Իրավիճակը հասարակներից չէ, մինչև ապրիլի 5-ը վտանգն առկախված է, ներքին առումով ևս հանգիստ չէ. Հարություն Մկրտչյան

Քաղաքագետ Հարություն Մկրտչյանի կարծիքով՝ հայկական կողմը ճիշտ դիրքավորում և դիրքորոշում է ընդունել այս պահին՝ հաշվի առնելով նաև Բաքվի ջղաձգումները:

Այսպես է նա մեկնաբանում ապրիլի 5-ին Բրյուսելում սպասվող՝ Հայաստանի վարչապետի, Միացյալ Նահանգների պետքարտուղարի և Եվրոպական հանձնաժողովի նախագահի հանդիպումը:

«Իհարկե, Ադրբեջանը պետք է հիստերիայի մեջ ընկնի, քանի որ ռուս-ադրբեջանա-թուրքական տանդեմի առաջ դրված խնդիրը Արևմուտքը թույլ չի տալիս իրագործել, վիժեցնում է Բաքվի պլանները՝ ՀՀ տարածքային ամբողջականությունը խախտելու ուղղությամբ»,- «Հայկական ժամանակ»-ի հետ զրույցում ասում է քաղաքագետը:

Ըստ Մկրտչյանի՝ Ադրբեջանը կարող է միայն ջղաձգվել, ոչինչ ավելին. «Քաշային կարգով չի կարող այդքան ուժ ներկայացնել, որ հավաքական Արևմուտքին դեմարշ հայտարարի: Իսկ եթե ընդունենք, որ այդպես է, ու Բաքվում գլխավոր խելացնորը՝ Ալիևը, վերջնականապես է ցնորվել, ապա նրանք աշխարհաքաղաքական այս տարաձայնությունների մեջ իրենց տեղավորում են ռուսական նավում, իսկ այդ նավը որքան երկար կարող է դեգերել՝ ժամանակը ցույց կտա»:

Զրուցակցի խոսքով՝ հավաքական Արևմուտքը խնդիր է դրել, որ Ռուսաստանը որևէ պարագայում իր ծրագրածը չկատարի, և այս համատեքստում Նահանգները Հարավային կովկասում Հայաստանին դիտարկում է անկախության բաստիոն:

«Որովհետև ՀՀ-ն բացահայտ կռիվ է տալիս իր անկախության, ինքնիշխանության համար, փոքր լինելով հանդերձ՝ փորձում է գործոն լինել, և Արևմուտքում այս ամենը գիտակցում են և, ինչպես Ուկրաինայի դեպքում, տալիս աջակցություն: Հուսով եմ, որ ապրիլի 5-ին քաղաքական, ռազմաքաղաքական ասպարեզում մենք կստանանք նմանատիպ աջակցություն, որպեսզի ՀՀ դիմադրողականությունը բարձրանա: Այս ֆոնին է, որ Ադրբեջանը հիստերիկ ջղաձգումների մեջ է ընկել, գիտակցում է՝ Արևմուտքն ամեն ինչ անելու է, որ ռազմական դիսբալանսը վերականգնվի»,- կարծում է նա:

Միաժամանակ քաղաքագետը նկատում է, որ ապրիլի 5-ին ընդառաջ Բաքվի ձեռքերը կապված են 4 գյուղերը տալու՝ Հայաստանի պատրաստակամության առումով: Ըստ նրա՝ Ադրբեջանը թե՛ ներքին, թե՛ արտաքին լարվածություն է փորձում ստեղծել Հայաստանի շուրջ. «Եթե իշխանությունը որդեգրել է այս ճանապարհը, նա նաև կրում է դրա քաղաքական պատասխանատվությունը: Իրավիճակը հասարակներից չէ, աշխարհաքաղաքական կենտրոններ են իրենց շահերով բախվում, և պետք չէ պրոցեսներին վնասել: Մինչև ապրիլի 5-ը վտանգն առկախված է, ներքին առումով ևս այնքան էլ հանգիստ չէ, խմբեր և խմբավորումներ կան, որ գերակտիվ են պահում իրենց, բայց կարծում եմ՝ սրան էլ կկարողանանք դիմանալ»:

Անդրադառնալով Ֆրանսիայի և Հունաստանի կողմից Հայաստանին ուղղված աջակցության վերաբերյալ Բաքվից հնչող մտահոգություններին՝ վերջինս հիշեցնում է, որ Նիկոլ Փաշինյանը մեկ անգամ ապառազմականացման առաջարկ է հնչեցրել, և այն ուժի մեջ է:

«Իրենք պատրա՞ստ են իրենց ձեռքի տակ եղած մահաբեր զենքը վայր դնել, հանձնել երաշխավոր կողմերին և գնալ տարածաշրջանի դեմիլիտարիզացիայի, իհարկե՝ ոչ, այնպես որ ՀՀ-ն պարտավոր է իր տարածքային ամբողջականությունը ապահովելու, ինքնապաշտպանվելու համար ընդհուպ մինչև մահաբեր զենքեր ձեռք բերել: Մեր ներքին գործերի մեջ Ադրբեջանի «քիթը խոթելու» փորձերը պիտի կասեցվի, և որևէ պարագայում Ադրբեջանին չպետք է թույլ տանք անգամ այդ մասին մտածել»,- ասում է Մկրտչյանը:

Կրկին անդրադառնալով ապրիլի 5-ի հանդիպմանը՝ զրուցակիցն ասում է, որ այդ օրը Արևմուտքը հաստակ մեսիջներ կտա, այն է, որ պետք է Ռուսաստանի հետ հարաբերությունները բոլոր ասպեկտներում վերանայել:

«Տարիներ շարունակ և հիմա էլ ՀՀ ենթակառուցվածքները ՌԴ վերահսկողության տակ են մի խելացնոր ղեկավարի՝ «գույք՝ պարտքի դիմաց» գործարքի հետևանքով, ընդհուպ այս խնդիրներին պետք է անդրադառնալ: Հիմա է ժամանակը, հիմա է, որ պետք է գնալ ռադիկալ փոփոխությունների, որովհետև Արևմուտքից ունենք այդ աջակցությունը: Դիմանալ է պետք, ժողովրդին բացատրել, որ պրոցեսը լինելու է ցավոտ՝ սոցիալ-տնտեսական առումով, ինչու՝ ոչ, անվտանգային առումով էլ Ադրբեջանը կարող է ատամ ցույց տալ, բայց, ի վերջո, նրան բերելու են կառուցողական դաշտ: Կապանքներն ու ատամները, որ մեր պետության շուրջ դրվել են, հարյուրամյակների փորձ ունեն: Հուսով եմ, որ Նիկոլ Փաշինյանը կգնա ռադիկալ փոփոխությունների, քանի որ ՀՀ քաղաքացու պահանջը դա Է»,- ասում է նա:

Հերմինե Կարապետյան