Եթե մեր իշխանության ժամանակ կլինեն սերմացու գողացող չինովնիկներ՝ մուտանտներ, նրանց տեղը բանտն է լինելու․ Փաշինյան

«Մենք պետք է հաղթահարենք այն կաղապարը, որի մեջ մեզ ուզում են տեղադրել ոմանք։ Եւ էդ կաղապարը աղքատ, խեղճ, փոքր, փոքրիկ, թույլ, անպաշտպան կաղապարն է։ Բայց մենք ասում ենք, որ մենք արդեն շատ կարեւոր կաղապարներ ջարդել ենք»,- այսօր Աշտարակում «Իմ քայլը» դաշինքի նախընտրական քարոզարշավի ժամանակ ասաց վարչապետի պաշտոնակատար Նիկոլ Փաշինյանը։

Նա հայտարարեց, որ ժողովուրդը 2018 թվականի ապրիլ-մայիսին ջարդել է շատ կարեւոր կաղապար, երբ ՀՀ քաղաքացին ոտքի կանգնեց եւ հստակ արձանագրեց, որ ինքն է տերը Հայաստանի Հանրապետության․

«Ես ուզում եմ, որ մենք եւս մի անգամ հաստատենք էդ կարգախոսը՝ «Մենք ենք տերը մեր երկրի»։ Մենք ջարդել ենք մեզ համար անհնարինության կաղապարը, որովհետեւ էն, ինչ տեղի ունեցավ, շատերն անհնար էին համարում, եւ նրանք երկար տարիներ ներշնչել էին հանրությանը, թե իրենց դեմ խաղ չկա, թե իրենք տենց ուժեղ բայեվիկ տղերք են։ Հիմա մկան ծակին շահի են տալիս»,- ասաց վարչապետի պաշտոնակատարը։

Վերջինս անդրադարձավ նաեւ ԱԺ պատգամավոր Արամ Հարությունյանին կալանավորելու միջնորդության քննարկմանը․

«Էսօր ԱԺ-ում պիտի քննարկվեր 3-րդ Հանրապետության պատմության ամենախոշոր կոռուպցիոն-քրեական գործի հետ կապված հարց, երբ ԱԺ պատգամավոր Արամ Հարությունյանին մեղադրյալ ներգրավելու միջնորդություն պիտի ներկայացվեր։ Բա մարդիկ հո անիմաստ չէի՞ն գալիս գործի․․․14 մլն․․․50, 500 մլրդ․․․էդպես։ Ու հիմա, Ազգային ժողովում քվորում չկա, որ Արամ Հարությունյանի հարցը լուծվի, դրա համար էլ մենք ԱԺ-ն ցրեցինք»,- հայտարարեց Փաշինյանը՝ նշելով, որ այնուամենայնիվ, դեկտեմբերի 9-ի ընտրությունից հետո Արամ Հարությունյանն իր պատգամավորական անձեռնմխելիությունը կկորցի, եւ քրեական գործի ընթացքը կշարունակվի իր բնական հունով․

«Էդ մեկն է 14 մլն․․․։ Էկեք նայենք մեր ճանապարհների, դպրոցների վիճակները, աշխատավարձները։ Մեկն ասում է՝ դատի ենք տալու, որ ասել եք՝ հանրապետականը թալանչիների բանդա է։ Հեսա կտեսնենք՝ ով ում դատի կտա։ Հատ-հատ, բոլոր սերմացու գողացող մկներին բերելու ենք դատարան։ Ու եթե թվում է՝ էդ սերմացու գողացող մկները դատարանում ճտեր են դրել, ԱԺ-ն բարձրագույն մարմին է, եւ կառավարությունն ունի բոլոր լծակները՝ դատական համակարգում նույնպես ի վերջո հեղափոխություն անելու, որովհետեւ այո՛, ՀՀ դատական համակարգում շատ մեծ տեղ են կազմում կոռումպացված, թալանչի դատավորները։ Եւ էդ դատավորներին էլ հատ-հատ բերելու ենք պատասխանատվությամբ։ Էդքան տարի ապօրինի մարդկանց լցրել են բանտերը։ Բա էդ Մարտի մեկի գործով Եվրոդատարանը արդեն վճիռներ է սկսել կայացնել տասնյակ գործերով։ Էդ դատավորներին թվում է՝ իրենք մարսելու ե՞ն։ ՀՀ-ում որեւէ մեկը, ոչ մի չինովնիկ իր գողացածը, իր լափածը չի՛ մարսելու։ Եթե մեր իշխանության ժամանակ կլինեն էդպիսի մուտանտներ՝ նրանց տեղը բանտն է լինելու»,- հայտարարեց Փաշինյանը՝ հավելելով, որ հեղափոխությունից հետո այն չինովնիկը, որ իր ծառայությունն ու մանդատը կօգտագործի անձնական շահի համար, նրա նկատմամբ պատիժն ավելի խիստ է լինելու, քան նրանցը, որոնք գործել են հեղափոխությունից առաջ․

«Եւ ես համոզված եմ, որ մեր ժողովուրդը դեկտեմբերի 9-ին նոր թափ է հաղորդելու Հայաստանում սկսված ոչ բռնի, թավշյա հեղափոխությանը, եւ մենք նոր թափով սկսելու ենք տնտեսական հեղափոխությունը, եւ դրա մեջ ձեզնից յուրաքանչյուրը լինելու է առաջնորդ»։

Նիկոլ Փաշինյանն Աշտարակում հայտարարեց, որ այս տարի 120 հազար զբոսաշրջիկ ավելի է եկել Հայաստան, քան նախորդ տարի․

«Ջերմուկում ասացին, որ հոկտեմբերին Ջերմուկի բոլոր հյուրանոցները լիքն են եղել։ Հայաստանում մարդիկ կան, ովքեր 30-40-50 հազար դրամով աշխատում են, մենք ուզում ենք խրախուսել աշխատանքը, միկրոբիզնեսը, որ մարդիկ կիրառեն իրենց ձեռնարկատիրական հմտությունները, եւ էդ առումով Աշտարակը եղել ու մնալու է զբոսաշրջության ամենակարեւոր կենտրոններից մեկը։ Աշտարակի ձորը մի հարստություն է, որը պատկանում է բոլորին։ Մենք, էլի եմ ասում, ոչ թե ձուկ ենք բաժանելու մարդկանց, այլ աջակցելու ենք նրանց, որ պրոֆեսիոնալ ձկնորսներ լինեն։ Եւ մենք ապահովելու ենք, որ մեր գետում ձուկ լինի»,-եզրափակեց Փաշինյանը։