Ասել, թե «Ռեստարտ»-ը սա անում է գրանտների շնորհիվ, նույնն է, թե ասել, որ Ալումյանը Քոչարյանին մեր ցուցումով է պաշտպանում

Ամբողջ աշխարհում տեսնում ենք ոչ լիբերալ ժողովրդավարությունների վերելք: Դրանց գործիքը սուտն ու վախը տարածելն է: Ձեր նշած մեղադրանքները միանշանակ դասում եմ այդ կարգի ստերին: Այս մասին այսօր մամուլի ասուլիսի ժամանակ ասաց «Բաց հասարակության հիմնադրամներ-Հայաստանի» (Սորոս) գործադիր տնօրեն Լարիսա Մինասյանը՝ պատասխանելով պնդմանը, թե հիմնադրամին մեղադրում են Հայաստանում տեղի ունեցած հեղափոխության հետ կապ ունենալու մեջ:

Մինասյանի խոսքով, հեղափոխությունը տեղի չէր ունենա, եթե չլինեին հարյուր հազարավոր մարդկանց համախմբումը, գաղափարների, արդարության, արդարադատության պահանջը, անպատժելիության մթնոլորտը, բացարձակ լճացման ու քաղաքացու թևաթափման մթնոլորտը, եթե չլիներ հարյուր հազարավոր մարդկանց պոռթկումը ու ցանկությունը՝ փոխելու երկիրն ու իրավիճակը:

Մինասյանը նշեց. «Ես հպարտ եմ ասել, որ տարիների ընթացքում խնդիրները՝ հաշվետվողականության պակասը, մարդու իրավունքների համատարած ոտնահարումը, ժողովրդավարության նենգափոխումը, հիմնադրամը փորձել է կանխել դրանց տարածումը, թույլ չտալ՝ անելով մոնիտորինգ, ցույց տալով փաստերը»:

Անդրադառնալով ԵՊՀ-ի շուրջ տեղի ունեցող Նարեկ Մալյանի եւ «Ռեստարտ» նախաձեռնության միջեւ ծագած վեճին՝ Մինասյանն ասաց. «Մենք խորապես մտահոգված ենք, որ վերջին շաբաթների ընթացքում Հայաստանի հասարակական ու քաղաքական դիսկուրսի որոշակի մի հատված տարված է մեր եւ մեր քաղաքացիական հասարակության գործընկերների աշխատանքների վերաբերյալ սուտ մեղադրանքներ տարածելով, որոնք հանգեցրին կիրակի գիշերը տեղի ունեցած՝ Նարեկ Մալյանի եւ «Ռեստարտ» ուսանողական նախաձեռնության անդամների միջեւ միջադեպին: 

Մենք դատապարտում ենք անձի հանդեպ այս եւ բոլոր տեսակի այլ հարձակումները, ինչպես նաեւ բոլոր նրանց, ովքեր առաջ են տանում կեղծիքը՝ փորձելով պառակտում սերմանել: Կոչ ենք անում բոլոր կողմերին՝ դիմել ողջամիտ ու իրազեկված երկխոսության՝ հաշվի առնելով մեր երկրի համար այս հույժ կարեւոր ժամանակահատվածը: Բոլոր այն պնդումները, որ մեր հիմնադրամը նպատակ ունի վնասել Երեւանի պետական համալսարանի հեղինակությանը կամ վարկաբեկել ռեկտոր Արամ Սիմոնյանին, անհեթեթ են, վիրավորական ու սուտ»:

Հարցին, թե «Ռեստարտ» ուսանողական թիմին ինչի՞ համար է տրվել դրամաշնորհը, արդյո՞ք նրանք կատարել են իրենց աշխատանքը, քանի որ մինչ այժմ ԵՊՀ-ին կամ ուսանողներին միտված քայլ չեն տվել, եւ արդյո՞ք այդ գումարը տալու նախապայմաններից մեկն այն է, որ նրանք պետք է պահանջեն Արամ Սիմոնյանի հրաժարականը, Մինասյանը պատասխանեց. ««Ռեստարտ» ուսանողական նախաձեռնությանը հատկացվել է 20 հազար դոլարի դրամաշնորհ, որի նպատակն է ԵՊՀ կյանքում ուսանողների իրազեկված մասնակցությունն ապահովելը եւ ուսանողների կողմից բուհի կառավարումը հաշվետու դարձնելու գործընթացին սատարելը։ «Ռեստարտը» իր ստեղծման օրից զբաղված է հենց դրանով, եւ վերջերս կազմակերպության ղեկավարը ստացել է բարձր պարգեւ նաեւ միջազգային կազմակերպություններ ներկայացնող նախաձեռնությունից։ Որեւէ նախապայման չկա, մենք հաշվի ենք առնում միայն այն, ինչ գրված է դրամաշնորհի հայտում։ Ծրագրից դուրս որեւէ գործունեություն չենք վերահսկում։ Ասել, որ «Ռեստարտը» դա արել է մեր դրամաշնորհի շնորհիվ, նույնն է, թե ասել, որ պարոն Ալումյանը, որը մեզանից դրամաշնորհ է ստանում, Ռոբերտ Քոչարյանին պաշտպանում է մեր ցուցումով»:

Հարցին, թե ինչո՞ւ է հիմնադրամը այդքան մեծ գումարներ տվել ԵՊՀ-ին, Մինասյանը պատասխանեց. «Հիմնադրամի կրթական ծրագրերն ունեն սկզբունքային եւ ռազմավարական թիրախներ։ Կրթական մեր ծրագրերի նպատակը եղել է եւ կա սատարումը բարեփոխումներին։ Որպես մայր բուհ՝ ԵՊՀ-ն եղել է մեր ծրագրերում առաջատարը։ Այն ունի շատ մեծ կարողություններ՝ կրթության համակարգի իրական անցումային բարեփոխում իրականացնելու տեսանկյունից: Ընդհանուր կրթական ծրագրերի համար տրվել է 7 մլն 700 հազար դոլար: ԵՊՀ-ն ուղղակի ստացել է 822 հազար դոլար գրանտ եւ 218 հազար դոլարի ծրագրեր կատարվել են մեկ այլ գործընկեր կազմակերպության կողմից՝ ԵՊՀ-ում: Պետական ինժեներական համալսարանը ստացել է 375 հազար դոլար, բժշկական համալսարանը 115 հազար դոլար, ակադեմիան եւ ֆունդամենտալ գրադարանը 170 հազար դոլար, ազգային գրադարանը՝ 574 հազար դոլար: Հիմնադրամը նաեւ ունեցել է կրթաթոշակների ծրագիր»: