, որ առանց հանրային քննարկման որեւէ նախաձեռնություն օրենքի ուժ չի կարող ստանալ։

«Հիմա ես հասկանում եմ, որ քաղաքական նախընտրական այս շրջանում ինչ-որ միտք կոնտեքստից կտրված կարող է մեկնաբանվել եւ այդ մեկնաբանությունները կարող են շահարկման առիթ հանդիսանալ։ Կառավարությունում որեւէ կոնկրետ նախագիծ դեռեւս չկա, կա եկամուտների համատարած հայտարարագրման գաղափար, դրա շուրջ կան տեսակետներ, որոնք պետք է քննարկվեն մասնագիտական շրջանակներում, հետո կառավարությունում, հետո ինչ-որ նախնական նախագծի տեսք ստանալուց հետո դրվեն հանրային քննարկման։ Եւ դա լինելու է ամբողջ 2019 թվականի ընթացքում։ Որեւէ իրավական շուտափույթ ակտերի փոփոխությունների փաթեթ չկա եւ օրակարգում չէ»,-նշեց Դավիթ Անանյանը։

Վերջինս ասաց, որ բոլոր քաղաքակիրթ երկրներում կա եկամուտների համատարած հայտարարագրման ինստիտուտ․ «Մենք՝ որպես ՀՀ, մեր ստեղծման օրվանից քննարկում ենք՝ արդյոք հնարավորություն ունենք համատարած եկամուտների դեկլարացիա ներկայացնելու ինստիտուտ ներդնելու։ Հիմա մենք առաջին անգամ տեխնիկապես ունենք այդպիսի հնարավորություն, ոչ թե անձինք իրենք պետք է պատրաստեն այդ տարեկան դեկլարացիաները, այլ հարկային համակարգի ինքնաշխատ համակարգերը պետք է գեներացնեն էդ հաշվետվությունները, մենք պետք է տանենք ներկայացնենք ֆիզիկական անձանց, որպեսզի իրենք նայեն՝ համաձայն են դրանց, թե՝ չէ։ Հիմա մենք խոսում ենք ստվերի մասին, չէ՞»։ Այո, ստվերում կան բազմաթիվ, այսպես ասած, եկամուտներ, որոնք պոտենցիալ հարկման ենթակա են, բայց չեն հայտարարագրվում։ Եթե մենք բոլորս համընդհանուր որոշել ենք, որ վերջ ի վերջո պետք է ստվերի դեմն առնեն, պետք է մտածենք համատարած հայտարարագրման ինստիտուտի կայացման մասին, մենք 27 տարի մտածում ենք դրա մասին, անընդհատ հետաձգում ենք, ասում ենք՝ երկիրը պատրաստ չի»,- ասաց ՊԵԿ նախագահը՝ հավելելով, որ Հայաստանը հիմա սրան պատրաստ է։

Վերջինս նաեւ ասաց, որ եթե անձը հայաստանյան օրենսդրության առումով չի հանդիսանա էստեղի ռեզիդենտ ու կստանա ոչ հայաստանյան եկամուտներ, այդ եկամուտը Հայաստանում էլ չի հարկվի․

«Ի՞նչն ենք ուզում փոխել։ Անձը, եթե էսօր չի գալիս իմ դուռը, որովհետեւ ես չգիտեմ՝ ինքը եկամուտ ստացել է, թե՝ չէ, ես եմ գնալու իրա դուռը, ասեմ՝ դու եկամուտ ունեցել ե՞ս, թե՞ չէ։ Ինքն առաջին անգամ պիտի մտածի՝ այս անգամ էլ խաբի, թե՝ չէ։ Ինչի՞ եք տրանսֆերտների թիվը կապում հարկման հետ։ Էլի եմ ասում, անձն էսօր էլ ունի էդ պարտավորությունը։ Հիմա մենք աչքներս փակենք, ասենք հարկեր թող չվճարեն, որ տրանսֆերտ չառաջանա՞։ Եթե հարցը նրա մասին է, որ մեկ քաղաքացին, որը եկամտային հարկի օրենսդրության տեսանկյունից հանդիսանում է ռեզիդենտ, ինքն էսօր էլ էդ 13-ի ու մեր 36-ի տարբերությունը բյուջե վճարելու պարտավորություն ունի ավելի քան քսան տարի։ Մենք ուզում ենք այնպիսի օպտիմիզացիա անենք, որ մարդիկ տարիներ շարունակ չվճարածը սկսեն վճարել»,-ասաց Անանյանը։

Ինչ վերաբերում է իրենց մթերքները վաճառող գյուղացիներին՝ Պետական եկամուտների կոմիտեի նախագահ Դավիթ Անանյանը մեկնաբանեց, որ, օրինակ, իր լոլիկը վաճառող գյուղացին չի հարկվելու, որովհետեւ օրենսդրությամբ այդ եկամուտն ազատված է հարկումից։